4 यूहन्नो बीड़ क मांय आयो अर बो बठै बतिस्मो देतो अर परचार करतो हो। की थे थारा हिया न पाप का गेलाऊँ बदळर बतिस्मो लेल्यो। जिसै परमेश्बर थारा पापा न धो देसी। 5 एहूदीयां दिसावर अर यरुशलेम नगरी का घणक्राक मिनख बिनै सुणबा बिकै कनै गया। अर बे बठै जार आपका पापा न मान्या जिसै बो बानै यरदन नंदी म बतिस्मो दियो। 6 यूहन्नो ऊँट क बाळाऊँ बणेड़ा गाबा पेरतो हो अर कमर प चमड़ा को पट्टो बाँध्या करतो हो। बो टिड्डिया अर जंगली शैद खाया करतो हो। 7 अर बो मिनखा म परचार करतो हो की, “मेरै पाछै एक जणो आर्यो ह। बो मेर हू बोळो महान ह, अर म तो बीकाळा जूता का सळू खोलबा जोगो ही कोनी 8 अर म तो थानै पाणीऊँ बतिस्मो द्‌युँ हू। पण बो थानै पवित्र आत्मा स बतिस्मो देसी।”

9 बा दिना म अंय्यां होयो ईशु गलील का नासरतऊँ आयो अर बठै यूहन्ना स यरदन नंदी म बतिस्मो लियो। 10 जंय्यां ई बो पाणी मऊँ बारनै निकळ्यो बो देख्यो की अकास खुलगो अर पवित्र आत्मा कबूतर की जंय्यां बिपै उतरी। 11 अर बादळा मऊँ हैल्लो आयो, “तू मेरो लाड़लो पूत ह, म तेरुँ बोळो राजी हूँ।”

12 इकै पाछै पवित्र आत्मा बिनै हात्युहाथ जोर देर बीड़ म लेगी। 13 बठै चाळिस दिना ताँई शैतान^b बिनै बिचासतो रियो अर बो बठै जंगली जीनावरा क सागै रैहतो अर ईश्वर नगरी दूत बिकी खेचळ करता हा।

14 यूहन्ना न कोठड़ी क मांय न बन्द करबा क पाछै ईशु गलील गयो अर बठै परमेश्बर को चोखो समच्यार लोगा न सुणाबा लाग्यो। 15 बो खयो, “परमेश्बर को राज कनै आबा को ठिक टेम आगो ह। जिमै परमेश्बर राज करसी। ई ताँणी थे पापाऊँ हियो फिराओ अर परमेश्बर का चोखा समच्यार प बिश्‍वास करो।”

16 जद ईशु गलील दरियाव क किनारा किनारा जार्यो हो। जणा बो शमोन अर शमोन का भाई अन्द्रियास न देख्यो। बे मछी पकड़बाळा हा, अर बि टेम बे मछी पकड़बा ताँई दरियाव म जाळ गेर्‌र्या हा। 17 ईशु बण स बोल्यो, “मेरै गेल आओ म थानै परमेश्बर ताँई मिनखा न ल्याबाळो बणास्युँ।” 18 बे जाळ न छोड़’र बिकै गेल हो लीया। 19 अर बे ज्युँई थोड़ा सा आगै ढळ्याक जणा बानै जब्दी को बेटो याकूब अर बिको भाई यूहन्नो दिख्यो बे न्याव म जाळ सुधारा हा। 20 ईशु बानै तावळो सो आपकै कनै बुलायो अर बे आपका बाप जब्दी न मजुरा क कनै छोड़’र खुद बिकै गेल होगा।

21 अर बे कफरनहूम गया अर एहूदीयां का आबाळा अराम हाळा दिन^c ईशु एहूदीयां की प्रार्थना करबाळी झघा गयो अर मिनखा न परबचन सीखाबा लाग्यो। 22 लोग बिका बचना न सुणर ताजुब म पड़गा। क्युं क बो बानै शास्त्रा न सीखाबाळा की जंय्यां परबचन कोनी देतो हो, पण एक अधिकारी की जंय्यां परबचन देतो हो। 23 बण एहूदीयां का प्रार्थना घर म एक मिनख हो जिकै मांय ओपरी-बलाय ही अर बो चाणचुक्यो ही जोरऊँ बार घालर 24 बोल्यो, “ओ नासरत का ईशु थारो-म्हारो काँई लेण-देण के तू म्हानै तब्बा करबाताँणी आयो ह, म जाणूँ हूँ की तू परमेश्बर को खरो मिनख ह!” 25 बिकै अंय्यां बोलता ही ईशु बिनै दकाल्यो अर बिनै खयो, “तू चुपचाली रैह अर इमैऊँ बारै निकळ ज्या।” 26 ओपरी-बलाय बी मिनख न मरोड़’र बार घालती बिमै स निकळगी। 27 ई बातऊँ सगळाँ मिनख चोरंगा रैह्ग्या। अर आपसरी म बूझबा लाग्या, “आ बेधड़क सीखाबाळी नई सीख काँई है? अर ओ ओपरी-बलाय न भी ओडावै ह, अर बे इको खयो मानै ह।” 28 अर आ कारनामा की टो-टो गलील अर बिकै कनै का सगळाँ गाँवा म होगी।

29 बो तावळो सो एहूदीयां का प्रार्थना घर स निकळर याकूब अर यूहन्ना क सागै शमोन अर अन्द्रियास क घरा गयो। 30 शमोन की सासु क उन^d होरी ही जि बजै स बा बिछावणा म पड़ी ही बिकै बारा म बे ईशु न जद की जद बताया 31 ईशु बिकै कनै जार बिको बावळ्यो पकड़’र बिनै उठायो अर बा निरोगी होगी अर जणा बा बाकी सेवा पाणी करबा लाग्गी। 32 दिन आथ्या पाछै लोग रोगला न अर जिकै मांय न ओपरी-बलाय ही बानै बिकै कनै ल्याया। 33 अर पूरी की पूरी नगरी बारना क आगै उल्ट पड़ी। 34 ईशु बा रोगला न निरोगो कर्यो जो भाँत-भाँत की पीड़ा म हा। अर ओपरी-बलाय बी काढ़ि। अर बो बा ओपरी-बलाय न बोलबा कोनी देतो हो क्युं क बे बिनै जाणै ही।

35 बो भागपाट्या ही आपका घरा न छोड़’र उजाड़ म चलेगो अर बो बठै प्रार्थना करबा लाग्यो। 36 शमोन अर बिका साथी-संगी ईशु न ढूँढ़बा निकळ्या। 37 बे बिनै ढूँढ लियो अर बोल्या, “सगळाँ मिनख तनै ढूँढै ह।” 38 ई बात न सुणर ईशु बानै बोल्यो, “आओ ल्यो आपा दूसरी नगर्या म चालां, जिसै म बठै का मिनखा न बी चोखो समच्यार दे सकूं ई ताँई तो म आयो हू।” 39 अर बो गलील का सगळाँ एहूदीयां का प्रार्थना घर म परमेश्बर को हैल्लो देतो गयो अर कई मिनखा मऊँ ओपरी-बलाय काढ़तो।

40 ईशु क कनै एक कोढ़ी आयो अर बो ईशुऊँ हाथ जोड़’र अरदास करबा लाग्यो अर बोल्यो, “ज थे चाओ तो मेरो कोढ़ धो सको हो।” 41 ईशु न बिपै दया आई अर बो बिपै आपको हाथ धर’र खयो, “म चाऊँ हूँ, तू कोढ़ स निरोगो हो।” 42 अर बो कोढ़ी हात्युहाथ ही निरोगो होगो। 43-44 ईशु बिनै चितार बोल्यो, “देख तू ई बात क बारा म कोई न ही मना खिज्ये अर याजक क कनै जार खुद न दिखा, अर मूसा की रीत गेल जंय्यां मंडेड़ो ह तेरो कोढ़ धुपण की गुवाई म तू चढावो चढ़ा।” 45 पण बो बारनै जार सगळाँ म आ बात फिला दि जिसै ईशु बी नगरी म चोड़ै- धाड़ै कोनी जा सक्यो। पण बो उजाड़ म रियो। अर बठै बी लोग च्यारूँमेर हू बिकै कनै आर्या हा।