UYeesu itangaana nu Sakaayo
19
1 UYeesu wáganaga kihuluta mu lijumbi lya Yeliko, baheene wáava iishila paakhati naakhati ya lijumbi lila. 2 Mu lijumbi lila, akhandi akwali umuunu yumonga, yuna akhandi itambulwa Sakaayo. USakaayo akhandi mukhome wa vatofya khoodi, khanji akhandi munya wusi. 3 Umuunu uyu akhandi isakula kimwaga uYeesu kiija ali wuli, leelo wágombolaga kimwaga kiiva akhandi mufupi, khanji avaanu vakhandi vinshi mandu. 4 Baheene wáaluta luvilo kumwandi ya shipuga, wátaana mu mupishi gwa mujombe, kiija amwaje uYeesu pina iiva iishila pala. 5 UYeesu pina wáganile kifikha pala, wáloleela kushaanya ya mupishi, wámwaga uSakaayo wáaja, “Sakaayo, yiikha nyangu! Kwa kiiva iminsiyaano mbakha nihwe mu litembe lyakho.” 6 USakaayo wáyiikha nyangu, wámusaajisa uYeesu kukhaaya yaakwe kwa wushendeefu.7 Avaanu woona vina vakhandi vikimwaga uYeesu pina ihuluta mula, vayansa kingʼuula, viija, “Kwashi iiluta kikhala kwa munansi!” 8 Baheene uSakaayo wáyiima, wámujovela uMutwa wáaja, “Wee Mutwa! Lino, uwusi wangu niigava paakhati naakhati, ulubali lumo nisivapeele avapiina. Khanji, umuunu yuna namupokhaga shoshoona, nisimutinisise mala khanaa mu fiinu fina namupokhaga.” 9 UYeesu wámujovela wáaja, “Iminsiyaano uwukulukho wayinsa ku vaanu va nanda iyi, kwa kiiva umuunu uyu woope wa shikholo sha Abulahamu. 10 Lulwene, one Lusawo lwa Muunu nayinsaga kisakula na kikulusa avaanu vina vayajile.”
Ishihwano sha vavanda vina vapelwagwa ihela
11 Woope avaanu vina vakhandi vikimupuliisa uYeesu vakhandi vihiiva kiija uWutwa wa Nguluvi wukhayansa uluhaavi luulo, kwa kiiva vakhandi nkholeela kifikha ku Yelusalemu. Baheene uYeesu wávajovela ishihwano 12 wáaja, “Akhandi akwali umuunu yumonga wa shikholo sha shitwa yuna wáshuulile kiluta ku nyi ya kutali. Wálutaga ukho, kiija apeelwe uwutawulilwa wa kiiva mutwa, baheene atine kitema inyi yaakwe.
13 “Pina asinawuushe, wávashemeela avavanda vaakwe ishumi, shila muunu wámupeela ihela nyinshi,b wávajovela wáaja, ‘Nisavisisaaji ihela isi mbakha pina nikhatina.’ 14 Baheene umuunu uyo wáwuukha. Leelo wáganile kiwuukha avaanu va nyi yaakwe vakhandi vikimukhalalila, baheene vavafilikha avanandeje vamufwata vaajova ndeeni, ‘Umuunu uyu, tisisakula ave mutwa weesu!’ 15 Hata nda vajovaga ilyo, wápelwagwa uwutwa uwa shitwa. Pina wátinaga, wávashemeelile avavanda vala vina wávapeelaga ihela, kiija amanye shila muunu akwavile silinga.
16 “Umuvanda wa wutasi wáafikha, wámujovela wáaja, ‘Wee mutwa, ihela sina wanipeelaga, nisaviise isinji, nasavisa fipuga ishumi.’ 17 Umutwa yula wámujovela wáaja, ‘Waagaha wunofu mandu, owe uli muvanda munofu. Nisikupeele kitema amajumbi ishumi kwa kiiva ukhandi muyinatifu kwa fisheefu.’ 18 Umuvanda wa wuvili woope wáafikha, wámujovela wáaja, ‘Wee mutwa, ihela sina wanipeelaga, nisaviise isinji fipuga fisaanu.’ 19 Umutwa wámujovela woope uyu wáaja, ‘Na owe, nikikupeela kitema amajumbi gasaanu.’
20 “Umuvanda uyunji wáafikha, wáaja, ‘Wee mutwa, ihela saakho isi apa. Nasipinyaga mu munyankha, kiija sisikhayagaga. 21 Nagahaga ilyo kwa kiiva nikikutiila, owe uli muunu mukhamu. Witoola fina usiviishile, khanji wikungula fina usivyalile.’
22 “Umutwa wámujovela wáaja, ‘Wee muvanda yuna uli munansi! Lino, nikikuhiga kwa maswi gaakho gina walogola. Waava umeenye kiija one nili muunu mukhamu mandu, nitoola fina nisiviishile, khanji nikungula fina nisivyalile. 23 Lino kwashi usikhasiviishile ihela sangu kwa vina visavisa,c baheene nitoole lumo ni sa pashaanya sina siyonjeleele?’
24 “Baheene wávajovela avaanu vina vakhandi vayiimile pala wáaja, ‘Uyu, mutoole ihela saakwe, mumupeele yuna asaviise ishumi.’ 25 Vamujovela vaaja, ‘Wee mutwa, mbona yula anaso lishumi!’
26 “Wáaja, ‘Nikivajovela kiija, umuunu yoyoona yuna iimanya gina nilogola, uNguluvi asimupeele kimanya mandu. Leelo umuunu yoyoona yuna asikigamanya gina nilogola, hata uwumanyi uwudoodo wuna anawo, akhapokhwa. 27 Lumo na ago, muvaleete avalugu vangu vala vina vakhandi vasisakula one nive mutwa waanave, muvabude baaha panyangu!’”
UYeesu iyinjila ku Yelusalemu kwa filuulu
28 UYeesu pina wájovaga ago, wáava apiyiteneeshe kitaana kiluta ku Yelusalemu kuno avalongwele avamanyisiwa vaakwe. 29 Pina ali nkholeela mu lujinji lwa Betifage nu lwa Betaniya, ku shidunda shina shikhandi shitambulwa shidunda sha Miseyituni, wávafilikha avamanyisiwa vaakwe vavili, 30 wávajovela wáaja, “Lutaji mu lujinji lula luna luli pamwandi yeenyu. Pina muhuluta mula, musiyaaje inyana dogovi yipinyiilwe, yina yisinajelwajwe kiyangalwa nu muunu. Yiyawulilaji, muyileete panu. 31 Umuunu nda avapose kiija, ‘Kwashi mukiyiyawulila?’ mujovelaji kiija, ‘UMutwa ana nsengo nayo.’ ”
32 Baheene avamanyisiwa vala vaaluta, vagaaga goona ngaja uYeesu shina akhandi avajoveele. 33 Pina vikiyiyawulila inyana dogovi yila, avanya nayo vavaposa vaaja, “Kwashi mukiyiyawulila inyana dogovi iyi?” 34 Vavajovela vaaja, “UMutwa ana nsengo nayo.” 35 Vamutwalila uYeesu, vatandikha amenda gaanave pa dogovi,d baheene uYeesu wáyangala.
36 UYeesu pina iiluta, avaanu vakhandi vitandikha amenda gaanave mu nsila. 37 Pina ali nkholeela kiyiikha ku shidunda sha Miseyituni, ishipuga shoona sha vamanyisiwa vaakwe shashendeeva, vayansa kimusufya uNguluvi kwa kiiva ya mabikha goona gina vagaagaga pina iigaha uYeesu. Vaava vikimusufya mandu uNguluvi 38 viija,
“Ayimililwajwe uMutwa yuna iyinsa kwa litaawa lya Mutwa uNguluvi.e
Uwulindamafu kushaanya nu wutupikho kwa Nguluvi yuna ali kushaanya.”
39 Mu shipuga shila vakhandi vakwali aVafalisaayo avanji, vamujova uYeesu vaaja, “Mumanyisaaji, vakhajila avamanyisiwa vaakho, valeshe kilogola ago!” 40 Leelo uYeesu wáaja, “Nikivajovela, ava nda vasisime, amangʼanga ago gasilyove mandu!”
UYeesu iikuva amalago kiija iYelusalemu yisibojolwe
41 UYeesu pina wálivejeelaga ilijumbi lya Yelusalemu, wáyansa kilikhoolela 42 wáaja, “Owe lijumbi lya Yelusalemu, waali uve wiimanya iminsiyaano gina wisakulwa kigasenga, baheene ndi waava nu wulindamafu! Leelo, lino gafihiilwe pa meeho gaakho. 43 Mu nsiku sina siyinsa, avalugu vaakho vakhasenga uluhengo ulwa kipilima ilijumbi lyakho lyona, apo baheene vakhayansa kikuyalushila kihuma imbali soona. 44 Vakhakugwisa pansi, owe na vaanu vaakho woona. Vasikhalilekha hata lingʼanga lina likhasigala pashaanya ya lingʼanga liyine,f kwa kiiva ukhandi usiganile kimanya uluhaavi luna uNguluvi ikikuleetela uwukulukho!”
UYeesu ivalasa inanda imbaagule iya kifuunyila
45 UYeesu wáyinjilaga mu lukeeke lwa nanda imbaagule iya kifuunyila. Pina wáyinjila, wáyansa kivadaga woona vina vakhandi viigusa na kigula ifiinu. 46 Wávajovela wáaja, “Yiyandiikhwe mu Mayandikhwa aManofu, ‘Inanda yangu yikhava nanda ya mafuunyo.’g Leelo omwe mwaseetula kiiva ‘wiikhasi wa vahiiji.’h ”