¹ Koto ekina: handeteke hapeke yea:pate yuwia hapeke soka:la: pieke handaata: dikita: A:ta:ni da nane ^2-3 hata:ta: hande *Ketisona: Pi Seliapo walolo hali nika: mandakena: Koda:na: e pokaasoma: hali dika: kame Timodi tapaopa:me. Timodi tapaopa: ekita: mo iki pa:ta: a:nda: limiki ekina: hali ma:nda: paa la:ka:la peliekeyeke ipikana:ma: iki taka:lao hata: ika: hone tulaalemeeki daeyamena: petelo epeekeme. Kutupiki a:nda: lita:la:eki manuta: niki pa:ta: a:pa:tiki pilieke laa Koda:ma: la: wiekeeki ikana:ma: hone wilimime. ⁴ Nikana:ma: iki ame̱le̱ haoma: pita: wetepe niki pa:ta: a:nda: lulu pa:la: ekimanu ipu halieke laa lo haoma: ekita: ota: yaasa:eki handelememe. ⁵ Kutu pa:la: ekina: I̱ma: Timodi tapaowa:me. Yuwia hapeke soka:la: pieke handa ika: hone tulaaleme ekimanu handoma: tiaena: Timodi tapaowa:me. Sadanima: iki makeala: ekina: nika: e pokoloma: ekita: pa alepe laa opuluekema: loa:me.

⁶ Kutu puma:pate ameta: Timodi iki mina:pa:lao paa la:ka:la a:pa ika: epeke pukima: homa hata: make ika: epeke hone tulaalemeeki make niki pa:ta: la kia:me. Ipikana:ma: la kitolo alota: Hoto paeyao ikana:ma: niki pa:ta: hone wopu witolo hata: nikana:ma: iki handuluekema: hone pia: tupa: ikana:ma: make niki handuluekema: make homeke hone kone wilimime ala:me. ⁷ Kametitio. Koto ekina:ta: nikana:ma: tanda tanda o ka:nda: tonka:na: mu haoma:pate nikana:ma: iki pa:ta: yenkimeke homo haoma: ekita: ameta: a:pa:la:me. Ika: hone tulaaleme ekima: niki sa:tiaala:me. ⁸ Ikana:ma: a:nda: ika: Tekehali pa:ta: halemeeki taka:lao haemeka:na:ta: kota: niki make da:ta hata: epeke tupa: halumeke. ⁹ Ameta: nikana:ma: iki pa:ta: hone witolo hata: Koda: pa:ta: keiyae pi lapeke ya:la:me. Ika: epeke haleme ekina: nika: Tekehali pa:ta: hata: ta:na:ma: homa haloma:me. Koto pa:la: ekina:ta: ipiki pa:ta: keiyae pi lo haloma:me. ¹⁰ Timba natena: nikana:ma: nika: Tekehali pa:ta: nika: pukima: ota: yeni wopu pu haloma:me. Ika: leke popeleke paa handuluekema: make ika: hone tulaalemeeki taka:lawalo pa:la: ekina: make loa:me.

¹¹ Nika: Apa: Koda: ipikana:ma: make nika: Tekehali Yesuma: make niki iki pa:ta: a:pomono pota: ana:na: pilaepeka:na:ta: kota: epelieke. ¹² Koto ekina: ika: ika: kone pukima: homelemeeki make paeyao pa:ta: pukima: homelemeeki make mo Tekehalima:ta: nikana:ma: iki pa:ta: pitoloma: tupa: kone ipikana:ma: ika:eki mea daeyawao pia:ka:na:ta: epelieke. ¹³ Ipikana:ma: kutu pilimi ekima: ika: puki taka:lawalieke. Kutu pia:ka:na:ta: nika: Tekehali Yesu ipika: wanda:hali ame̱le̱ epolo peleme natena:ta: ikita: nika: Apa: Koda: ipika: leke popelekena: mombela hata:ta: ala:ta: na piki epeke yakopiki wanda:hali halimikie.