Luutu 4

UBowasi ikimuhaala uLuutu

1 UBowasi wáwuushile iiluta mbakha pa shikwilo sha lijumbi lila, pina vitangaanaga avagosiivaha wáakhala. Baheene, wámwajile yula ulukholo lwakwe iishila, yula yuna wámutambwile uBowasi kwa Luutu. Wámushemeela wáaja, “Yinsa ukhale panu,” wáaluta wáakhala. 2 UBowasi wávashemeela avagosiivaha ishumi ava pa lujinji lula, vave vayimililaaji, wávajovile, “Khali panu.” 3 Wáyansa kimujovela ulukholo lwakwe, “Umuunu yuna wátinaga kihuma ku Mowabu, uNaomi, iigusa amagunda gina gakhandi ga lukholo lwesu uElimeleki. 4 Na yuune ilihiiva lyangu, nikujovele owe. Nda wisakula umugunda ugu, gula baaha pa vagosiivaha ava, nda uve usisakula jovaga. Kiiva umuunu umutasi uwa kigula owe, umuunu uwa wuvili one.” Woope wáaja, “Nisiigule.”

5 UBowasi wáajova, “Ilisiku pina ukhagula umugunda gwa Naomi ukhava wámuhaala nayu Luutu yula uMumowabu, baheene uwulingulaje uwusi wa lukholo lwesu umunyankiiyaga uMalooni mu shikholo shaakwe.” 6 Umuunu yula wámugomosesa kiija, “One nisikwiliile kigula kiiva uwuhaasi wa vanangu wulananjikha. Yigulila owe.” 7 Pamwandi pala avaanu ava ku Isilaheli vaali ni ngʼoma iya kihaala awu kibadilisania uwusi. Umunya wusi iyaawula indaatu yimo na kimupeela yula yuna iigula, ndeeno shiiva shimanyilo sha kiija vagusisania, iliswi lyasila. 8 Yula ulukholo lwakwe wámujova, “Ugule yuuwe!” Wáyawula indaatu yaakwe yimo na kimupeela uBowasi.

9 Woope uBowasi wávajoveele avagosiivaha kiija, “Omwe mwanyaaga kiija amagunda aga naagula goona gina gakhandi ga Elimeleki, nu Kiliyoni nu Malooni, gina gakhandi mu mawokho ga Naomi. 10 Khanji niiva namuhaala nayu Luutu yuna akhandi mudala wa Malooni, baheene ave mudala wangu. Ndeeno nisiive nikiwulingula uwusi waakwe wusikhayagaga mu shikholo shaakwe. Khanji ilitaawa lyakwe lisikhayagaga mu shikholo shaakwe, na lisikhayagaga mu livansa lya mu lijumbi ili, omwe iminsiyaano munjimiilile.”

11 Avagosiivaha na vaanu woona avanji vayitiishe kiija, “Ose tili vayimililaaji. UMUTWA amuhwananise umudala uyu ave na vaana vinshi ngaja uLaheli nu Leya vaveene vina vasavile avaanu woona ava ku Isilaheli. Na yuuwe ulute uve mukhome ku shikholo shaakho isha Efulaata, hata mu lijumbi ili ilya ku Betelehemu. 12 Khanji ifisafi fina akhakupeela uMUTWA kishilila kwa yula umudala, avaanu vave vinshi ngaja shisafi sha Peleesi, yuna wásaviilwe nu wiihe uYuuda nu nyina waakwe uTamaali.”

UNaomi iipata umuunu uwa kimusunga

13 UBowasi shi wámutoolile uLuutu shi wáava mudala waakwe, woope uMUTWA wámuyimilila shi wáapata ulwanda wáasava umwana mudiimi. 14 Woope avadala vamujova uNaomi kiija, “Timusufyaje uMUTWA yuna wákupeela umuunu uwa kikusunga, ilitaawa lya uyu live likhome ku Isilaheli. 15 Uyu hambi ikikupeela ingufu imya na kikusunga pina ukhagogolokha. ULuutu umaayi wa mwana uyu, akuganile khanji akutanjile kishila avaana fungati avadiimi.” 16 Baheene uNaomi wámuviikha umwana pa shifuva shaakwe, wáava ikimusunga yumwene ngaja mwanaakwe. 17 Khanji avadala vala vaajova, “Naomi wáapata umwana!” Umwana yula vamutambulila ilitaawa Obedi. UObedi wámusava uYeese, woope uYeese wámusava uDawudi.

18 Isho shikholo sha Peleesi,

uPeleesi wámusavile uHesiloni.

19 UHesiloni wámusavile uLamu,

uLamu wámusavile uAminadabu.

20 UAminadabu wámusavile uNashoni,

uNashoni wámusavile uSalumooni.

21 USalumooni wámusavile uBowasi,

uBowasi wámusavile uObedi.

22 UObedi wámusavile uYeese,

uYeese wámusavile uDawudi.