¹ Koto pita:ta: hande kini hali *Hetodima: mandane siosi tapake haliweki da:ka:pa: miniekeme. ² Ipikana:ma: Dionina: hameke Dia:mesita: kepete hokuluma: liekeme. ³ Kutupa Diu wanda:halima: ta:na:ma: homemeke handa Pida make da:ka:pa: miniekeme. Mo hande Na Pombei Yaake Palaowa Nemeke pita: piekeme. ⁴ Kutupa da:ka:pa: minata: dipula mea lopao ami haliweki mandane tonkopu mandane tonkopu mandane tonkopu mandane tonkopu haliwekita: kade hatiki pina: leekeme. Ipika: honema:ta: mo hande *Lombei Pupa Yapeeke pita: paeya:ka:na:ta: wanda:hali pa:ta: mea a:pa walueke hone wiekeme. ⁵ Koto ekina: Pidata: dipula da pa:ta: pa pitina: leekepate mo siosi tapake wanda:halima: Koda: pa:ta: Pida yeni wopu pea:tiki pimikime.

⁶ Hetodima: Pida mea a:pa waluekema: haena: timba kone Pidata: mo ami hali yaapo ame̱le̱ seni pu yaapoma: endialu pea tukiki pa:ta: peliekeme. Kutupa pota: hama: nane hata: kade haliwekima: mo dipula da handeteke hatiki ombu pimikime. ⁷ Kuta kone Tekehalina: enisolo homeke epeeketa: mo da panda: pa:ta: pa̱a̱ tieke piekeme. Kutupa ipikana:ma: Pida a:pa lu tiaaso alota: A̱i̱ tiae leekeme. Kutupa hande seni pumanu ipika: kiki pa:ta: kone tunkulupa lopa: lopa: piekeme. ⁸ Kutupa mo enisoloma: ipiki pa:ta: alota: Naka: hako yama anke dake pambae leekeme. Kutu piekeme. Kutupa ipikana:ma: Pida pa:ta: alota: Naka: dau mea dopua I̱ teli mea epoe leekeme. ⁹ Kutupa teli mea hama peekeme. Pidama: mo enisoloma: pieke ekita: hone na wiki upama: piki nono piekeme. ¹⁰ Kutupa titina: kade hayeke alena: lombei pupa pua koto hoki pa:ta:eki make lombei pupa puaata: mo hande daoni nane peeke ayenima: wepieke pota: kake tieke pa:ta: opolo pepekeme. Kutupa mo hande pota:ta: ipika: kone lombeekeme. Kutupa ipilikita: tunkulupa puaata: pota: homeke yola: mea pepekepate mo enisolota: koto kone Pida mina:pa:lao peekeme.

¹¹ Koto pita:ta: Pidama: hone wiekeme. Ameta: ota: hone wia handolome leekeme. Tekehalima: ipika: enisolo tapao mo Hetodima: I̱ mia: ekita: mo Diu wanda:halima: I̱ pa:ta: pulu pelemeeki make I̱ tamba: mia:me leekeme.

¹² Koto hone wiata: Dionita: ipika: biki ma:nda: Maka ipika: inkiki Metina: da pa:ta: peekeme. Koto da pa:ta: wanda:hali wopuma: momba:la pita: yeni pu pitimikime. ¹³ Kutupa mo pota: kake pa:ta: pua hoto laa kilikili laeyekeme. Kutupa wandiki ma:nda: Loudama: lombolo peekepate ¹⁴ Pidana: pi make meata: ta:na:ma: wopu homolo hata: pota: na lombeke da tukiki pa:ta: anke hao pua Pidata: pota: kake pa:ta: a:pa hala:me leekeme. ¹⁵ Ikana:ma: ipiki pa:ta: alota: Neketa: keaaso alee lemekepate ipikana:ma: alota: Ota: loa:me leekeme. Ikana:ma: alota: Ipika: enisolo hata: pa:la:me lemekepate ¹⁶ Pidama: kilikili laaso haena: pua pota: lomba Pida handolo hata: penkilipa:tia pomua wotu handake wimikime.

¹⁷ Kutu pimikipate Pidama: kikima: kone pi na lapee leekeme. Kutupa Tekehalima: mo dipula da pa:ta: hatuku epeeke pi la haleekeme. Kutupa Pidama: alota: Dia:mesi pa:ta: make Ketiso kametiti pa:ta: make do pi la hala:pa:peke leekeme. Kutupa mina:pa:lao pua da ma:nda: pa:ta: peekeme.

¹⁸ Da kelepeeketa: mo hande ami haliwekima: Pida na pitieke handa hone ti yokemekeme. ¹⁹ Kutupa Hetodima: Pida weiyekepate na handa: wiekeme. Koto ekina: mo kade haemeke haliweki pa:ta: Ekipa pa:la:pe laa lota: lota: peata: mo haliweki homena: lina: leekeme. Doeki paeyeketa: Hetodi Diudia mina:pa:lao nate mandaneeki Sesatia nane hayekeme.

²⁰ Hetodima: Taiya Saidoni da yaapo pa:ta: haemeke wanda:hali pa:ta: mineke tieke wopu pankeekeme. Koto ekina: mo da yaapo pa:ta: haemeke mandane haliwekima: apa:tao Hetodi handolo pemekeme. Titina: amba:la mo kini halina: da handeteke hayeke hali Ba:lasitusita: ika: a:nda: liaena:yeke ipiki ame̱le̱ pi lolo pemekeme. Mo halima: ika: pi opiekeme. Kotoeki pea:ta: a:nda: polumana:e laa Hetodi pa:ta: honke lolo pemekeme. Ika: wanda:halina: neta: Hetodima: handeteke hayeke kenke pa:ta: mu haemeke ekina:yeke lemekeme.

²¹ Hetodima: la: wieke nate ma:nda:na: kini halima: ipika: yamo haya: aka:manu yamaata: ipika: yama pitu hayeke seana: pita: wanda:hali pa:ta: pi leekeme. ²² Wanda:halima: opuaata: anekema: wi la alu alu pitolo alota: Dota: ota: halima: na ala:me laa *koda: ma:nda:ma: ala:pate ya:la:me lemekeme. ²³ Hetodima:ta: wanda:halima: Koda:na: pi na laena: leke pa ipika: pi kone laena: leeke handaata: kuta kone Tekehalina: enisoloma: Hetodi yeni tonda:pa: mina: leekeme. Kutupa pipi manuma: weleke tunkula: mepi naata: homeekeme.

²⁴ Kutu pitolo haena: kone Koda:na: pi mandane mandane wanda:hali paeyao pa:ta: daeyatia peekeme.

²⁵ Banabasi Solo yaapoma: mo Diutuseleme da pa:ta: pea:peke ekimanu pu paeyaota: pa la:ka:la Dioni Maka make hatuku mandakena: pemekeme.