Insengo sa lumili
3
1 Vahuvililaaji vayangu, musikhaveesaji vamanyisaaji vinshi va Liswi lya Nguluvi, kiiva mumeenye kiija, ose ti vamanyisaaji tikhahigwa mandu nu Nguluvi. 2 Ose woona tipungania, tiigaha uwunansi kwa nsila nyinshi. Nda akwali umuunu yuna asipungania mu gala gina ilogola, uyo iiva wáajina mandu, iimanya kigusivila umuvili gwakwe goona.3 Loleela, ifalaasia tikisikhamiilisa situtiilaje, kwa nsila ya kiviikha mu mulomo gwanave ishuuma shidoodo shina shigonjiilwe, mbakha pina tikisilongosa amavili gaanave.
4 Shiisho ndeeno fyope ifipugo, hata nda fikhome mandu, fisunkhwa ni lipepo lina likutukha mandu, hata ndeeno filongosewa ni filongoseso finangʼana hela. Ifipugo ifyo fiiluta kokoona kuna idobokha umujensaaji. 5 Shiisho ndeeno, ulumili loope shilungo shidoodo sha muvili, shikiyisufya kigaha amakhome mandu.
Hiivaji kiija, hata umooto umunangʼana gukwiliile kinyaanya ilihakha likhome. 6 Ulumili loope luhwanana nu mooto, lumemile uwunansi winshi. Ulumili ulu shilungo shimo mu filungo fyona ifya muvili, lwigaha uwushaafu wa muvili goona. Ulwene lupinsa umuunu kigaha uwunansi mu wiikhasi waakwe woona. Umooto ugo gwihuma kwa Shetaani.b
7 Inkhanu soona sikwiliile kidiimwa. Avaanu vakwiliile kidiima inkhanu, inyuni, fina fitambala na fina fikwali mu bahali. 8 Hata ndeeno kusiina umuunu yuna akwiliile kidiima ulumili aleshe kilogola fivi. Ulwene luna wuvi wuna wusisivilwa, khanji winanga avaanu ngaja wanga wina wiibuda.
9 Kwa lumili ulu tikimusufya uNguluvi uWiheesu, uMutwa weesu. Khanji kwa lumili luulo tikivayiijila avaanu vina uNguluvi wávawumbaga kwa shihwano shaakwe. 10 Mu mulomo muumo, mumwene giihuma amaswi ga kisufya na ga kiyiijila. Lino, ago gasisakulwa gave ndeeno! 11 Puliisi, kusiina ishisansa shina shiihumya amalenga amanofu na makhali! 12 Vahuvililaaji vayangu, yisikwiliile kiiva, ilipishi lya mujombe likhome amakhomo ga museyituni.c Umusabiibud goope, gusiikhoma amakhomo ga mujombe. Khanji ilisima lya malenga ga muunyo, lyope lisiihumya amalenga amanofu.
Uwumanyi uwa shiyooli
13 Yu naani umunya luhala nu wumanyi kunyeenyu? Awonense ago, kwa kigaha amanofu, na kiiva nu wuhuugu wuna wiihuma mu luhala lwakwe.
14 Leelo inumbula seenyu nda simemile uwushooyo, ijiila nu wukhali, baheene musikhanunumukhaji na kiyihala kiija muna wumanyi. Khanji musikhalogolaji uwudehi mu shiyooli. 15 Uwumanyi wa ndeeno, wusiihuma kwa Nguluvi. Uwumanyi uwo wa mu nyi, khanji wa njendo sa vaanu, sina siihuma kwa Shetaani. 16 Popoona pina avaanu vapili ni numbula ya wushooyo khanji ni jiila, apo piiva ni libaatu, lumo na kisenga imbi isinji soona.
17 Leelo, avaanu vina viiva nu wumanyi wuna wiihuma kushaanya kwa Nguluvi, awo vaveene vagolofu. Vidobokha kiiva nu wulindamafu na vaanu avanji, vahuugu khanji vikiyiyiisa. Awo vaveene vanya lusungu mandu, khanji vina viigaha insengo nofu. Vasisenga aga kivabaniilila avaanu vamonga, khanji vangaya wumyansi. 18 Avaanu vina vileeta uwulindamafu kwa vaanu, viiva ngaja vivyala imbeyu iya wulindamafu, paanyuma vakhakungula gina idobokha uNguluvi.