Ibalula ya wutatu iya
Yohana
UYohana ikimuhunjila uGaayo
1
1 Ibalula iyi yihumile kunyangu one Yohana, yuna nili muyimililaaji wa shipuga sha vahuvililaaji va Yeesu. Nikikuyandishila owe Gaayo mugani wangu, yuna nikugeene kwa numbula yangu yoona.2 Mugani wangu, nilomba kiija uyitenekhaje wunofu kwa goona mu wiikhasi waakho. Nikikufuunyila kiija umuvili gwakho guve munofu, ngaja shina inumbula yaakho yikiyitenekha wunofu, kihanga nu Nguluvi. 3 Nashendeevaga mandu, pina avahuvililaaji vayeesu vamonga vaganaga kiyinsa kinibedela kiija, ukiyitenekha kikhata ishiyooli na kikhala mu shiyooli. 4 Kusiina ishiinu shina shikinishendeefya mandu, kishila ulwa kipulikha kiija avanangu mu lihuuvi, vapikiyitenekha kikhala mu shiyooli.
Uwugolofu uwa Gaayo
5 Mugani wangu, owe uli muyinatifu kwa gala gina ukivagahila avahuvililaaji vayeesu, hata nda vave vahensa kunyaakho. 6 Vavajoveele avahuvililaaji va shipuga sha apa, ulwa lugano lwakho. Nikikulomba uyitenekhaje kivatanga wunofu ngaja shina idobokha Nguluvi, baheene vayitenekhaje kishuula. 7 Vayansaaga kishuula kwa kiiva ya kimusenjela uMutwa uYeesu, kusiina kiposheela shiinu shoshoona isha kivatanga kihuma kwa vaanu vina vasikimuhuviilila uYeesu. 8 Ndeeno, ose tisakulwa kivatanga avaanu ngaja awo, baheene tisenje lumo nawo insengo iya kikhoma ishiyooli.
UDiyotileefe nu Demetiliyo
9 Nashiyandishilaga ibalula ishipuga sha vahuvililaaji, leelo umuunu yuna itambulwa Diyotileefe ikiyipinjilikha kumwandi ngaja mukhome waanave, asiyinatila gina nigayandiishe. 10 Ndeeno, pina nikhayinsa ukho, nikhagafumbula gave bahawuvalafu goona gina iigaha, aga masenkho nu wudehi wuna ikitudehela. Gasili ago geene, leelo ikhaana kivaposheela avahuvililaaji vayeesu, vina vijendela ukho. Khanji ikivakhaana avaanu avanji vina visakula kivaposheela, na ikivadaga mu shipuga sha vahuvililaaji.
11 Mugani wangu, usikhafwatanisaaga kigaha uwuvi, leelo ugahaje amanofu. Yoyoona yuna iigaha amanofu, uyo muunu wa Nguluvi. Leelo yoyoona yuna iigaha uwuvi, uyo asimeenye kiija uNguluvi yu naani.
12 Avaanu woona vilunjikha kiija, uDemetiliyo muunu munofu, injendo saakwe sa shiyooli sibedela kiija, mugolofu. Hata na yuuse, tikimwaga kiija muunu munofu, na yuuwe umeenye kiija, ose tilogola aga shiyooli.
Inyunjila iya wudugo
13 Nina maswi minshi gina nikhandi nisakula kikuyandishila, leelo nisisakula kigayandikha ago kwa wiino ni khalaamu. 14 Leelo, nihuviilila kiyinsa kunyaakho lilino ndeeni, kiija titangaane na kilogola lumo.
15 Uwulindamafu wuve lumo noowe. Avamanyi veesu ava apa vikikuhunjila. Na yuuwe, uvahunjilaje ukho avamanyi veesu woona, shila muunu kwa litaawa lyakwe.