¹ Yesuta: mo Dietiko daoni monema: tilao polueke alo oni daoni pa:ta: honda: pambeekeme. ² Koto pa:ta:ta: dakisi mu hayeke hamoko hali ma:nda: Sa:kiasi hayekeme. ³ Ipikita: mo Yesu lo haemeke hali handulueke alo epeekepate doka:tiki yeke ekima: wanda:hali tieke momba:la haemekeeki yaalo hata: Yesu handa:peke ana: na piekeme. ⁴ Koto ekina: ipiki amba:la pototo laa pua nose ti ma:nda: a:meiya pita: Yesu kotoeki mea wendiao yapilia: alena: handulueke hone wiekeme. ⁵ Yesu koto alena: opolo a:pa oli ti nane handa:liaaso Sa:kiasi pa:ta: alota: Neke ota: a̱i̱ hola:pa:e. Pa ekipeke. I̱ta: ameta: naka: da pa:ta: a:pa:peke ya:leke loa:me.

⁶ Sa:kiasi koto kone hola:pa:niaota: Yesu pa:ta: ta:na:ma: homolo hata: handa: miekeme. ⁷ Wanda:hali paeyaoma: Kutu piekeeki hando haota: hambilikima: hambilikima: pitolo alota: Do halita: mo hande hoke hau pa:la: halina: da pa:ta: kimisu pula:me lemekeme. ⁸ Kutu pimikipate Sa:kiasi tiao hata: Tekehali pa:ta: alota: Tekehalio. Opie. I̱ma: yaka ala:ta: ala:ta: tukikina: telipa mandane ekita: mo natehali wanda:hali pa:ta: halueke. Kutupa I̱ma: wanda:hali a:nda: makeao pake a:nda: noa:ka:na:ta: kota: I̱ma:ta: hoto tonkopuna: paka:lao paa hala:tiki pulueke leekeme.

⁹ Yesuma: mo hali pa:ta: alota: Da:ta:la: ekita: ame do da pa:ta: a:pa:la:me. Pa ekipeke do halita: Eipoloha:ma:na: mondu tanka:la: peala: tapake hali yeke loa:me. ¹⁰ *Wanda:halina: Eiyeketa: mo alu pa:la: wanda:hali handa: wia peteluekema: yeke a:pa:la:me leekeme.

¹¹ Wanda:halima: pi opitolo haena: Yesuma: iki pa:ta: onkoluma: pi ma:nda: la haleekeme. Koto wanda:halima: Yesuta: Diutuseleme nane teke pa:ta: polukuma: peeke handaa ikana:ma: ekima: Koda:na: *Kilu Tombuao Hala: ekita: koto kone ipula:me hone wimikime. ¹² Koto ekina: Yesuma: alota: Hali tieke ma:nda:ta: kenke ma:nda: nane pua ipikita: ika: kini hali pituluekema: peekepate kone paa la:ka:la ipuluekema: peekeme. ¹³ Poluekema: hata: ipikana:ma: ipika: e pokao haemeke kiki yaapo haliweki wi la: meaata: iki paeyao pa:ta: 20 kina hale hale pea iki pa:ta: alota: I̱ polua: hoki nane do kitolo manima: bisinisi pea ikana:ma: ekipa haka:ta:pao milimio laa e poka:pa:peke leekeme.

¹⁴ Koto laa peekepate mo hande halina: da haliwekima: ipiki honditi pitolo hata: ipika: peeke hoki nane mandane haliwekima: pua lena: tapaaso alota: Do halita: nika: kini hali pitaapeketa: nikita: ki pa:la:me laa lolo pena: tapaemekeme.

¹⁵ Kutu pimikipate hande halita: kini hali ana:na: pitata: paa ipika: da nane la:ka:la epeekeme. Koto kone ipika: e pokao haena: mani halaa peeke haliweki wi la: mipi peaata: ika: haka:ta:pao mimiki ekita: ekipupe laa handuluekema: piekeme.

¹⁶ Titina: halima: a:pa alota: Tekehalio. Hande 20 kina ki manima:ta: pa mandane 200 kinamanu make haka:ta:pao mealome laa leekeme. ¹⁷ Hande kinima: alota: Epeke tupa: peleme. Neketa: e epeke tupa: pokale halie. Nakana:ma: hosiki e kone epeke tupa: handeteke haeke handa loa:ma: ameta: teke damanu kiki yaapo handeteke halena:yeke kitolome leekeme.

¹⁸ Kutupa ipika: hoki nane epeeke halima: a:pa alota: Tekehalio. Hande 20 kina ki manima: pa mandane 100 kinamanu make haka:ta:pao mealome laa leekeme. ¹⁹ Hande kinima: koto some pa:ta: alota: Nakana:ma: teke damanu kiki homeke handeteke halena:yeke kitolome leekeme.

²⁰ Kutupa koto hoki nane e pokao hayeke hali ma:nda: a:pa alota: Tekehalio. Hande naka: 20 kina doe. I̱ma:ta: dau siki pa:ta: panka: ua:me. ²¹ Neketa: taka:lake hali hale ekina: I̱ma: paala:ma: homoa:me. Pa ekipeke. Nakana:ma: na nokopekeeki kone mondu no hale make na tandelekeeki kone tulu no haleme leekeme.

²² Hande kinima: mo halina: pi hombo peaaso alota: Neketa: hoke e pokao hale halie. Naka: ale pima: kone naka: hoke hau peleeki peneme yaalueke. Naka: honema:ta: I̱ta: taka:lake hali haloma: hone ta wika:ta:me. I̱ma: na nokopekeeki no halo make na tandelekeeki tulu no halome hone witele yekea. ²³ Kota: a:pa:la:me. Yaka manita: ba:nka: pa:ta: wia wetepena: haka:ta:pao muluekema: ekipeke na wiaepe. Kutu pika:na: yoluta: wetepena: I̱ ipulua: dina:ta: I̱ma:ta: handeeki make haka:ta:pao wilieeki apa:tao mulu pua:me leekeme. ²⁴ Kotoeki laa ipikana:ma: koto pa:ta: haemeke haliweki pa:ta: alota: Do halina: 20 kina meaata: hande 200 kina wia hala: e pokaasa: hali pa:ta: hala:pe laa leekeme.

²⁵ Mo haliwekima: ipiki pa:ta: alota: Tekehalio. Pa ekipeke. Mo halita: 200 kina amba: wia hala:me lemekeme. ²⁶ Mo kini halima: ika: pi hombo peaaso alota: Iki pa:ta: ota: pi alome. Amba: wia hala: halima:ta: mandaneeki make haka:ta:pao milieke. Koto pa:la:pate na wia hala: halima:ta: ipika: wia hala:eki siki kone yoka: milieke. ²⁷ Kutupa ameta: hande I̱ta: ika: kini hamena: kiaemeke a:nda: tunkuliki haliweki ikita: hatuku a:pa yaka leke popelekena: hata: lia:pa:peke laa leekeme leekeme.

²⁸ Yesuma: koto pimanu laata: ipiki amba:la titina: mo wanda:hali mea wetepe yao mo Diutuseleme da teke pa:ta: peekeme. ^29-30 Kutupa ipikita: oli Olipi peiyene tea:na: hayeke Betepeisi make Bedani da yaapo pa:ta: opolo a:paata: ipika: *disaipolo hali yaapo amba:la tapaaluekema: hata:ta: dupa leekeme. Oni hala: da nane opolo pua:pa:peke. Koto pa:ta: opolo pepeka:na:ta: donki ikiki hali ma:na: endi bala:eki handilipipikie. Mo donkita: ota: homeke a:nda: na pita pomu halemeekie. Hola: tapao mea a:pa:peke. ³¹ Kutu pipikina: ma:nda:ma: ipiliki lota: pia:ka:na:ta: kota: ipilikana:ma: alota: Tekehalima: muluekema: hone pa:la:me lapa:peke leekeme.

³² Kutupa mo hande hali yaapo pua Yesuma: leeke tupa: kone ota: pua handepepekeme. ³³ Mo hande donki ikiki hali ma:na:siki hololo haena:ta: mo teke haliwekima: alota: Ekipeke hola: mina:lepepe lemeke handaa mo hali yaapoma: hombo peaaso alota: ³⁴ Tekehalima: muluekema: hone pa:la:me lepekeme. ³⁵ Kutupa mo hande hali yaapoma: mo donki ikiki hali ma:na:ta: Yesu pa:ta: mea pepekeme. Kutupa mo disaipolo haliwekima: ika: daumanu mo donkina: hoki manda wiata: Yesu pitulu a:meina: tamba: mimikime.

³⁶ Yesuma: mo ma:na: hokina: pita ipulu haena:ta: wanda:halima: ika: daumanu lepolona: peolao yamoma: yamoma: pimikime. ³⁷ Kutupa ipiki mo Diutuseleme teke pa:ta: opolo poluekema: yeke mo Olipi pote tea: nane u niayeke pota:na: hola:pa pulu haena: mo ipika: hoki nane telimea pemeke wanda:hali aneke hapuma: kini pea Koda: pa:ta: Keiyae laata: ipika: biki anekema: mea mina:liaemekeme. Pa ekipeke Yesuma: hau tieke tieke ma:nda: ma:nda: pieke ekimanu ota: aneke hapu handemekeme.

³⁸ Mo wanda:halima: la:tia pulu alota: Mo Tekehalina: bikina: ipula: kini halita: Koda:ma: epeaena:e. Hepeni nane haleme tapakema: a:nda: peliaaso hata: Koda:na: biki tieke miniliaena:e la:tia pemekeme. ³⁹ Koto lemeke handaa koto wanda:hali anka:lopuna: haemeke *Pa:tisi haliwekima: Yesu pa:ta: alota: Disao. Naka: disaipolo haliweki pa:ta: Kutupiki pi na lapepe laa lae lemekeme. ⁴⁰ Yesuma: ika: pi hombo peaaso hata: alota: I̱ma: iki pa:ta: Pi na lapa:pee loa:ka:na:ta: kota: do toopimanu ika: kone e̱ alo hata: poya: tieke lelimikie leekeme.

⁴¹ Yesu mo Diutuseleme da teke pa:ta: opolo a:pa mo da handolo hata:ta: e̱ alo alota: ⁴² Nakana:ma: ame a:nda: peliaasa:eki muluekema: pea:pekeeki hone witolo yoluta: epolo pia:me. Koto pa:la:pate ameta: nakana:ma: ana:na: handa:peke na ya:la:me. ⁴³ Nate ma:nda: a:nda:na:ta: naka: a:nda: tunkuliki haliweki a:pa a:nda: pape tieke tieke hopa:liao pokaata: naka: pota: poka:niao pitilimikie. A:nda: puluekema:ta: mandane mandane a:pa dupalimikie. ⁴⁴ Ikana:ma: neke make naka: pape tukiki pa:ta: haleme wanda:hali paeyaota: ota: lia paeyaalimikie. Kutupa naka: toopi ma:nda: ipika: ula: alena: ota: na wina: lelimikie. Pa ekipeketa: nakana:ma: Koda:ma: neke peteluekema: peneme yao epena: lea: nate leketa: na handa: wima:e leekeme.

⁴⁵ Kutupa Yesuma: mo tembolo da pa:ta: honda: pamba pua ne anemone alemanu tapaaso pitimiki haliweki tolu litolo alota: ⁴⁶ Mo *Baibolona: wape pea ula: pita: Koda:ma: alota: Yaka data: wanda:halima: yeni pea:tiki pulu pa:la: dae lolo pa:la:pate ikana:ma:ta: mo pake no hala: haliwekina: a:mbalo peleme da haena: alememe leekeme.

⁴⁷ Kutupa hoto paeyao Yesuma: mo tembolo da pa:ta: pi wala:tiki pu hayekeme. Pate mo hande *yeni peao haemeke haliwekina: you haliwekima: make pi ula:eki walo haemeke haliwekima: make mo wanda:halina: you haliwekima: make Yesu luekema: hone wimikime. ⁴⁸ Kutu pimikipate ikana:ma: pota: ma:nda: na handa: wimikime. Pa ekipeke. Wanda:hali paeyaoma: ipika: pi pa oputia pulu hata: ipika: pi ma:nda: hosiki siki make mina:pa:laluekema: na taapemekeme.