Mataayo 3

UYohana uMutwiniaji iikhoma ku lunyikha

(Maluko 1:1-8; Luuka 3:1-18; Yohana 1:19-28)

1 Uluhaavi lula uYeesu pina akhandi ashaanali ali ku Nasaleti, wáali akwali umuunu yumonga yuna itambulwagwa Yohana Mutwiniaji. Umuunu uyo wáwoneeshe ku lunyikha lwa nyi ya Yudeya. Akhandi iikhoma iijova, 2 “Lambisilaji uwunansi weenyu, kwa kiiva uWutwa wa Nguluvi^a wahejeela kunyeenyu.” 3 UYohana yumwene yuna akhandi iijowa nu mukuwamalago uIsaaya kiija,

“Ishawuti ya muunu yipuliisikha mu lunyikha yiija,

‘Mumunosesaaje uMutwa insila yaakwe

na kimugolosesa muna akhashila.’”^b

4 Amenda ga Yohana gakhandi gatendiilwe kwa waaji wa ngamiya, akhandi ikiyipinya ulukhova lwa nkwembe mu shigudi^c na kiilya inkumbi nu wuushi uwa mu lihakha. 5 Avaanu kihuma ku Yelusalemu na ku mbali soona isa nyi ya Yudeya, na mu mbali soona isa mukhoga gwa Yolodani, 6 vamulutiile uYohana. Vakhandi vilambiisila uwunansi waanave, woope akhandi ikivatwinia mu mukhoga gwa Yolodani.

7 Leelo uYohana wáganaga kivaaga aVafalisaayo^d na Vasadukaayo,^e vikimuyinsila kwa winshi kiija avatwinie, uYohana wávajovela kiija, “Omwe muna muli vaana va njokha! Musikhahegukha uwuhigo kihuma kwa Nguluvi pina mulambiisila kwa wumyansi. 8 Leelo injendo seenyu siwonensaaje kiija, mwalambiisila uwunansi weenyu. 9 Musikhahiivaji kiija, ‘Takulukha kwa kiiva tili shisafi sha Abulahamu.’^f Shiyooli nikivajovela, uNguluvi akwiliile kiseetula amangʼanga aga, kiiva vaana va Abulahamu! 10 Lino, uwuhigo wa Nguluvi waafikha, ngaja muunu yuna akheete inemo ayipinyile kidumula amapishi. Ilipishi lina lisiikhoma amakhomo amanofu, lidumulwa na kitaagwa mu mooto.

11 “One nikivatwinia kwa malenga kiwonensa kiija mwalambiisila uwunansi weenyu, leelo kunyuma yangu iyinsa uyunji, umunya ngufu kishila one, yuna nisikwiliile kiiva muvanda waakwe wa kisumula indaatu saakwe. Uyo yumwene akhavatwinia kwa Numbula uMunofu nu mooto. 12 Umwene akhavabagulania avagolofu na vanansi, ngaja umuunu pina iyeleelula ingano pa luuga, ikungaania ingano yaakwe na kiyiviikha mu shihenje. Leelo amapweleelo ikiganyaanya mu mooto gwa shiluta.”

Kitwinisiwa kwa Yeesu

(Maluko 1:9-11; Luuka 3:21-22)

13 Uluhaavi ulo, pina uYohana itwiniaga, uYeesu wáhumile ku nyi ya Galilaya na kiluta ku mukhoga gwa Yolodani, kiija atwinisiwe nu Yohana. 14 Leelo uYohana wájelaga kiija akhaane, wámujovela uYeesu wáaja, “One nisakulwa kitwinisiwa noowe, lino kwashi owe wiyinsa kunyangu?” 15 UYeesu wámugomosesa wáaja, “Gahaga lino, kwa kiiva tisakulwa tigahe goona gina uNguluvi isakula.” Baheene uYohana wáyiitikha, wámutwinia.

16 UYeesu wáganile kitwinisiwa, baaho wáahuma mu malenga, wáawona uwulanga widindukha, nayu Numbula wa Nguluvi iyiikha pamwene kwa shihwano sha nkunda. 17 Baheene iliswi lyapuliisikha kihuma kushaanya liija, “Uyu yu Lusawo lwangu,^g yuna nimuganile na ikinishendeefya.”