¹ Dieikopeta: mo ipika: ateke hayeke Keinani kenke pa:ta: paa hayekeme. ² Kutupa dota: mo ipika: tapakena: tamenie.

Diosepeta: 17 bapina: pa:pa:na: weki hata: mo ipika: atekena: e pokaeyeke wanda: yaapo Biliha pita: Silipa yaapona: eiyeke tonu ame̱le̱ mo sipisipimanu make nanikosimanu make handeteke haemekeme. Ipikana:ma:ta: ateke pa:ta: mo ipika: hameke tonuma: hoke tupa: pia:tiki pimiki ekina: pi mea a:pa:tiki piekeme.

³ Dieikopema:ta: mo wekitonu anka:lopuna:ta: Diosepe pa:ta: homeke puki tieke wopuma: homeekeme. Pa ekipe mo wekita: ipiki koke nanema: mendiaeyeke weki yeke handa piekeme. Ipikana:ma:ta: mo wekina: ta:ta: ma:nda: piki au leke kosa: dau hokulupeke wepia haleekeme. ⁴ Kutupa mo ipika: hameke tonuma: ika: atekema: Diosepe pa:ta: homeke puki tiekema: wopu homeekeeki hando haota: kota: ika: kame pa:ta:ta: honditi pitolo hata: homu piki pi manuma: na la halemekeme.

⁵ Timba ma:nda:ta: Diosepema: upa pea mo ipika: hameke tonu laa haleeketa: kota: ikana:ma: ota: mineke leke ale panka a:nda: lia haemekeme. ⁶ Ipikana:ma: alota: Mo I̱ma: pua: upa kelepono opua:pe. ⁷ Niki paeyaota: oni e pa:ta: hata: widimanu tonkaaso haoma:me. Kutupa yaka widi tonkaaketa: tikitikina: tialiao haya:me. Kutupa ika:eki manuma:ta: yakaeki popei yao hata: yaka widi tonkaake pa:ta: panda: puniaememe laa leekeme.

⁸ Koto leeke mo hameke tonuma: lota: pitolo alota: Naka: honema:ta: neketa: kini hali hata: niki handeteke halipikie hone witelepe lemekeme. Koto ekina: mo ipika: upamanu tonka:na: mo ipikana:ma: a:pa la:tiki pieke pimanu tonka:na: opia:tiki pitolo hata: ikana:ma: ota: hoke mineke panka:tiki pimikime.

⁹ Kutupa Diosepema: upa ma:nda: pea ipika: hameke tonu pa:ta: alota: I̱ma: upa ma:nda: dupa pua:me. I̱ma:ta: nate make kaisepo make kiki yaapona: ankena: homeke hombulanka:manu make handoa:me Kutupa moeki manuma:ta: I̱ pa:ta: panda:puniaememe leekeme.

¹⁰ Ipikana:ma: mo koto upata: ipika: ateke pa:ta: make la haleeke handaata: atekema: ipiki hando alo hata: alota: Kotota: ekipiki upa pea pelepe. Naka: honema:ta: naka: ama:ma: make naka: kame tonuma: make I̱ma: make neke pa:ta: a:pa panda: punialumekee laa alepe leekeme. ¹¹ Diosepena: hameke tonuma:ta: ipiki pa:ta: wamili pimikipate atekema:ta: mo ekina: hone pa wia:tiki pu hayekeme.

¹² Nate ma:nda:na: Diosepena: hameke tonuta: mo atekena: ma:na:manu handeteke halo oni Sekeme nane pua haena:ta: ¹³ Dieikopema: Diosepe pa:ta: alota: Yaka ta:na: pa:la: ekita: neketa: oni naka: kame tonuma: mo ma:na:manu handeteke haleme alena: Sekeme nane poelena:e leekeme. Koto leeke Diosepema: alota: I̱ta: poluekema: tikitiki yalome leekeme. ¹⁴ Ipika: atekema: alota: Mo naka: kame tonuta: epeke halemepe laa handolo puata: mo ma:na:manu epeke tupa: haemeka:na:ta: kota: paa la:ka:la I̱ lolo a:pa:peke leekeme. Koto ekina: atekema: mo wekita: ika: haemeke Hebotoni hadipi mina:pa:lao peneyeke tapaalo peekeme.

Diosepeta: mo Sekeme opolo pua ¹⁵ mo pate pomu lopolo haena: hali ma:nda:ma: handa: u hao lota: pitolo hata: alota: Neketa: aleke weitolo pipe laa leekeme.

¹⁶ Mo wekima: hombo peaaso alota: Mo yaka kame tonu ika: ma:na:manu handeteke haleme pa:ta: weitolome. Koto ekina: mo iki haleme pa:ta: handeka:na:ta: I̱ la kie leekeme.

¹⁷ Mo halima: alota: Ikita: amba: pelememe. Ikita: mo Dodani nane puluma:me lemeeki opua:me leekeme. Koto leeke Diosepeta: hameke tonu telimea pua Dodani pua handa: wiekeme.

¹⁸ Mo hama̱la̱: hama̱la̱:ma:ta: Diosepe papate leke epeekeeki hando haota: a̱i̱ na opolo epeke haena: kone pi lo tonkaasota: lu homaamana:e laa lemekeme. ¹⁹ Ika: ika: kone la alu alu pitolo hata: alota: Hande upa pu hala: some ipula:mee. ²⁰ Ameta: a̱i̱ lu homao ipika: loketa: oni naku ikali hapupapeke ekimanu ma:nda: pa:ta: lu baamana:e. Ipikita: tikene ma:na:yeti sayale ma:nda:ma: lia pa:la:me lomana:e. Kutupa ipika: upama: walea:eki manuta: pilia:eki handomana: loa:me lemekeme.

²¹ Lubenima: mo lemekeeki opu hao Diosepe tamba: muluekema: yeke alota: Na lumana: pipe. ²² Tanda ma:nda: na haleketa: pa do hapekena: ula: naku pa:ta:manu lopamana: pipe leekeme. Lubenima: koto leeke ekita: mo weki pa:ta:la: mea ateke hala: nane paa tapaalueke hone witolo hata: leekeme. ²³ Diosepe mo hameke tonu haemeke alena: opolo epeeketa: mo wekina: ta:ta: ma:nda: piki au leke kosa: dau hokulupeke titipula: mea baemekeme. ²⁴ Kutupa mo weki meata: mo ikali na pitieke naku pa:ta: mea baemekeme.

²⁵ Koto hoki nane ikita: ne nalo pitina:ta: koto kone mo Isima:elo tapake haliweki Kilia:de hao Idiepi nane yapemeeki handemekeme. Ika: kemelo manuta: mo ne tende peaasa: alemanu make totopo piki ti pankekemanu make mu wia yapemekeme. ²⁶ Diudama: ipika: hameke tonu pa:ta: alota: Mo nika: kame lia a:mbaoma:ka:na:ta: aleke ota: handa: uluma:pe. ²⁷ Pao. Do Isima:elo tapakema: hambena: tapaamana:e. Kutu puma:ka:na:ta: kota: ipiki na hoeyaalumeke. Pa ekipeke ipikita: nika: kame make homeke loke we konee leekeme. Koto leeke ipika: hameke tonuma:ta: a:pa:la:me lemekeme. ²⁸ Kutupa mo Midianina: ala:ta: ala:ta: tapao hala: haliweki epemeketa: mo hama̱la̱: hama̱la̱:ma: Diosepe oni naku pa:ta: yola: mea mo Isima:elo tapake pa:ta: 20 silipa manima: mea tapaemeke handaa mo haliwekima:ta: hatuku Idiepi nane pemekeme.

²⁹ Kutupa Lubenita: oni naku pa:ta: a:pa handeeke pate Diosepe na pitiekeeki hando haota: a:ta: pitolo hata: ipika: aka:manu sinki piekeme. ³⁰ Ipikita: ipika: hameke tonu pa:ta: pua alota: Mo wekita: hande naku pa:ta: na pila:ma: I̱ma:ta: eki pulua:pe leekeme.

³¹ Koto ekina: mo hameke tonuma: nanikosi ma:nda: lia Diosepena: hokulupeke kosa: dauta: oni ma:na: we kita kita pimikime. ³² Kutupa mo dauta: ateke pa:ta: mea pua alota: Do dauta: handa: uma:mee. Naka: wekina: eki ya:ka:ta:pe laa lota: pimikime.

³³ Mo atekema: eiyekena: eki ya:ka:ta:me laa handa: u hao alota: Aowe. Ipika: ekie. Mandane tikene ma:na:yeti sayalema: lia pia:ka:ta:me. Yaka weki Diosepeta: sinki sinki pea wia pia:ka:ta:me leekeme. ³⁴ Koto ekina: Dieikopema:ta: a:ta:ma: homolo hata: ipika: aka:manu sinkipa busa: pitikimanu yameekeme. Ipikana:ma:ta: nate hokuluna: eiyeke homa: wia pitu hayekeme. ³⁵ Kutu pieke ipika: eiyeke tonuma: make waneke tonuma: make atekena: puki epealo epemekepate pa mo ipiki epeaasa: ekita: kiaaso hata: alota: Oni homo hala: kenke pa:ta: pulu maketa: yaka wekina: homa: pa upaleke polueke leekeme. Koto ekina: eiyeke Diosepena: homa: pa utia peekeme.

³⁶ Kutu pitolo haena:ta: mo Midiani tapakema:ta: oni Idiepi pua Diosepeta: mo kinina: da handeteke haena: leeke you some ma:nda: Podipama: hambena: tapaemekeme.