¹ Kame tonuo. Ikana:ma: mo hande *Lo Pimanu opueleme ekina: I̱ma: ame do lolo polo pita: hone wilimikie. Hali ma:nda:ma:ta: pa hata:ta: mo hande Lo Pimanu dupie ala: ekita: opua:peke ya:la:me. ² Do tupa: make hali pa:la: wanda:ma:ta: haliki pa haya:ka:na:ta: kota: mo hande Lo Pi manuma: alota: Naka: haliki pa:ta: hao hapeke la:la:me. Koto la:la:pate mo haliki homea:ka:na:ta: mo hande Lo Pi manuma: alota: Naka: honumake halipikie la:la:me. ³ Koto ekina: haliki pa haena: kone hali ma:nda: pea:ka:na:ta: kota: siaka: hali wanda:e lelimikie. Koto lolo pelemepate ipika: haliki homea:ka:na:ta: kota: mo hande Lo Pi manuma: la:la: tupa: ipika: honumake halieke la:la:me. Koto tupa: hata: hali ma:nda: pea:ka:na:ta: kota: siaka: na haasa:me. ⁴ Ya kame tonuo. Koto tupa: iki pa:ta: make ula:me. Ikita: *Ketiso ipika: loke kone haleme ekina: hande Lo Pimanu pa:ta: ikita: homolo hata: pa ameta: mo Koda:ma: paa mea tiaeyeke halina:eki halememe. Koto ekita: nikana:ma: Koda:na: epeke haumanu pu hamonoyeke pa:la:me. ⁵ Amba: nikita: nika: hone pa:la: ekimanu homeke pu haoma: dina: hande Lo Pi manuma:ta: nikana:ma: hoke hau peomonoyeke nika: lokena: hone pa:la: ekimanu pu tiaaso haena: niki homaapeke yeekeme. ⁶ Kutu piekepate nikita: mo Lo Pi manuma: amba: mea tonkao wiekeeki pa:ta: homomeke handaata: ameta: Koda:ma: niki ka:la:pa: ta:pao pa hamono la:la:me. Ame do pokoloma: eta: hande amba: wape pea wieke Lo Pi manuma: waleeke tupa: na pokoloma:pate hande Sipitidima: panakeeki wala:la: tupa: pokoloma:me.

⁷ Koto pa:la: ekina: nikana:ma: eki pi loluma:pe. Hande Lo Pi manuta: hokeekie loluma:pe. A:pa:e. Dia:me. Koto pa:la:pate hande Lo Pi manuma:ta: I̱ma: hoke hau pitoloeki handonoyeke pa:la:me. Hande Lo Pi manuma: alota: Ta:ta:na: ale muluekema: we na pamba:peke la:la:pate pa kutupiki pi na lea:ka:na: yoluta: mo ta:ta:na: ale muluekema: we pamba:la: ekita: I̱ma: hone wopu na ulu pua:me. ⁸ Hoke hauma: I̱ pa:ta: hoke hone pa:la: ekimanu u tiaalo pieke pota: handa: wiekeme. Mo hande pi ula:eki homeke handeteke hata: pia:me. Lo Pimanu dia:ka:na:ta: hoke hauta: wele na pilieke. ⁹ Hande Lo Pimanu na opiki hata: I̱ta: da:ta haowa:pate pa mo pi ula:eki opua: dina:ta: hoke hau tiaeyeke ekima: ¹⁰ I̱ta: homono lea:me. Kutupata: mo I̱ mea da:taapeke ya:la: pi ula: ekima: kone I̱ homono lea:me. ¹¹  Hoke hauma: hande pi ula:eki handeteke hata: I̱ makealo pieke pota: handa: wiekeme. Hoke hauma: hande pi ula: ekima: makeao I̱ lu homaeya:me.

¹² Koto ekina: mo hande Lo Pi manuta: yakopiki hau pa:la: pimanue. Kutupa hande pi ula:eki ta:ta: ta:ta: piki ekita: kotoeki make yako pikieki make tikitiki pikieki make epekeeki make ula:me. ¹³ Koto pa:la: ekina: hande epeke ekima:ta: I̱ lu homaeya:pe. A:pa:e. Dia:me. Hoke hauma: homeke pia:me. Hoke hauma:ta: epekeeki mea kone ipika: hoke hau teke wanda:halima: peneme yao handena:yeke I̱ lu homaeya:me. Koto ekina: hande pi ula: ekima: kone hoke hau pita:la: ekita: ota: hokeeki kone wala: tiaasa:me.

¹⁴ Mo hande Lo Pi manuta: Koda: pa:ta: kone epeekepate I̱ta: homa:peke ya:la: halie. I̱ma:ta: pa hameke e pokaatiki pomina:la: hali leke hata: hoke hau pu halome. ¹⁵ I̱ma:ta: ya pu haloeki hone wopu na ulume. Hone pa:la:eki na pu halopateta: hone na pa:la: ekimanu kone pu halome. ¹⁶ Yaka hone na pa:la: ekimanu pu halo ekima:ta: hande Lo Pimanu epekeekie hone witolo ekita: peneme yao wala:la:me. ¹⁷ Koto ekina: do I̱ma: hande pu halo hauta: yaka kone na pitolopate I̱ tukiki pa:ta: ula: hoke hauma: kone pita:la:me. ¹⁸ I̱ tukiki pa:ta: epekeeki ma:nda: na pila:eki I̱ma: hone witolome. I̱ tukiki pa:ta: loa: ekita: I̱ta: kenke hali hata: loa:me. I̱ma:ta: epeke ekimanu puluekema: hone pa:la:pate I̱ma: pea:peke na ya:la:me. ¹⁹ Epekeeki puluekema: I̱ma: hone pa:la:pate na pu halome. Hokeeki puluekema: I̱ma: hone na pa:la:pate paa pu halome. ²⁰ I̱ma: hone na pa:la:eki kone pu halo ekina: I̱ma: ya kone na pitolopate I̱ tukiki pa:ta: ula: hoke hauma: kone pita:la:me.

²¹ Koto ekina: I̱ pa:ta: ula: hau handa: witolo ekita: dupae. I̱ma:ta: epekeeki puluekema: hone pa:la:pate kone hoke hau pionoyeke yaka honema: putiao hala:me. ²² Koda:na: Lo Pimanu pa:ta: yaka pukima: ta:na:ma: homolopate ²³ hau ma:nda:ta: I̱ pa:ta: ula:eki handolome. Koto ekima:ta: yaka honema: Koda:na: Lo Pimanu epekeekie laa hone witoloeki yaapo a:nda: lu alu pu halepeme. Do hande I̱ pa:ta: ula: hauma: koto ekima:ta: I̱ma: hoke hau piono pu tiaasa: hauta: do hande I̱ pa:ta: ula: hauma: kone I̱ dipula hali leke mea lopao halome. ²⁴ A:ta:e. I̱ pa:ta: ta:na:ma: homa:la:eki na pila:me. Do hande I̱ homaasa: loke taapuna: halo ekita: epima: I̱ tamba: miliepe.

²⁵  Koda: pa:ta: I̱ma: keiyae pi alome. Ipikana:ma: nika: Tekehali Yesu Ketisoma: I̱ tamba: mina: lolo pa:la: ekina: loa:me. Kota: yaka haloeki dupa. I̱ma: yaka kone Koda:na: Lo Pimanu yaka hone wia halopate yaka lokena: hone pa:la:eki manuma: I̱ma: hoke hau piono pu tiaasa: hauna:eki peao halome.