Awantu waingirizia mbwe ebuuki eya *injiili eno yajojwa ni Yowaana Mariiko agati eya emiaka egia 45-55, andi ne ebuuki eya Mathaayo emiire okujojwa. Lwona kufwana mbwe Mariiko iye yajojeranga Awakristo awatari *Awayaudi aeniki kukawa mbwe akola na amang'ana amangi agari mu Injiili eya Mathaayo, ni areka agandi agatari no owuzito ku awantu awatari Awayaudi. Lwona afwola amang'ana agaema ku enkola ezia Awayaudi, aga awantu awatari Awayaudi ngawaesa okuwurra wuangu, geeza kandi ku owuliire. Mariiko yawanga omuwuuka olwa ya-agaana kandi aingizia amang'ana aga Yesu, ni yawanga ku omugizi ogwa Yerusaleemu. Ku amiire amangi, yawanga na atunzia Petro mu emirimo giae, kutio amang'ana gandi agari mu ebuuki yaae eno, yawurra ku Petro. Lunyima yagenda-genda ni Paulo ni Baranabaasi mu olugendo lwawu olwa kuluweri olwa okulanzia injiili.

Mariiko agamba-gamba kuwungi ku ewintu ewia Yesu yakola okukira ewia yawoola. Awoola mbwe Yesu alagana amaani aga okununula, okutunzia no okulamia awantu. Kutio, Yesu no Omuzia owa Katonda kuwuene nikulondokana ne emirimo giae egia amankono, okufumia *ewikeeno, okulamia awantu no okurekera awantu owuoni. Wino wilagana geeza mbwe *Owuami owua Katonda wumiire okuuza ku ekialo. Owulamu, emirimo no olumbe olwa Yesu wilaganiwua ki ewiiza okutunzia awantu woona ku ekialo. Mariiko akola na amang'ana aga Olugiriiki ‘*Kristo’ no Oluibrania ‘*Meesia’ agalagana ‘omuntu *owakrwe amavuta,’ okulagana mbwe Yesu nio omuntu, owa Katonda alowoole kandi aeere emirimo emilowole. Yesu nio Omwami ooza okununula awantu, owa Awayaudi waawanga ni wamiire okuwa ni warindirra ku emiaka emingi. Amang'ana aga owugambi agaema mu *Endagano Enkulu aga Mariiko akola nago, galagana Yesu ki omuntu owa Katonda yaifuuwa okutuma okununula awantu. Mala kiomo Oluibrania lutoola eking'ana ‘omuzia’ okulagana mbwe ekintu kifwanana ne ekindi nintio lwona Mariiko akola ne eking'ana ekio okulagana mbwe Yesu afwana ni Katonda, na amueta mbwe ‘Omuzia owa Katonda.’ Lwona aeta awantu awaganyire ku Kristo mbwe awaana awa Katonda, okulagana mbwe katio wari awaae kandi wamufwanana mu enkola.