¹ Koto waleeke mana: pimanu paeyaaso hata: Yesuma: ipika: *disaipolo tonu pa:ta: alota: ² Ika: hone wilimi tupa: nate homeke hao ma:nda:na:ta: mo hande *Lombei Pupa Yapeeke Nate ipilieke. Koto natena:ta: haliwekima: mo Wanda:halina: Eiyeketa: a:ka:tei wape piki tina: endiao lina: halimikie leekeme.

³ Koto pita: kone mo *Pa:tisi haliweki pita: mo you haliweki paeyaoma: mo *yeni peao hayeke you hali Kaiya:pasina: da tieke pa:ta: a:pa momba:la pitaa ⁴ ikana:ma: a:mbao Yesu da:ka:pa: mina homena: luluekema: hone amba: pambao wimikime. ⁵ Koto pea ikana:ma: alota: Mo ne pambaaso haena:ta: dia:me. Wanda:halima: niki pa:ta: mineke pankaapa:na: lemekeme.

⁶ Yesuma: Bedani da puaata: kindi yeni hayeke hali Saimonona: da pa:ta: ⁷ ne nalo pitina: wanda: ma:nda:ma: mo homima: handeke *a:la:ba:seta: toopi kanake homeke mea epeekeme. Mo kanake pa:ta:ta: senisi totopo pikieki seliapo pambeekeme. Koto senisita: yenki tieke alee. Ipikana:ma: mo senisita: Yesuna: youna: holaeyekeme. ⁸ Kutu piekeeki mo hande disaipolo tonuma: handolo hata: ika: ika: kone alota: Ekipeke do yenki tieke aleta: pa hoeyaaso pila:pe laa mineke pankemekeme. ⁹ Koto ekina: ikana:ma: alota: Do senisita: wanda:halima: hambena: tapaeya:ka:na: yoluta: kota: mani tieke mea mo natehali wanda:hali wopu tamba: mulu puma:me laa lemekeme.

¹⁰ Koto leme pi Yesuma: amba: handaa iki pa:ta: alota: Koto wanda: pa:ta: pi na leke mina:pa:lape. Pa ekipeke ipiki ka:nda:ma: homaasemepe. Ipikana:ma: I̱ pa:ta: epeke hau seliapo pia:me. ¹¹ Natehali wanda:halita: nate paeyao iki ame̱le̱ hao halimikie. I̱ta: iki ame̱le̱ hoto paeyao na hao halueke. ¹² Hande senisi ya lokena: holaeya: ekita: I̱ hoilu pia: ekina: pota: amba:la epeaeya:me. ¹³ Kutupa I̱ma: iki pa:ta: ota: pi alome. Kenke paeyao pa:ta: Pi Seliapo wala:tiki pimika:na:ta: kota: do wanda:ma: I̱ pa:ta: pia: ekita: ipiki pa:ta: hone wina:yeke wala:tiki pilimikie alome leekeme.

¹⁴ Isekatioti hali Diudasima: mo hande 12 disaipolo hayeke halima: kone mo yeni peao hayeke you haliweki pa:ta: pua ¹⁵ honke alo alota: Ikana:ma: Yesu minuemena:yeke pota: walowa:ka:na:ta: I̱ pa:ta: aleke kilimikipe laa leekeme. Koto leeke ikana:ma: toopi yata:pa *silipa mani 30 ipiki pa:ta: halemekeme. ¹⁶ Ipikana:ma: koto hoki naneta: Yesu a̱i̱ minina:yeke lapeke waleke epekemanu ma:nda: weiyekeme.

¹⁷ Mo Na Pombeiyaake Palaowa Ne Pambaeya: pita: titina: natena: Yesuna: hoki nane tolu haemeke haliwekima: ipiki pa:ta: alota: Mo Lombei Pupa Yapeeke Nate hone uelena:yeke ne pambaluma:eki noelena:yeke da hando pa:ta: pua wamo peamonope lemekeme. ¹⁸ Ipikana:ma: ika: pi hombo peaaso hata: alota: Ikana:ma: handeleme daoni tukiki pa:ta: hala: some ma:nda: pa:ta: pua dupa lapa:peke Hande Wala:la: halima: alota: Ya nateta: teke pa:ta: opolo a:pa:la:me. Ya disaipolo haliweki nikana:ma: naka: da pa:ta: mo Lombei Pupa Yapeeke ne pambulumeke lea:ma: lapa:peke leekeme. ¹⁹ Mo disaipolo haliwekima: Yesuma: leeke tupa: mo ne pamba:pekeeki tikitiki yao ana:lao wimikime.

²⁰ Nate pambolo peeke handaata: Yesu make ipika: hoki nane telimiki 12 haliweki make mo ne noluekema: pua momba:la pitimikime. ²¹ Koto ne nalo pita: Yesuma: iki pa:ta: do tupa: leekeme. I̱ma: ota: pi alome. Do I̱ ame̱le̱ mandake piluma: some homeke ma:nda: ipikana:ma: I̱ lina:yeke a:nda: lombilieke laa leekeme. ²² Koto leeke handaa ikana:ma: ka:nda:ma: homolo hata: ma:nda: ma:nda:ma: ipiki pa:ta: alota: Tekehalio. Nakana:ma: koto le pita: I̱ pa:ta: na alo pima:e ota: alome laa paeyaoma: lota: puma: puma: pimikime. ²³ Yesuma: ika: pi hombo peaaso alota: Mo palaowa tenke laasopa: disi pa:ta: dika: kiki mandake witolopa: somema: I̱ lina: a:nda: lombilieke. ²⁴ Koto pa:la:pate mo *Wanda:halina: Eiyeke pa:ta: *Baibolona: wape pa:la: tupa: homilia:pate pa Wanda:halina: Eiyeke mina:yeke a:nda: lomba:la: halita: ota: a:ta: tiekee. Koto halita: na mendia:ka:na: yoluta: epolo pia:me leekeme. ²⁵ Kutupa mo a:nda: lombeke hali Diudasima: Yesu pa:ta: alota: Wala:la: halio. Nakana:ma: le pita: I̱ pa:ta: lepe leeke Yesuma: hombo peaaso alota: Koto aletaa leekeme.

²⁶ Ne nalo pitina: Yesuma: Palaowa mea Koda: pa:ta: Keiyae laa pindi pindi pea iki pa:ta: hale hale pitolo alota: Mea nape. Dota: ya loke mindikie leekeme. ²⁷ Kutupa kapo homeke mea Keiyae laaka:na: iki pa:ta: hale hale piekeme. Iki paeyaoma: do kapona: napee laata: ²⁸ ipikana:ma: iki pa:ta: alota: Panake pi la: uluekema: yaka we doe. Wanda:halina: hoke hau paeyaena: loluekema: yaka we lopilieke laa ²⁹ iki pa:ta: ota: pi alome. Do naloma: waini ikali I̱ta: paata: na neke hao wetepena: ya Apa:na: *Kilu Tombuao Hala:eki pa:ta: iki ame̱le̱ hata: panakeeki nolumeke leekeme.

³⁰ Kutaata: ikana:ma: emeli ma:nda: laata: mo Olipi Pote pa:ta: pemekeme.

³¹ Kutupa Yesuma: iki pa:ta: alota: Ame do timba kone iki paeyaoma: I̱ mina:pa:lao pindipa pelimikie. Pa ekipeke mo Baibolo bukana: wape pa:la: pita: do tupa: la:la:me.

³⁶ Yesuma: ipika: hoki nane tolu haemeke haliweki ame̱le̱ e ma:nda: pa:ta: opolo pemekeme. Mo ena: bikita: Kesema:nie. Koto pa:ta: hata: iki pa:ta: alota: I̱ta: yeni puluekema: mo pate leke puluma: ikita: do pa:ta: hando pita:pa:peke leekeme. ³⁷ Koto laata: ipikana:ma: Pida make Sepedina: eiyeke yaapo iki tepo hoeya: nane hatuku peekeme. Kutu polo hata:ta: ipika: pukima: tanda tieke minolo hata: ka:nda: tiekema: homeekeme. ³⁸ Kutupa ipikana:ma: iki pa:ta: alota: I̱ta: yaka pukima: ka:nda:ma: wopu homolo ekima: homeke nonopea halome. Koto ekina: ikita: do pa:ta: I̱ ame̱le̱ mandakena: hata: yu wia handeteke hapa:peke leekeme. ³⁹ Hosiki mo pate leke puaata: kenkena: puki yama peliniaaso dupiki yeni piekeme. Ya Apa:o. Nakana:ma: pea:peke ya:ka:na:ta: kota: do ipula: ka:nda: tieke wopu tumbiki kapota: I̱ pa:ta: na epena: leke yoka: muelena:e laa hone pa:la:pate ya hone pa:la:eki dia:me. Pa naka: hone pa:la:eki homekee leekeme. ⁴⁰ Kutupata: Yesuma: paa la:ka:la ipulu handeekepate mo hali tepoma: u pelimikieki handolo hata: mo Saimono pa:ta: alota: Pa ekipeke handaa iki tepoma: do nate leke homeke pa:ta: I̱ ame̱le̱ mandakena: yu wia handeteke hapa:peke na yea:pe. ⁴¹ Handeteke hata: yeni pu hapa:peke. La handa:la:eki a:paama:na: loa:me. Ika: pukima: hone pa:la:pate ika: loke mindikima:ta: soka:la:ma: homaa ada: ada: pea witelememe leekeme. ⁴² Koto laata: Yesuma: hoto yaapo peao paa pua yeni pitolo hata: alota: Ya Apa:o. Do ka:nda:ma: tumbiki kapo ipula:eki a:nda: na yoka: mea baeka:na: ota: nono lea:ka:na:ta: kota: a:pa:la:ma: naka: hone peleeki pea:peke leekeme. ⁴³ Koto yeni pu paeyeke paa la:ka:la ipulu hata: mo haliweki handeekepate pa u̱ pelimikieki handeekeme. Kutu piki hauta: ota: ika: leke pa:ta: u̱ pambolo hata: piekeme. ⁴⁴ Kutupa Yesuma: paa pua hoto tepo peao yeni pua pitolo hata:ta: mo hande amba: yeni pitolo leeke pimanu kone leekeme. ⁴⁵ Kutupiki yeni pea paeyeke ipika: *disaipolo haliweki pa:ta: paa la:ka:la a:pa alota: Ikita: hoto pita: u̱ polu pita: pimipe. A:e handepe. A:nda: lomba:la: halima: Wanda:halina: Eiyeketa: mo hoke hau pu haleme haliwekima: minina: ala:me. ⁴⁶ Pomana: tiaape. Hande I̱ minina: a:nda: lomba:la: halita: koto ipula: handa:e leekeme.

⁴⁷ Yesuma: koto pimanu alo haena: kone mo hande 12 haliweki ame̱le̱ hayeke hali Diudasita: ipiki pa:ta: epeekeme. Mo *yeni peao haemeke you haliweki pita: tondiki haliweki yaapoma: tapaemeke haliweki wopuma: Diudasi ame̱le̱ kepete tieke make dolo tieke make mea miniki epemekeme. ⁴⁸ Mo Yesu minina: a:nda: lombeeke halima: mo haliweki pa:ta: lomba: witolo alota: I̱ma: pua nunu pulua: someta: kota: koto some mina:pa:peke leekeme. ⁴⁹ Amba: koto laa wieke tupa: ipikana:ma: tikitiki a̱i̱ koto kone Yesu teke pa:ta: opolo ipulu alota: Wala:la: halio. Neketa: epeke timba nane laata: ipiki hopula: mea nunu piekeme. ⁵⁰ Kutupa Yesuma: ipika: pi hombo peaaso alota: Someo. Mo naka: puluekema: epele hauta: a̱i̱ koto kone pie leekeme. Koto leeketa: mo Yesu minuluekema: epemeke haliwekima: a:pa ipiki da̱o̱la miniki haemekeme. ⁵¹ Kutu pimiki handaata: mo Yesu ame̱le̱ haemeke hali homekema: ipika: a:nda: kepete poneke hokulu yola: mea mo yeni peao hayeke you halina: pa hameke e pokao hayeke hali pokeekepate pa ipika: katake homeke tunkula: poka lopaeyekeme. ⁵² Kutu pieke ekina: Yesuma: ipiki pa:ta: alota: Mo naka: a:nda: kepete hokuluta: pao mea dake pa:ta: panka:niae. Pa ekipeke. Kepetema: iki tamba: mina:e laa wia hao haleme wanda:halita: ika: kone mo kepetema: lia homaalieke. ⁵³ Ya Apa:ma: tamba: mina: wi lolo polo ekita: hone na witelepe. Koto hau a:nda: pua:ka:na:ta: kota: ipikana:ma: I̱ tamba: muluekema: ipika: a:nda: peaasa: enisolo ami tapake 12 haka:ta:pao koto kone tapalo pa:la:me. ⁵⁴ Wi lolo pua:peke ya:la:pate kutu pua:ka:na:ta: kota: pa mo amba: Baiboloma: pilieke laa la: ula: haumanu ekipa yaaliepe leekeme.

⁵⁵ Kutaata: Yesuma: mo ipiki minuluekema: epemeke haliweki pa:ta: alota: Ika: honema: I̱ta: pi ula:eki na opiki nono pea a:nda: lita:la: hali patema: do kepete tieke dolo make miniki a:pa pimipe. Nate wopu I̱ma:ta: *tembolo da tukiki pa:ta: iki ame̱le̱ pi walo haowa:pate ikana:ma: I̱ na da:ka:pa: minimime. ⁵⁶ Pate do ikana:ma: piteme hau manuta: mo hande amba: *potopede haliweki ikana:ma: mo Baibolo tukiki pa:ta: wape pea ula: pimanu peneme yaaluekema: pitememe leekeme.

Koto toma:na:ta: ipika: disaipolo haliweki paeyaoma: Yesu mina:pa:lao kilipa pemekeme.

⁵⁷ Mo Yesu da:ka:pa: miniki haemeke haliwekima: hande yeni peao hayeke you hali Kaiya:pasina: da nane hatuku pemekeme. Koto pa:ta:ta: mo hande *pi ula:eki walolo haemeke haliweki pita: tondiki haliweki peaata: mo da pa:ta: amba: mombela pitimikime. ⁵⁸ Pidama: Yesu telimea peekepateta: ipika: teke pa:ta: na peketa: pa mo hande yeni peao hayeke you halina: da hankepe nane honda:pa: lopa Yesu pa:ta:ta: eki haumanu pilimipe laa handuluekema: mo hande pota: kake handeteke haemeke haliweki ame̱le̱ pitiekeme. ⁵⁹ Mo hande yeni peao hayeke you hali make tondiki haliweki paeyaoma: make Yesu lu homaaluekema: ipika: pa:la: hau doe laa makeaaso hata: ma̱leke lulu peleme haliweki weimikime. ⁶⁰ Kutu pitolo hata: mandane haliwekima: makeaasa: pimanu wopu a:pa lemekepate ipiki lia:peke pota: ma:nda: na handemekeme. Pate wetepena: yaapo hali ma:nda: tiaaso ⁶¹ hata: alota: Do somema:ta: I̱ma: Koda:na: Tembolo da londa:la: mina wiaata: nate tepona: paa a:eya:peke ya:la:me lea: somee lepekeme. ⁶² Kutupa mo hande yeni peao hayeke you halima: tiao Yesu pa:ta: lota: pitolo hata: alota: Do haliwekima: koto neke laaseme ekina:ta: nakana:ma: pi ma:nda: na lelipikipe laa leekeme. ⁶³ Koto leekepate Yesuma: pi na honda: mea leke pa hayekeme. Koto ekina:ta: mo yeni peao hayeke you halima: ipiki pa:ta: alota: Mo deto hala: Koda:na: bikina: hali keke pi alo hata: nakana:ma: niki pa:ta: ota: pi lapeke la alota: Neketa: mo hande Koda:na: Eiyeke *Ketisope a̱i̱ lakie leekeme. ⁶⁴ Yesuma: hombo peaaso alota: Koto aletaa leekeme. I̱ma: iki paeyao pa:ta: alome. Wetepena:ta: mo *Wanda:halina: Eiyeketa: mo wele pita:la: Koda:na: popeke nane kikina: pitilia:eki make hando ya nane koa tukiki pa:ta: hola:pa:niao ipilia:eki make ikana:ma: hando pilimikie leekeme. ⁶⁵ Koto pi opitolo hata:ta: mo yeni peao hayeke you halima: ipika: dau sinkipolo hata: alota: Koda: laasa: pi ala:me. Ekipeke mo la kita:la: haliweki ma:nda: paa muluma:pe. Koda: laasa: pimanu opuma:me. ⁶⁶ Koto ekina:ta: eki hau pulumeke hone witelemepe leekeme. Mo haliweki paeyaoma: alota: Ota: hau tieke pu hoeyaala:ma: lu homaena: lape lemekeme. ⁶⁷ Koto laata: ikana:ma: ipika: leke popeleke pa:ta: dopi talo hata: ipiki yombimikime. Mo ipiki yombimiki haliwekima: ⁶⁸ alota: Neke Ketiso ya:leke handaa do neke lita:la: some hombona: bikimanu lae lemekeme.

⁶⁹ Pida mo hande da hankepe pa:ta: pa pitolo haena: mo yeni peao hayeke you halina: e pokao hayeke wandiki homekema: ipiki pa:ta: a:pa alota: Neke make koto Ka:lili hali Yesu ame̱le̱ pomu haeme hali ya:ka:ta:taa leekeme. ⁷⁰ Koto leeke Pidama: iki paeyaona: leke popelekena: alota: Naka: ale pita: I̱ mata:la:me. Alekena: alepe leekeme. ⁷¹ Koto laata: ipikana:ma: mo pota: kake pa:ta: peekepate wandiki ma:nda:ma: ipiki handaa mo haemeke haliweki pa:ta: alota: Do halita: mo hande Na:sa:tete halina: ta:ma:ni halie laa leekeme. ⁷² Pidama: a:mbaaso hata: ipika: pima: Ota: dia:me la alota: I̱ta: koto some ota: na handolome leekeme. ⁷³ Hosiki hao hoki nanema: mo pa:ta: haemeke haliwekima: Pida pa:ta: alota: Neketa: ota: ipika: tapake halie. Ota: alome. Mo naka: ale pi makema: kone niki pa:ta: peneme yaasa:me lemekeme. ⁷⁴ Koto lemekepate Pidama: alota: Do alo pita: Koda:ma: opitolo haena: alome. Ya pi loa:ka:na:ta: ipikana:ma: I̱ hoeyaena:e. Koto aleme halita: I̱ ota: na handolome leekeme. Koto pi alo haena:ta: koto kone koka:la: tiaeyekeme. ⁷⁵ Kutu pieke toma:na:ta: Pidama:ta: Yesuma: amba: ipiki pa:ta: la: witolo Koka:la: a̱i̱ na tiake haena: nakana:ma: hoto tepo ya biki a:mbao lo hoeyaalipikie leekeeki Pidama: niminaeyekeme. Koto ekima:ta: ipiki hama opolu bao tikene pua hata: ipika: pukima: ka:nda: tieke minolo hata: e̱ tieke leekeme.