¹ I̱ta: you halima: mo hande yaka pukima: homolo ankula: ankula: pa:ta: do tameiya: tapaasome. I̱ma: homeke dia:ya:la:pate mo hande ota:eki hone ula: wanda:halima: make iki pukima: homelememe. ² Pa ekipeke mo hande ota: ekita: niki pa:ta: u pelia hala: ekina: wetepe nina: make niki ame̱le̱ pa u halieke.

³ Nika: Apa: Koda: make mo Apa:na: Eiyeke Yesu Ketiso ipiliki telipuna:ma: a:ta:ma: homolo tamba: mina:la:eki make pa hameke a:ta:ma: homa:la:eki make puki lopa:niaasa:eki make niki pa:ta: ota:eki pita: pukima: homa:la:eki yaapo pa:ta: yama: kina:e.

⁴ Naka: mandane weki wandikita: mo hande Apa:ma: niki pa:ta: ota: pia:pa:peke la:la: tupa: ota:eki pa:ta: halemeeki handa: u hao I̱ta: ta:na: tiekema: homoa:me. ⁵ Koto ekina: mo wanda:o niki paeyaoma: pukima: homa: alu alu pumana:e laa alome. Do wape laaso hata: neke pa:ta: alo pita: panake pi ula:eki dia:ya:la:pate hande amba: titina: kini pitolo hata: wia haloma: pi ula:eki konee. ⁶ Do I̱ma: alo pukima: homa:la: ekina: teketa: nikana:ma: ota: Koda:na: pi ula:eki oto pa:ta: ota: hamana:e laa loa:me. Mo hande titina: pi ula:eki opeleme ekita: ikana:ma: mo pukima: homa:la:eki pa:ta: ota: hapa:peke la:la:eki opelememe.

⁷ Mo Yesu Ketisota: ota: kenke hali epeekeme laa hone na wilimi makeaaso hali wopu do kenke honiki honiki pominelememe. Kutupiki some a:nda:ta: makeaaso hali make Ketisona: a:nda: tunkuliki halie. ⁸ Koto ekina: leke leke lo hapa:peke. Pa ekipeke mo hande mulueke laa e pokeleme ekita: ma:nda: na alupaake pa ana:na: kone miomena: yeke loa:me.

⁹ Ma:nda: epima: Ketisoma: waleekeeki pa:ta: na hake pa ankulao mo pate leke pea:ka:na:ta: kota: Koda:ta: koto some yaapo na hala:me. Pate epima: mo wala:la:eki pa:ta: haya:ka:na:ta: kota: Koda: A:taala:ta: koto some pa:ta: halepeme. ¹⁰ Koto ekina:ta: ma:nda: epima: dupiki wala:la:eki na mea epea:ka:na:ta: koto someta: ika: da pa:ta:manu na handa: mea:pa:peke. Kutupa ipiki pa:ta:ta: Puki lopa:niaasa:eki neke pa:ta: wina:e pi na lapa:peke. ¹¹ Pa ekipeke ma:nda: epima: koto some pa:ta: Puki lopa:niaasa:eki neke pa:ta: wina:e lea:ka:na:ta: kota: koto some ipikita: mo halima: pu hala: hoke hau manuna: yankeke hala:me.

¹² I̱ma:ta: iki pa:ta: la kia:peke pita: wopu ula:pate mo wape laapeke tameiya: pita: wape laasa: tanu yaapota: paaso hata: yaka honema:ta: I̱ a:pa iki ame̱le̱ pita: pimanu lomana:e. Pa ekipeke niki paeyao ta:na: tieke pulu pa:la: tupa: loa:me.

¹³ Kutupa naka: asina: weki wandikima:ta: ika: a:talo pimanu tapaasememe.