10
1 Waamwifu, mu omwoyo gwange munsi nyagala ino kandi nsawira Awaisraeli wiifu ino mbwe Katonda awanunule. 2 Inze omwene nyesa okuwawoolako no owusiani mbwe kuwuene wateere emioyo giawu egia munsi okukorra Katonda. Ni kukawa kutio, okuta okwa wateere emioyo giawu okukorra Katonda kuno ngakuisigiike ku okumanya engira eya Katonda ateriire awantu wamukorremo, yaaya. 3 Mu okutamanya engira eya Katonda areeta nayo awantu mu empurizanio nae, iwo waagarizia engira yaawu aweene eya okuwa awigolovu emberi wa Katonda. Iwo waageezania okulonda *ensikirra kandi mu okukola otio, waalowa engira eya Katonda. 4 *Kristo nie entuuko eya ensikirra eya Muusa okukangatra owulamu owua awantu. Kutio nyingeeno Katonda aingizia awantu woona awari no okuganya ku Kristo ki awigolovu.5 Muusa omwene na ajoja ku owuigolovu owuuza mu engira eya okulonda ensikirra, awoola mbwe, “Omuntu orindre ensikirra zino, ensikirra ziiza okugera atuukre owulamu.” 6 Ni ku engira eya okuwa mu empurizanio ni Katonda mu engira eya okuwa no okuganya, endagano ewoola etino, “Otaaza waiwuuzia mu omwoyo gwao mbwe, ‘Ooza okuniina kungulu ku igulu naanu?’ ” (Ao otio mbwe, okutoola Kristo ku igulu okumureeta ku ekialo.) 7 Namba mbwe, “Naanu ooza yaika ansi mu owuina aa awafu wari?” (Ao otio mbwe, okutoola Kristo mu ekialo ekia awafu, amufumie enze). 8 Ni ekia endagano ewoola ku amang'ana aga okuwa no okuganya aga tulanzia ni mbwe, “Amang'ana aga Katonda gari ampi ni iwue; gari mala mu omunwa gwao kandi mu omwoyo gwao.” 9 Aeniki no owoorre no omunwa gwao omwene otino, “Yesu no Omwami,” kandi owe no okuganya mu omwoyo gwao mbwe Katonda yamuziusia amutoola ku awafu, Katonda aaza okukununula. 10 Kuri kutio aeniki omuntu aganya no omwoyo gwae ogwa munsi nikwo Katonda yamuta mu empurizanio nae. Lwona no omuntu awoorre no omunwa gwae emberi wa awantu mbwe Yesu no Omwami, Katonda amununula. 11 Mala kiomo *endagano ewoola mbwe, “Omuntu-umuntu oweere no okuganya ku iye ngariwona ensuuko.” 12 Ngegawula *Awayaudi na awatari Awayaudi aeniki Omwami no omulala eng'ene, ori Omwami owa awantu woona kandi osereka ino awantu woona awamusawa owuitunzi. 13 Kuri kiomo endagano ewoola mbwe, “Omuntu-umuntu osawire Omwami mbwe ‘Omwami nunule,’ aaza okununulwa.”
14 Ni, wakareeta otie okusawa owa wakiari okuganyako? Lwona wakamuganyako otie ni wakiari okuwurra amang'ana gaae? Nakuwa wakawurra amang'ana gaae otie no omuntu atawalanziziizie? 15 Ni wakalanziizie otie ni Katonda atawatumre? Mala kiomo kwajojwa mu endagano mbwe, “Okuuza okwa awantu awareeta amang'ana amalootu aga Katonda ne ensereki enene efwanana otie!”
16 Ni ng'ani mbwe Awaisraeli woona waaingizia amang'ana amalootu ago. Isaaya omwene yawoola otino, “Omwami, wameka awaweere no okuganya ku amang'ana gaao aga tuwalagre?” 17 Kutio okuwa no okuganya kuema ku okuwurra amang'ana, na amang'ana ageene gagamba-gamba ku Yesu Kristo.
18 Ni mbuuzia ntino: Ngawawurra amang'ana ago? Kuwuene waagawurra mala kiomo endagano ewoola mbwe,
“Emioyo giawu gimiire okuwurrwa mu ekialo kiona,
kandi amang'ana gaawu gamiire okutuuka mu embega ziona ezia ekialo.”
19 Kandi mbuuzia ntino: Kusi amang'ana ago ngagakaingirra Awaisraeli? Owusookere Katonda nio owawoola ni kuwitra ku Muusa otino,
“Nyiza okugera iyari riwa-ambe no oluganda olutasugre okuetwa oluganda
ku okukorra oluganda olwo ewintu ewilootu;
kandi nyiza okugera enda ziinyu ziyie
no oluganda olwa awantu awamaya awawula no okumanya.”
20 Lunyima kandi, Isaaya yawa no owusiani okulonda omunwa ogwa Katonda owawoola mbwe,
“Nyamanywa na awantu awataakola na amaani okunyagala wammanye;
kandi nyaimanyikira awantu awataiwuuzia wamanye owa ndi.”
21 Ni ku Awaisraeli, agia emberi na awoola otino, “Enyinga ziona okukono kwange miire okuwa ni ngoloriire awantu awa emitwe emikalu, awatawurra.”