¹ Yesuma: koto pimanu laata: oli ya nane handa:liao hata: alota: Apa:o. Hande di amba: epa:la:me. Naka: wekima: naka: bikita: mea a:meiyaena:yeke naka: wekina: biki nakana:ma: mea a:meiyapeke. ² Nakana:ma: ipikita: wanda:hali paeyaona: you haena: laata: Nakana:ma: ipiki pa:ta: halo pele wanda:hali paeyaota: ipikana:ma: da:tao hao haena:yeke lele ekina: loa:me. ³ Deto hala: ekita: dupae. Neke homeke ota: Koda: haleeki make nakana:ma: tapaale hali Yesu *Ketiso hala:eki make telipina: handa:la:ekie. ⁴ Neke tieke haleeki do kenkena: hata: walaata: kutupa nakana:ma: wale e make poko paeyaowa:me. ⁵ Apa:o. Amba: do kenke a̱i̱ na wepiki hata: neke yaapo hata: mua: pa̱a̱ piki kapu tieketa: kotoeki kone ameta: naka: leke popelekena: hano kie.

⁶ Nakana:ma: do kenke pa:ta: mea ki haliweki pa:ta: neke haleeki peneme yaowa:me. Koto haliwekita: naka: eki haena: I̱ pa:ta: mea kime. Kutupa naka: pi make opimime. ⁷ Nakana:ma: I̱ pa:ta: ki alemanu paeyaota: neke pa:ta: kone mua: ekita: ame handelememe. ⁸ Nakana:ma: I̱ pa:ta: la ki pimanu paeya: tapao iki pa:ta: waloa:me. Kutu pua:peke handaa ikana:ma: opua mimime. I̱ta: neke yaapo epoloeki make ota:ekie laa nakana:ma: I̱ tapaeeki make opitelememe.

⁹ Do haliweki pa:ta: hone witolo hata: yeni pitolome. Kenke wanda:hali pa:ta: hone witolo hata: yeni na piki nakana:ma: I̱ pa:ta: ki haliwekita: naka:eki kone koto haliweki pa:ta: hone witolo hata: yeni pitolome. ¹⁰ Yaka wia halo alemanu paeyaota: naka: ekie. Kutupa naka: wia hale alemanu paeyao make yaka ekie. Koto pa:la: ekina: koto haliwekima: yaka biki mea a:meiyalememe. ¹¹ Ameta: I̱ta: do kenkena: pa na hake neke pa:ta: epolo polopate do haliwekita: do kenkena: pa ha pelia halimikie. Yako piki Apa:o. Nakana:ma: I̱ pa:ta: ki bikita: koto bikina: welema: iki handeteke haena: lapeke. Dikita: homeke kone halopa: tupa: iki make homeke tupa: haena:yeke loa:me. ¹² I̱ta: do haliweki ame̱le̱ hata:ta: nakana:ma: I̱ pa:ta: ki bikita: koto bikina: welema: kone iki wotu handeteke haowa:me. I̱ma: iki handeteke haowa: pita:ta: hali ma:nda: na alu pia:pate pa mo Baibolo buka pa:ta: wape pa:la:eki yaena:yeke hande alu pulu pa:la: hali homekee. ¹³ Ameta: neke pa:ta: epolo polopate do kenkena: hata:ta: I̱ma: do haliwekima: yaka ta:na: pa:la:eki mea tumbao haena:yeke do pimanu alome. ¹⁴ Naka: pita: I̱ma: iki pa:ta: amba: la haloa:me. Koto polo ekina: do kenke wanda:halima:ta: iki pa:ta: honditi pu halememe. I̱ta: do kenkena:eki na halo tupa: koto haliweki make do kenkena:eki na haleme ekina: pitelememe. ¹⁵ I̱ma: do honke alo ekita: do haliweki kenke pa:ta: na haena: yoka: muelena: laa na loa:pateta: hande Hoke Halima: iki hoeyaama:na: nakana:ma: handeteke halena:yeke honke alome. ¹⁶ I̱ta: do kenkena:eki na halo tupa: iki make do kenkena:eki na halememe. ¹⁷ Nakana:ma: naka: ota: pi lele ekima: do haliwekita: yakopiki haliweki haena: lapeke. Naka: pita: ota: ekie. ¹⁸ Nakana:ma: I̱ do kenkena: tapae tupa:ta: I̱ma: do haliweki kenke ta:ta: ta:ta: pa:ta: tapaowa:me. ¹⁹ I̱ma: do haliweki pa:ta: hone witolo hata: I̱ ya kone neke pa:ta: kitolome. Kutupa do haliweki make ota: naka:eki haena:yeke pitolome.

²⁰ I̱ma: do haliweki homeke pa:ta: hone witolo hata: yeni na piki ika: pua walo pelemeeki opua I̱ pa:ta: hone tulao halo peleme wanda:hali pa:ta: make hone witolo hata: yeni pitolome. ²¹ Paeyaota: homekeeki haena:yeke yeni pitolome. Apa:o. Neketa: I̱ yaapo haleeki make I̱ neke yaapo haloeki make iki make koto tupa: diki ame̱le̱ haemeka:na:ta: epelieke. Kenke wanda:halima: nakana:ma: I̱ tapaaleeki hone wina:yeke ikita: homekeeki haemeka:na:ta: epelieke. ²² Nakana:ma: I̱ pa:ta: hande ki biki tieketa: I̱ma: iki pa:ta: haloa:me. Diki homeke kone halopa: tupa: iki make homekeeki haena:yeke pua:me. ²³ I̱ta: iki pa:ta: haloeki make neketa: I̱ pa:ta: haleeki make ikita: ota: homekeeki haena:yeke loa:me. Kenke wanda:halima:ta: nakana:ma: I̱ tapaaleeki make I̱ pa:ta: pukima: homele tupa: do haliweki pa:ta: koto homeke pukima: homeleeki make hone wina:yeke loa:me.

²⁴ Apa:o. Do haliwekita: nakana:ma: I̱ pa:ta: keleme. Koto pele ekina: I̱ halo alena: iki make koto pa:ta: haena: yaka pa̱a̱ piki biki tieke moloeki handena:yeke I̱ma: hone pa:la:me. Koto biki tieketa: nakana:ma: keleekie. Do kenke a̱i̱ na wepieke dina: kone I̱ pa:ta: pukima: homele ekina: keleme. ²⁵ Tiki tiki piki Apa:o. Kenke wanda:halima: neke na handelemepate I̱ma:ta: neke handolome. Kutupa do haliwekima:ta: nakana:ma: I̱ tapaale ekita: handelememe. ²⁶ Naka: hale ekita: I̱ma: iki pa:ta: waloa:pate pa wala:tiki pulueke. Nakana:ma: I̱ pa:ta: pukima: homele ekita: iki pa:ta: make pitina:yeke kutupa I̱ make iki pa:ta: hanoyeke pulueke.