Luuka 2

Kisawa kwa Yeesu Kilisito

1 Uluhaavi lula pina wásawaagwa uYohana uMutwiniaji, uAgusito yuna akhandi Kayisaali, umutwa wa Valuumi,^a wálajisaaga kiija, avaanu woona ava mu wutemi waakwe, vavasiwe. 2 Uluvaso ulu lukhandi lwa wutasi mu nyi yila, na lwasenjekhaga mu luhaavi luna uKileniyo akhandi atemile inyi ya Siliya. 3 Baheene avaanu woona valutaga kivasiwa, shila muunu ku lijumbi lina wáhumaga ku shikholo shaakwe.

4 Woope uYusufu wáwuukhaga mu lijumbi lya Nasaleti lina likhandi ku nyi ya Galilaya. Wáaluta kiyiyandihisa mu lijumbi lya Betelehemu ya ku Yudeya. Ku lijumbi ilyo kukwene wásaviilwe umutwa uDawudi, na uYusufu akhandi shikholo sha Dawudi. 5 Pina akhalutile kivasiwa, akhalongoseenie nu Maliya yuna akhandi amubaanyile. Uluhaavi ulo, uMaliya akhandi nu lwanda. 6 Pina vaali ukho, uluhaavi ulwa Maliya ulwa kisava lwafishile. 7 Wáasava umwana wa wutasi wa shidiimi, wámuvilinga amenda ga wushaali. Wámugonia mu litiinyi lya kiliilila ingʼombe, kwa kiiva vasikhapatile apa kigona, inanda sa vahensa sikhandi simemile avaanu.

Avadimaaji viyanushila imola sa kisawa uYeesu

8 Ishilo shila vakhandi vakwali avadimaaji vina vakhandi viikhala ku matinga, vidiima na kiyangalila inkholo saanave, nkholeela ni Betelehemu. 9 Baaho umalayikha wa Mutwa uNguluvi wávatwiwushila nu lumuli kihuma kwa Mutwa lwavangʼalikha imbali soona. Vayansa kitiila mandu. 10 Baheene umalayikha wávajovela kiija, “Loleeli! Musikhatiilaji, kwa kiiva nivaleteele imola inofu yina yisivapeele avaanu woona uwushendeefu wukhome. 11 Imola inofu yiyeene iyi, iminsiyaano uMukulusaaji wáasawa mu lijumbi ilya Dawudi, kwa kiiva yeenyu. Uyo yumwene yu Kilisito,^b Mutwa. 12 Ishimanyilo sheenyu isha kimumanya ishi, musimwaje umwana mushaali, afwasiiwe amenda ga wushaali, agonile mu litiinyi lya kiliilila ingʼombe.”

13 Baaho umalayikha yula wáava lumo ni shipuga ishikhome sha vamalayikha vayine ava kushaanya, vaava vikimusufya uNguluvi viijova,

14 “Atunwajwe uNguluvi kushaanya,

nu wulindamafu wuve mu nyi

ku vaanu vina avayitiishe kivapeela imota.”

15 Pina avamalayikha vawuushile viiluta kushaanya, avadimaaji vala vajovana kiija, “Lino tiwuushe tiitaje ku Betelehemu, tiloleele lina lisenjeeshe lina uMutwa atujoveele.” 16 Valutaga nyangu nyangu ku Betelehemu. Vaganile kifikha vamwaga uMaliya nu Yusufu, nayu mwana umushaali agonile mu litiinyi lya kiliilila ingʼombe. 17 Vaganile kimwaga umwana yula, vavataviilila avaanu imola yina umalayikha akhandi avajoveele iya mwana uyo. 18 Woona vina vapulikhaga imola yina vataviliile avadimaaji vala, vaswigaga mandu. 19 Leelo, uMaliya wágahiivaga hiivaga aga goona na kigayinatila mu numbula yaakwe. 20 Baheene avadimaaji vala vatinaga ku matinga, kuno vikimusufya uNguluvi ku goona gina avamalayikha vavajovelaga, kwa kiiva vagaagaga ngaja shina vajovelwagwa. 21 Lyaganile kifikha ilijuva lya munaana kihuma umwana asawe, vamuyinjisa ijando, vamupeela ilitaawa lya Yeesu. Ilitaawa ili wápelwagwa nu malayikha kihuma unyina asinasumule ulwanda.

UYeesu itawulwa kwa Mutwa

22 Lwaganile kifikha uluhaavi ulwa kivalasiwa^c kwa Yusufu nu Maliya, ngaja uNguluvi shina ilajisa mu ndaji sa Musa,^d valutaga nu mwana ku Yelusalemu^e kiija abaagulwe kwa Mutwa. 23 (Shiisho ndeeno shina yiyandiikhwe mu ndaji ya Mutwa uNguluvi kiija, “Umwana yoyoona uwa wutasi uwa shidiimi, atawulwe kiiva mubaagule wa Mutwa.”)^f 24 Khanji valutaga kihumya ishadanda kwa kiiva ya kivalasiwa, ngaja shina yikhandi ndaji ya Mutwa kiija, vahumye inkunda sivili awu inyana nkunda sivili.^g

25 Uluhaavi ulo ku Yelusalemu, akhandi akwali umuunu yumonga yuna itambulwagwa Simiyoni. Umuunu uyo akhandi mugolofu, ikimufuunya uNguluvi luhaavi loona na kiyihuviilila kiyinsa kwa Kilisito, yuna akhavakulusa aVaisilaheli. Khanji akhandi ilongosewa nu Numbula uMunofu. 26 UNumbula uMunofu wámujovelaga kiija, asikhafwa mbakha pina akhamwaga uMukulusaaji yuna uNguluvi wátahisaaga kimufilikha.^h 27 Baheene, uNumbula uMunofu wámulongosa uSimiyoni kiluta mu lukeeke lwa nanda imbaagule. Lu luhaavi luulo, uYusufu nu Maliya vamutwalaga uYeesu mu nanda, kihumya isadaakha na kimutawula kwa Mutwa, ngaja shina yilajisiiwe mu ndaji. 28 USimiyoni wámutoola umwana yula wámupagata na kimusufya uNguluvi wáaja,

29 “Mutwa, wakwisa ulugulumilo lwakho luna walogolaga,

lino unitawule one ni muvanda waakho nifwe kwa wulindamafu.

30 Ameeho gangu gamwaga uMukulusaaji,

31 yuna amubagwile kiiva Mukulusaaji wa vaanu va fimyanja fyona.

32 Uyu asiive lumuli lwa kimuwonensa uNguluvi

kwa vina vasili Vayahuudi,

khanji asiive ileeta uwutupikho

kwa vaanu vaakho ava ku Isilaheli.”

33 Uwiihe nu maayi waakwe uYeesu, vaava viswiga gina uSimiyoni akhandi ilogola aga mwana. 34 Paanyuma uSimiyoni wávayimiilila. Baheene wámujovela uMaliya wáaja, “Loleela! Umwana uyu avishiilwe nu Nguluvi kwa kiiva ya vaanu vinshi ava mu nyi ya Isilaheli. Kwa vala vina vikimukhaana viiva vayajile, leelo vina vikimuhuviilila awo vakhakulusiwa. Asivapavile vinshi leelo avanji vina vasiive vikhaana, 35 ndeeno amahiiva gaanave gakhava bahawuvalafu. Kikhaanwa kwa mwene, na yuuwe kusikugahe kiiva nu wuvafi wukhome.”

36 Khanji akhandi akwali umukuwamalago uwashimaayi yuna akhandi agosiipe, akhandi itambulwa Ana. Uyo akhandi mwali wa Fanuweli kihuma mu shikholo sha Asheeli. Pina vakhandi vakheele maakha fungati kihuma vatoolane, umugoosi waakwe wáafwa. 37 Wásigala mufwile mbakha wáafisa maakha mashumi munaana na gana. Uluhaavi loona ulo, akhandi iikhala mu nanda imbaagule iya kifuunyila, akhandi iilekha kiilyaⁱ kwa kiiva ya kimufuunya uNguluvi ishilo ni shiminsi. 38 Uluhaavi luulo uSimiyoni pina ilogola nu Yusufu nu Maliya, umukuwamalago uAna wáaluta baaho. Baheene wáyansaaga kimuhonjesa uNguluvi na kiyalaalisa imola sa mwana uyo, ku vaanu woona vina vakhandi vahepeleese kiyinsa kwa Kilisito, yuna akhavakulusa aVaisilaheli.

39 UYusufu nu Maliya pina vamalile kigaha ulugoto loona ngaja shina lushwali mu ndaji sa Mutwa, vaawuya mu lijumbi lyanave lya Nasaleti lina likhandi ku Galilaya. 40 Umwana yula wáava iikula, iyonjelela ingufu nu luhala, imota ya Nguluvi yikhandi nu mwene.

UYeesu mu nanda imbaagule iya kifuunyila

41 Shila mwakha avasafi va Yeesu vakhandi viiluta ku Yelusalemu uluhaavi lwa shiwungo sha Pasaakha.^j 42 UYeesu pina akhandi ana maakha lishumi limo na gavili, wálutaga na vasafi vaakwe ku Yelusalemu ku shiwungo sha Pasaakha, ngaja shina yikhandi ngʼoma yaanave. 43 Uluhaavi lwa shiwungo sha Pasaakha pina lwashilile, avasafi vaakwe vawuukha viiwuya kukhaaya kusiina kimanya kiija, umwanave uYeesu wásigaliile ku Yelusalemu. 44 Pina viiwuya kukhaaya, vakhandi vihiiva kiija vali lumo nu Yeesu mu shipuga. Vaganile kijenda ulujendo lwa lijuva limo, baheene vayansa kimusakula ku vanyalukholo na mu vamanyi, leelo vasikhamwajile. 45 Baheene vaatina ku Yelusalemu kuno vikimusakula.

46 Ilijuva lya wutatu vaafikha vamwaga mu lukeeke lwa nanda imbaagule, akheele na vamanyisaaji va ndaji sa Musa, ikivapuliisa na kivaposa amaposo. 47 Woona vina vakhandi vikimupuliisa, vakhandi viswiga mandu uwumanyi waakwe nu luyankho lwakwe. 48 Woope avasafi vaakwe pina vaganile kimwaga, vaswigaga mandu. Baheene umaayi waakwe wámujovela wáaja, “Lusawo lwangu, kwashi watugahila ndeeni? Loleela! One nu wiiho taalava mandu kikusakula.” 49 UYeesu wávagomosesa wáaja, “Kwashi mwava mukinisakula? Musimeenye kiija one nisakulwa kiiva mu nanda ya Daada wangu?” 50 Leelo avasafi vaakwe vasikhagamanyile gina ikivajovela.

51 Baheene uYeesu wáawuya na vasafi vaakwe ku Nasaleti, akhandi muunu wa kivayinatila. Ago goona, umaayi waakwe wágayinatilaga mu numbula yaakwe. 52 Woope uYeesu wáava iikula umuvili nu luhala, ikimushendeefya uNguluvi na vaanu.