Avamanyisaaji va wudehi mu nsiku isi isa wudugo
4
1 Baheene uNumbula uMunofu ilogola bila kifiha kiija, mu nsiku sa wudugo avanji vakhalekha kiyinatila ishiyooli sha lihuuvi, baheene vakhagapuliisa amalungu, na kiyinatila mamanyiso gaanave. 2 Avaanu vina vimanyisa ago vamyansi, khanji vadehi, inumbula saanave nyuumu. 3 Awo vikivakhaana avanji valeshe kitoolana, awu kiilya ifyakiilya ifinji fina uNguluvi wáfiwumbile, kiija avahuvililaaji va Yeesu vafiyanushile kwa kihonjesa, kwa kiiva vameenye ishiyooli. 4 Ifiwumbwa fyona ifya Nguluvi finofu, wala kusiina isha kikhaanwa. Leelo fiyanushilwajwe kwa kihonjesa, 5 kwa kiiva Liswi lya Nguluvi na mafuunyo geesu, gikifivalasa ifiinu ifyo.Umuvanda umunofu wa Yeesu Kilisito
6 Nda uvamanyise avahuvililaaji va Yeesu amamanyiso aga, apo usiive muvanda munofu wa Kilisito Yeesu. Khanji usiive usunjiilwe wunofu mu shiyooli sha lihuuvi lyesu na mu mamanyiso amanofu gina owe ugayinatiile. 7 Owe sikhaanaga khabisa insimo sa pawukuulu sina singaya lutono loloona, leelo wiila jimbaga kiiva nu wiikhasi wuna idobokha uNguluvi. 8 “Kigumanyania umuvili kiiva ni ngufu, kuna lutono ludoodo, kukwene kigukhangasa umuvili hela. Leelo, uveesaje nu ludali kifuunya na kimuyinatila uNguluvi, ukho kuna lutono kishila fyona. Nda ugahe ndeeno, uNguluvi atahiise kikupeela uwuumi wa lino na wuna wiyinsa.” 9 Iliswi ilyo lya kihuviililwa, lina avaanu visakulwa kiliyanushila. 10 Mu ilyo, tiiva tina ludali na kisenga insengo, kwa kiiva tikimuhuviilila uNguluvi, yuna muumi, uMukulusaaji wa vaanu woona vina vikimuhuviilila.a
11 Ago gageene gina wisakulwa kivamanyisa na kivalajisa avahuvililaaji kiija vagayinatilaje. 12 Usikhamuyitikhaga umuunu yoyoona akusale kwa kiiva owe uli mujeleelo. Leelo ujimbaje uve shihwano kwa vahuvililaaji, mu lulogolo, mu njendo saakho, mu lugano, mu lihuuvi na mu wugolofu waakho. 13 Jimbaga kivayimbila avaanu aMayandikhwa aManofu, khanji ukhomaje na kimanyisa, mbakha pina nikhayinsa ukho. 14 Usikhalekhaga kishisenjela ishipeelwa shina uNguluvi wákupeelaga kishilila amaswi aga wukuwamalago, pina wabagulwagwa na kivishiilwa amawokho na vayimililaaji va shipuga sha vahuvililaaji. 15 Ujimbaje kisenga ago kwa numbula yaakho yoona, baheene mu wiikhasi waakho avaanu woona vayaaje insengo yaakho. 16 Uyiyangalile mu njendo na mamanyiso gaakho. Usikhayolopwagwa, kwa kiiva pina wiigaha ago, ukiyikulusa yuuwe na vina vikikupuliisa.