¹ Soloma: wese wese alo hata: mo Tekehalina: *disaipolo wanda:hali tolu lutia pomiekeme. ² Kutu putia mo *yeni peao haemeke you haliwekina: you hali pa:ta: pua alota: Mo Damasikasi nane pi hotu haleme damanu pa:ta: do hande panake hau piteleme wanda:hali dipula mea Diutuseleme nane mea ipuluekema: loa:ma: pase kie laa pua honke leekeme. ³ Solota: Damasikasi nane polueke laa pota:na: pulu haena: oli ya nanema: pa̱a̱ tieke a:pa mo some dupao a:pa to hopa:liaeyekeme. ⁴ Kutupa mo some kenkena: honda:pa topopi lopolo hata: ho̱la̱:make opiekepate alota: Soloo. Soloo. Ekipeke I̱ yaapo a:nda: litelepe leekeme. ⁵ Kutupa Soloma: alota: Tekehalio. Neketa: epiya:ka:ta:pe leekeme. Mo hande pi ho̱la̱:makema: alota: I̱ta: Yesue. Nakana:ma: I̱ yaapo a:nda: liteleke handa loa:me leekeme. ⁶ Tiao oni da nane naka: pulu peleeki loluekema: pue leekeme.

⁷ Kutupa mo Solo ame̱le̱ epemeke haliweki ota: nunu nunu pisiki make ota: na leke hata: mo leeke pi homeke opiekepate ma:nda: a:nda: na handemekeme. ⁸ Solo oni kenke mina:pa:lao tiao ipika: leketa: ki leekepate ota: ala:ta: ma:nda: na handeeke handa hali mandane hatiki mandane hatiki pea hatuku oni Damasikasi da pa:ta: pemekeme. ⁹ Kutupa Solota: ikali ne make na neke ala:ta: ala:ta: make na handeke hoto tepo oni Damasikasi da pa:ta: wiekeme.

¹⁰ Kutupa oni Damasikasi Ketiso hali ma:nda: bikita: A:na:naisi hayekeme. Tekehalima: upama: alota: A:na:naisio. Kutupa A:na:naisima: alota: Tekehalio. I̱ta: do pilume leekeme. ¹¹ Kutupa Tekehalima: alota: Tiao. Oni pota: bikita: Tikitikipiki pota: yola: mea pua Diudasina: da pa:ta: pua Tasa:si hali Solota: hando pa:ta: pila:pe laa lota: pia:pekee. Ipikita: yeni koto pitolo pila: handa:e leekeme. ¹² Kutupa ipikana:ma: hali ma:nda: biki A:na:naisi a:pa ipika: kiki yaka youna: a:pa wia:ka:na: ya leke ki leliekee laa amba: handea:me leekeme. ¹³ A:na:naisima: alota: Tekehalio. Do halita: naka: Diutuseleme wanda:hali pa:ta: tanda tanda hala:la:eki ma:nda: ma:nda:ma: a:pa la:tiki pu haleke opu halome leekeme. ¹⁴ Kutupa ipikana:ma: mo yeni peao haleme teke haliweki pa:ta: pase mea wia hata: do naka: bikina: pi milie Damasikasi wanda:hali pa:ta: tanda tanda halolo pita:la:me leekeme.

¹⁵ Koto leekepate Tekehalima: alota: Pue. Do halita: yaka amba: molo halima: pa:la:me leekeme. Yaka bikita: *Diendaili wanda:halima: make kini haliwekima: make Isulai wanda:halima: make opina: pua:ma: pue leekeme. ¹⁶ I̱ma: yaka hauna: tanda pa:la:eki mina: la waluekema: pue leekeme.

¹⁷ Koto ekina: A:na:naisi pua da pa:ta: opolo peekeme. Kutupa ipika: kiki Solona: youna: pua witolo hata: alota: Solo ya kameo. Tekehali Yesu mo pota:na: ipulu halena: epeeke hande Yesuma: naka: leke paa kilao Holi Sipitidima: tumba halena: yeke I̱ tapaeya:me leekeme. ¹⁸ Kutupa koto kone mo ta:peli o̱ma: handeke ale manuma: leke tombuao hao londa:la:pa lopeke nono piekeme. Kutupa ipika: leke paa ki leekeme. Kutupa koto kone tiao pua bapitaisi piekeme. ¹⁹ Kutupa ne tamba: mea nolo yapeeke dina:ta: ipika: honkopu paa hao epeekeme.

Solota: Damasikasi da hao hala: Ketiso haliweki ame̱le̱ hosiki hayekeme. ²⁰ Ipikana:ma: koto kone Yesu Ketisona: pi mo pi hotu haemeke da pa:ta: walolo hata: alota: Yesuta: Koda:na: Eiyekee leekeme. ²¹ Mo opimiki haliwekita: leke wopu opa: alu alu pimikime. Kutupa alota: Do hali dia:ya:ka:ta:pe. Mo hande Diutuseleme da pa:ta: hande some Yesuna: biki laa yeni pimi wanda:hali tanda tanda halea: hali dia:ya:ka:ta:pe. Aowe. Ipikita: do epa:la: ekita: mo kutupiki wanda:hali mea tonkao hatuku mo yeni peao haleme teke haliweki pa:ta: mea poluekema: a:pa pa:la:me lemekeme. ²² Kutu piekepate Soloma:ta: pi waluekema: wele wopu piekeme. Ipikana:ma: Yesuta: ota: Koda:na: Ketisoe laa ota: ana:na: peneme yao waleeke mandane pi manuta: mo Damasikasi da haleme Diu haliwekima: pi homeke ma:nda:ma: hombo pealuekema: ana: na pimikime.

²³ Hosiki hao hao pea wetepena: mo haliwekima: Solo luekema: tome tome pambemekepate mo hande lemeke ekita: Soloma: amba: opiekeme. ²⁴ Mo haliwekima: mo pota: kake pa:ta: timba andusa: andusa: make pa̱a̱na: make haemekeme. ²⁵ Kutu pimikipate disaipolo haliwekima: mo peiyekeeki mea ankulao Solota: basekedena: pitina: laata: mea lopa:niaemekeme.

²⁶ Mo Diutuseleme da nane opolo a:pa mo disaipolo wanda:hali ame̱le̱ apa:tao haluekema: piekepate mo Ketiso haliwekima:ta: Ipikita: disaipolo hali dia:me hone witolo hata: paala:ma: homemekeme. ²⁷ Kutupa Banabasima: Solota: mo *aposolo haliweki pa:ta: hatuku pua mo Tekehalima: pota:na: Solo pa:ta: peneme yaeya:eki make pi leekeeki make la haleekeme. Kutupa oli Damasikasi da hata: Soloma: Yesuna: biki a:mbao na leke pi waleekeeki make mo haliweki pa:ta: la haleekeme. ²⁸ Koto ekina: mo haliweki ame̱le̱ hata: da pa:ta: honda: pamba:tiki opolu batiki piekeme. ²⁹ Solota: mo wanda:hali paala:ma: na homeke mo Tekehalina: biki laa pi wala:tiki piekeme. Kutupa pi pi la:tiki pitolo hata: mo Kitiki pi lo haemeke Diu wanda:hali ame̱le̱ make pi la alu alu pua:tiki pomiekepate mo wanda:halima:ta: Solo lu pie hone wimikime. ³⁰ Mo hameke titima: kotoeki opu haota: Solota: Sesatia nane hatuku pua Tasa:si nane pena: tapaemekeme.

³¹ Kutu pieketa: mo Diudia nane make Ka:lili nane make *Sametia nane make koto kenke paeyao pa:ta: haemeke siosi wanda:halita: a:nda: pelia haemekeme. Koto siosi wanda:halita: Holi Sipitidima: tamba: minolo haena: honkopu hao hata: daeyatiki pimikime. Tekehali pa:ta: panda:puniao hata: pimikime.

³² Pidata: kenke paeyao pa:ta: pomu lopaata: hoto ma:nda:ta: mo Lida da nane haemeke Koda:na: wanda:hali handolo peekeme. ³³ Koto da pa:ta:ta: hali homeke Iniasi handeekeme. Koto halita: kiki anke homa pa wieke hali pita: bapi ketepo hata: ipika: da panda: pa:ta: u pita:tiki pu hayekeme. ³⁴ Pidama: ipiki pa:ta: alota: Iniasio. Yesu Ketisoma: neke epeaasa:me. Naka: yapa:ta: oko pea mina tiae laa leekeme. Koto leeke pita: kone Iniasita: tiaeyekeme. ³⁵ Mo Lida Sietoni da yaapo pa:ta: haemeke wanda:hali paeyaoma: mo hali handaata: Tekehali pa:ta: la:ka:la hone tulaemekeme.

³⁶ Mo Diopa da pa:ta:ta: disaipolo wanda: homeke Ta:bida hayekeme. Koto bikita: pa mo *Kitiki pi laata: Dokasi laa la:la:me. Koto wanda:ma:ta: hoto paeyao epeke hau pu hata: mo ala:ta: ma:nda: dia:yeke mesiolo hali wanda:hali tamba: mu hayekeme. ³⁷ Kutu pu hayekepate nate ma:nda:na: koto wanda:ta: yeni tondope mea ota: homeekeme. Ipika: toko tanda:paata: oli manda da panda: pa:ta: wina: lemekeme. ³⁸ Koto Diopa data: mo Lida da teke pa:ta: hayeke handaa mo Diopa da haemeke disaipolo wanda:halima:ta: Pidata: Lida da pa:ta: a:pa hala:me pi opuaata: hali yaapo pa:ta: pi tapaaso alota: Niki pa:ta: pilisi a̱i̱ epo lapa:peke lena: tapaemekeme.

³⁹ Koto ekina: Pida tiaota: mo hali yaapo ame̱le̱ mandakena: pemekeme. Da opolo peeketa: oli manda da panda: pa:ta: ipiki hatuku a:meimikime. Koto pa:ta:ta: mo kosa:piki wanda:sunu paeyaoma:ta: mombololo hata: e̱ a:pa lemekeme. Hande Dokasima: na homeke pa hayeke pita:na: tumbulieke sedisunu make kosa: aka:manu make Pida pa:ta: walemekeme. ⁴⁰ Pidama: mo wanda:sunu paeyao hama: nane pupe laata: tumiki yotuao yeni peaata: mo wanda: toko handa:moneaaso alota: Ta:bida. Tiae laa leekeme. Mo wanda:ma: leke kila Pida handaata: tiao pitiekeme. ⁴¹ Pidama: panda:puniao ipika: kiki yola: mea tiaeyekeme. Kutu pieketa: Pidama: mo Ketiso wanda:hali make mo kosa:piki wanda:sunu make ipupe laata: hande wanda:ta: do tiao hala: handa:pe laa leekeme. ⁴² Koto hande pieke ekita: mo Diopa da paeyao pa:ta: la:tia tia pimikime. Kutupa wanda:hali wopuma: Tekehali pa:ta: hone tulaemekeme. ⁴³ Pidata: Diopa da pa:ta: hoto elekeeleke hatiki peaata: mo ma:na: yonkelekema: ala:ta: ala:ta: wepu hayeke hali Saimonona: da pa:ta: pelia haepekeme.