UNguluvi ikulusa kwa mota yaakwe
2
1 Ulwamwandi, omwe mukhandi mufwile, kwa kiiva mukhandi musileshile indaji sa Nguluvi na kigaha uwunansi. 2 Mukhandi mwifwata injendo mbi ngaja vaanu vanji va mu nyi iyi. Khanji mukhandi mukimufwata uShetaania yuna iitema amalungu, uluhaavi ulu isenga insengo mu numbula sa vaanu vina vasikimuyinatila uNguluvi. 3 Shiyooli ose woona takhalaga ngaja aveene. Tikhandi tifwata uwupafu uwuvi uwa muvili, lulwene tikhandi tisenga goona gina uluhala lwesu lwa wunansi lukhandi luhiiva na kisakula. Tasawaagwa ni numbula ya wunansi ngaja avanji woona, ndeeno ose woona tikhandi tijenda kwa lulafisiwo lukhome lwa Nguluvi kwa kiiva ya wunansi weesu.4 Leelo uNguluvi ana lusungu mandu nu lugano lwakwe lukhome. 5 Kwa kiiva ya ilyo, wávafyusaaga lumo nu Kilisito Yeesu. Wágahaga ndeeno uluhaavi lula luna tikhandi tifwile, kwa kiiva tikhandi vanansi. Kwa mota yaakwe, uNguluvi wátukulusaaga, 6 wátufyusaaga lumo nu Kilisito Yeesu. UNguluvi wátuviikha kiiva lumo nawo mu Wutwa waakwe kushaanya kwa mwene. 7 UNguluvi wágahaga injowo soona iso, baheene uluhaavi luna luyinsa awonense imota yaakwe inkhome mandu kunyeesu. Iwonensa imota iyo kwa lusungu lwakwe, luna ikituwonensa kishilila kwa Kilisito Yeesu. 8 Kwa mota yaakwe uNguluvi wávakulusa kwa kimuhuviilila uKilisito. Shiyooli, uwukulukho uwo wusihumiilila noomwe, leelo lutono lwa bule kihuma kwa Nguluvi. 9 Musikhapeliilwe uwukulukho kwa nsengo seenyu inofu, baheene yoyoona asilaave ayisufye. 10 Ose fiwumbwa fipya fya Nguluvi. Umwene atuwumbile wupya kwa nsila ya kitulungania nu Kilisito Yeesu, baheene tisenje insengo inofu. Insengo iso uNguluvi wásiviikhaga kihuma pawukuulu, baheene ose tive tikisisenga.
UNguluvi avalunganiise aVayahuudi na vina vasili Vayahuudi kishilila kwa Kilisito
11 Baheene lino, omwe vina musikhasaviilwe mu shimyanja sha Vayahuudi, aVayahuudi vakhandi vikivasala omwe vikivajova “vasiyinjisiiwe ijando.”b Leelo kivayinjisa umuvili ijando ukho, nsengo yina yiigahwa na vaanu mu muvili hela, omwe mukumbukhaje shina mukhandi palwamwandi, 12 uluhaavi lula musikhandi lumo nu Kilisito. Mukhandi ngaja vayinsano, kiiva musikhandi lumo na Vaisilaheli avaanu va Nguluvi. Omwe musikhandi muhanjile mu lutaahiso lwa lufingo nu Nguluvi.c Khanji mukhandi mwikhala mu nyi musihuviilila hata kimumanya uNguluvi. 13 Mukhandi kutali nu Nguluvi, leelo lino wávaleeta nkholeela kishilila idanda ya Kilisito pina wáfwisaga pa musalaaba, kwa kiiva mulunganisiiwe nu Kilisito Yeesu.
14 UKilisito yumwene yuna aleetile uwulindamafu paakhati yeesu, ose Vayahuudi na omwe vina musili Vayahuudi. Atugahile ose vina tikhandi tibagunkheene, kiiva shipuga shimo. Wáwusaaga uwulugu wuna wukhandi wutubaguleenie ngaja luhengo kwa nsila ya mfwa yaakwe pa musalaaba. 15 Indaji isa Vayahuudi sina malajiso minshi, leelo uKilisito wásiwusaaga. Wágahaga ndeeno, kiija ose Vayahuudi na omwe muna musili Vayahuudi tive shipuga shimo, kwa nsila ya kilunganisiwa nu mwene. Shiisho ndeeno wátugahaga kiiva nu wulindamafu. 16 Kwa nsila ya mfwa yaakwe pa musalaaba, wáwusaaga uwulugu wa Vayahuudi na vina vasili Vayahuudi na kiiva ngaja muvili gumo. Khanji wávalingaania woona nu Nguluvi. 17 Wáyinsile kikhoma iMola iNofu ya kileeta uwulindamafu, kunyeenyu omwe muna mukhandi kutali nu Nguluvi na kunyeesu ose ti Vayahuudi vina tikhandi nkholeela nawo. 18 Ago gageene tagahilwagwa nu Kilisito, gikitugaha ose ti Vayahuudi na omwe muna musili Vayahuudi kimuvejeela uWiheesu kwa nsila ya Numbula yumo yuyula.
19 Baheene lino, omwe musili vayinsano wala vashila nsila khanji. Leelo vaana va Nguluvi, khanji muli vakhaaya lumo na vabaagule vaakwe avanji. 20 Muli ngaja mangʼanga gina vasenjeele inanda. Woope avanandeje na vakuwamalago vali ngaja luutu lwa nanda iyo. Khanji uKilisito Yeesu yumwene ali ngaja lingʼanga likhome lya ku mbogonyo ya nanda iyo. 21 Mwa mwene tilungeene lumo na kijina ngaja shina ilingʼanga ilikhome ilyo lilunganiise inanda yoona. Ikitugaha kiiva nanda mbaagule kishilila kwa Mutwa uYeesu.d 22 Lino, kwa nsila ya kilungana nu mwene, na yuumwe muna musili Vayahuudi musengwa pashaanya ya luutu lwa nanda iyo yina uNguluvi iikhala. UNguluvi iikhala mu nanda kwa nsila ya Numbula waakwe.