UNguluvi akhavahiga avaanu woona asikhabaniilila
2
1 Lino omwe Vayahuudi vayangu, nimeenye kiija mukivahiga avaanu avanji vina viigaha gina mwigaha. Leelo na yuumwe musikwiliile kiyisaajila pa Nguluvi! Lino, pina mukivahiga avanji mumanyaje kiija mukiyihiga yuumwe, kwa kiiva uwunansi wuna vikiwugaha, wuweene wuna mukiwugaha na yuumwe. 2 Timeenye kiija, uwuhigo wa Nguluvi wa shiyooli kwa vaanu vina viigaha uwunansi uwo. 3 Leelo omwe vayangu, mukivahiga avanji pina hata na yuumwe mwigaha uwunansi wuuwo, mwihiiva kiija mukhahegukha uwuhigo wa Nguluvi? 4 UNguluvi munofu kwa kiiva ikivasungupila na ikivagugumila mandu. Leelo omwe lino, mwisakula kigasala ago goona! Wuli, musiimanya kiija ikivagahila omwe amanofu, kiija mulambiisile uwunansi weenyu? 5 Lino, kwa kiiva muna shidada, khanji mwikhaana kilambiisila uwunansi weenyu, mukiyivishilisisa amalava mu lisiku lina uNguluvi akhavahiga kwa shiyooli.6 Ilisiku ilyo, uNguluvi akhamuhomba shila muunu kilingana na gina agagahile yumwene.a 7 Akhavapeela uwuumi wa shiluta avaanu vina vijimba kigaha amanofu, kwa kiiva visakula uwutupikho, ishitiilo nu wuumi wuna wusinanjikha. 8 Leelo, uNguluvi akhavakhalalila na kivalafya avaanu avanya numbula ya wushooyo na vina vikishikhaana ishiyooli, khanji viigaha uwunansi. 9 Avaanu woona vina viigaha amavi, vakhalafisiwa mandu, kiyansisa kwa Vayahuudi mbakha kwa vina vasili Vayahuudi. 10 Leelo woona vina viigaha amanofu, uNguluvi akhavapeela ulusufyo, uwutupikho nu wulindamafu, kiyansisa kwa Vayahuudi mbakha kwa vina vasili Vayahuudi. 11 Ndeeno, uNguluvi asibaniilila umuunu yoyoona.
12 Avaanu vina vasili Vayahuudi, vina viigaha uwunansi vakhabudwa, hata yive vasisimeenye indaji sa Musa.b AVayahuudi vina vasimeenye indaji iso, leelo nda vagahe uwunansi, vakhahigwa kilingana ni ndaji iso. 13 Vakhahigwa kwa kiiva, uNguluvi asikimuvasa umuunu kiiva mugolofu pamwene yuna iyinatila hela indaji sa Musa, leelo ikimuvasa umuunu kiiva mugolofu, yuna iigaha gala gina indaji siijova. 14 Avaanu vina vasili Vayahuudi, awo vasisimeenye indaji iso. Hata ndeeno, nda vagahe amanofu kilingana na mahiiva gaanave na maswi ago gali ngaja shina siijova indaji isa Musa, apo yiwonensa kiija, vameenye kigaha shina yisakulwa. 15 Avaanu awo shina vashwali, injendo saanave siwonensa kiija gina gisakulwa mu ndaji sa Musa, gayandiikhwe mu numbula saanave. Uluganulo lwakwe kiija, amahiiva gaanave, uluhaavi ulunji gikivahiga khanji uluhaavi ulunji gikivawonensa kiija, viigaha gina gifwaya. 16 Shilukhava ilisiku lya wuhigo, pina uNguluvi akhavahiga avaanu kishilila uKilisito Yeesu, hata kwa mahiiva gaanave aga mbuusa. IMola iNofu yina niikhoma, shiisho ndeeno shina yiijova.
AVayahuudi ni ndaji ya kiyinjisiwa ijando
17 Lino omwe vina mukiyitambula kiija muli Vayahuudi va shiyooli, muhuviilila kiija muli vagolofu pa Nguluvi kwa kisiyinatila indaji sa Musa. Khanji mukiyisufya mwijova, omwe muli vaanu va Nguluvi. 18 Omwe mukiyiwona kiija mumeenye injowo sina uNguluvi ageene mugahe, na mugameenye gina manofu, kwa kiiva mumanyisiiwe indaji saakwe. 19 Omwe mukiyiwona kiija musakulwa kivalongosa avaanu vina vasili Vayahuudi, ngaja muunu yuna ikivalongosa avapofu, awu ngaja lumuli luna lukivamulishila avaanu mu nshiisi. 20 Khanji, mukiyiwona kiija muli vamanyisaaji va vaana na vina vasishimeenye ishiyooli sha Nguluvi, kwa kiiva indaji seenyu sikivajovela imola sa wumanyi woona nu luhala lwa shiyooli. 21 Lino, omwe mukivamanyisa avanji, leelo kwashi musikigasenga ago gina mwimanyisa? Omwe mukivamanyisa avanji kiija, “Usikhahiijaga,” leelo kwashi omwe mwihiija? 22 Omwe mukivajova avaanu kiija, “Usikhawafukhaga,” leelo kwashi omwe mwiwaafukha? Owe wikhalalila isanaamu sa manguluvi, leelo kwashi owe yuuwe wihiija ifiinu ifya mu malonjelo amakhome aga kifuunyila isanaamu iso? 23 Omwe vina mukiyisufya kiija, musimeenye indaji sa Nguluvi, mukimuyegula uNguluvi pina musikigagaha gina indaji sikivalajisa. 24 Shiisho ndeeno, ngaja shina yiyandiikhwe mu Mayandikhwa aManofu kiija, “Kwa kiiva ya nsengo seenyu imbi sina mwisenga, ilitaawa lya Nguluvi litofolwa na vaanu vina vasili Vaisilaheli.”c
25 Kiyinjisiwa ijando,d kuna lutono kunyeenyu, nda mwiyinatila indaji sa Musa shina siijova. Leelo, nda musiyinatila indaji, kiyinjisiwa ijando kunyeenyu kwiva kungaya lutono loloona, khanji omwe musiive ngaja vaanu vina vasiyinjisiiwe ijando. 26 Ndeeno, umuunu yuna asiyinjisiiwe ijando, nda ayinatile indaji shina siijova, uNguluvi asimuyiitishe ngaja muunu yuna ayinjisiiwe ijando. 27 Avaanu vina vasiyinjisiiwe ijando, nda viyinatila indaji shina siijova, insengo saanave sibedela kiija, omwe muli Vayahuudi avanya wunansi. Yisiive ndeeno kwa kiiva, omwe muli Vayahuudi vina muyinjisiiwe ijando, khanji musimeenye indaji sa Nguluvi, leelo musikisiyinatila. 28 Ndeeno, mumanyaje kiija lusili kiija umuunu yoyoona yuna asaviilwe Muyahuudi asiive Muyahuudi wa shiyooli. Umuunu asiiva Muyahuudi wa shiyooli, kwa kiyinjisiwa ijando. 29 Ndaali! UMuyahuudi wa shiyooli yumwene yuna ikimutiila uNguluvi mu numbula yaakwe. Khanji kiyinjisiwa ijando kwa shiyooli, kigahwa nu Numbula uMunofu mu numbula, kusili kwa kisiyinatila indaji sa Musa. Umuunu ngaja uyo, asiposheela ulusufyo kihuma kwa vaanu, ila akhasufisiwa nu Nguluvi yumwene.e