Maluko 4

Ishihwano isha munyansa mbeyu

1 UYeesu wáyansiise kivamanyisa avaanu khanji palubali pa lilamba ilikhome. Ishipuga shikhome sha vaanu shamupiliime na kimuminyiilisa, baheene wáhanjile wáhuluta mu shipugo wáakhala. Avaanu vakheele kunja ku nyi inyuumu. 2 Wávawulaniise amaswi minshi kwa fihwano, na mu mamanyiso gaakwe wájovile, 3 “Mupulisaaje! Umulimaaji yumonga, wálutile kinyansa imbeyu. 4 Pina wáali inyansaga imbeyu, isinji sagwiliile pa nsila, inyuni sayinsa sayilya. 5 Isinji sagwiliile pa shivakwe, pina pasaali ni lilongo linshi, saamela nyangu nyangu kiiva ililongo lyali lisheefu. 6 Pina samelile ilijuva lyanyaanyile, kiiva indela sisafishile pansi, lulwene sayuumile. 7 Isinji sagwiliile mu mapishi ga mimfwa, pina samelile saminyilisiiwe na mimfwa, lulwene sagombwele kikhoma imbumbulu. 8 Na imbeyu isinji sagwiliile pa lilongo ilinofu, saamela na kikula wunofu. Imbeyu simonga sakhomile imbumbulu mashumi gatatu, isinji mashumi mutanda, nasi sinji ligana.” 9 Baheene uYeesu wájeele, “Umuunu yoyoona umunya makutu, apulishe!”

UYeesu iganula ishihwano sha munyansa mbeyu

(Mataayo 13:10-23; Luuka 8:9-15)

10 UYeesu na vamanyisiwa vaakwe vawuushile pa shipuga sha vaanu, lumo na vanji vina vakhandi vikimufwata, vaaluta palubali. Ukho vayansiise kimuposa vaaja, “Ifihwano ifi uluganulo lwakwe shishi?” 11 UYeesu wávajovile, “Omwe mupeliilwe kimanya imbuusa iya Wutwa wa Nguluvi. Leelo avanji, vijovelwa imola soona kwa fihwano, 12 kiija,

‘Valoleele mandu gina nikigasenga, leelo vasikhagaagaga.

Vikigapulikha mandu gina nilogola, leelo vasikhagamanyaga.

Yaali yive ndeeno, ndi valambiisila kwa Nguluvi, woope ndi wávasaajila.’^a”

13 UYeesu wáposiise, “Omwe nda musiimanya ifihwano ifi, musifimanye wuli ifihwano ifinji? 14 Umulimaaji inyansa iLiswi lya Nguluvi. 15 Imbeyu sina sagwiliile mu nsila, sihwananisiwa na vaanu vina vipulikha iLiswi ilyo, baaho uShetaani iyinsa ikiliwuusa iLiswi mu numbula saanave. 16 Imbeyu sina sagwiliile pa shivakwe, sihwananisiwa na vaanu vina vipulikha iLiswi, baaho vikiliposheela kwa wushendeefu. 17 Leelo vasikiliviikha mu numbula. Nda valafisiwe kwa kiiva ya Liswi lya Nguluvi, baaho vikililekha ilihuuvi. 18 Imbeyu sina sagwiliile pa mimfwa, sihwananisiwa na vaanu vina vipulikha iLiswi lya Nguluvi. 19 Leelo paanyuma mu wiikhasi waanave, umuninu, uwusi, nu wupafu wa kiyishendeefya mu fiinu fya mu nyi, fikivaminyiilisa. Ilyo likivagaha vapootwe kikhoma amakhomo. 20 Imbeyu sina sagwiliile pa lilongo ilinofu, sihwananisiwa na vaanu vina vipulikha iLiswi na kiliyanushila. Awo vaveene viikhoma amakhomo, vamonga mashumi gatatu, avanji mashumi mutanda nava vanji ligana limo.”

UYeesu iwulanisa kiyinatila iLiswi lya Nguluvi

(Luuka 8:16-18)

21 UYeesu wávaposiise avaanu wáaja, “Wuli, avaanu vikunga ulumuli na kigubikha ni shigaana, awu viviikha mu lifungu? Ndaali! Viviikha pa liwumbila. 22 Shilushwali, shoshoona shina shifihiilwe shikhafumbulwa, khanji imbuusa yoyoona yikhamanyikha na kiwonekha, shiyooli fikhava bahawuvalafu. 23 Umuunu yoyoona umunya makutu, apulishe!” 24 Wávajova khanji, “Mukhataje iliswi lina mupulikha. Ishijelo shina mukivajelela avanji, shiisho na yuumwe shina uNguluvi akhavajelela. 25 Kiiva umuunu yoyoona yuna iimanya gina nilogola, uNguluvi asimupeele kimanya mandu. Leelo umuunu yoyoona yuna asikigamanya gina nilogola, hata uwumanyi uwudoodo wuna anawo, akhapokhwa.”

UWutwa wa Nguluvi ngaja mbeyu sina siimela

26 UYeesu wájovile kiija, “UWutwa wa Nguluvi ngaja ndeeni, umuunu yumonga wáatile kinyansa imbeyu mu mugunda. 27 Wáali isengaga insengo paminsi, paashilo wáali igonaga, uluhaavi ulo imbeyu siimela na kikula. Umwene asikhasimanyile kiija siikula wuli. 28 Ililongo lilyene lilemfya ifimelo. Taali lilembula ilihamba iliteshe, baheene amahoojo na kuwudugo imbumbulu. 29 Imbumbulu pina sayeela, umuunu uyo iyansa kihenga ni lihenjelo, kiiva uluhaavi lwa nkungulo lwafikha.”

UWutwa wa Nguluvi ngaja mbeyu ya mujombe

(Mataayo 13:31-32, 34; Luuka 13:18-19)

30 UYeesu wávajovela ishihwano ishinji wáajova, “UWutwa wa Nguluvi niwuhwananise ni shi? 31 UWutwa wa Nguluvi wuhwaneene ni mbeyu iya mujombe. Kiiva imbeyu iyi nangʼana kishila soona mu nyi, 32 leelo nda yivyalwe, yiimela na kiiva shimelo shikhome kishila ifimelo fyona ifya mu mugunda. Amansamba gaakwe giiva makhome, inyuni sikwiliile kisenga ifiwanso fyanave muumo.”

33 UYeesu wáali apimanyisaaga avaanu kwa fihwano ifinji finshi ngaja ifyo. Akhavamanyiise shina vakhandi vakwiliile kimanya. 34 Asikhalogwele na woope shoshoona mbakha fihwano, leelo pina akhandi na vamanyisiwa vaakwe veene duguli, wávaganulilaga soona.

UYeesu ivatamya ilipepo ilikhome na mavingu

(Mataayo 8:23-27; Luuka 8:22-25)

35 Ilisiku lila pashaamihe, uYeesu wávajoveele avamanyisiwa vaakwe wájeele, “Tilowoshe ku mwambwa yila iya lilamba ilikhome ilya Galilaya.” 36 Baheene, vashileshile ishipuga sha vaanu baaho. Avamanyisiwa vaakwe vayinjiile mu shipugo, muna wáali akwali uYeesu. Khanji avaanu avanji vayangeele ifipugo ifinji valongoseenie nawo. 37 Ishimfulumbwe ishikhali shayansiise kikutukha, amavingu gayansiise kitova ishipugo. Amalenga gayansa kimema mu shipugo. 38 Uluhaavi ulo uYeesu wáali uluvala lwa kunyuma mu shipugo, wáali agonile utulo pashaanya pa lihagulo. Baheene avamanyisiwa vaakwe vamulamwise, vamujovile kiija, “Mumanyisaaji, wuli, usikitusungupila kiija ose tiifwa?”

39 UYeesu wálamukha, wálikhajila ilipepo na kigajova amavingu wáaja, “Vatama! Singamala!” Baaho kwavatama kwava tototo. 40 Wávaposa avamanyisiwa vaakwe wáaja, “Kwashi mutiila? Mushaanali mungaya lihuuvi?” 41 Woope vatiila mandu, vaposania vaajova, “Uyu yu naani, yuna hata ilipepo na mavingu fyona fikimutiila?”