Ebaruwa eyagiira Filemooni yajojwa no *Omutumwa Paulo ni yawanga mu owusiwe owua mu enyumba ku omugizi ogwa Rooma omwaka ogwa 60. Ebaruwa eno yajojwa enyinga endala ne ebaruwa eyagiira Awakolosaai, kandi Paulo yatuma Onesimaasi ni Tukiiko okuira ebaruwa zino.

Filemooni yawanga Omukristo omunyazi omenyere ku omugizi ogwa Kolosaai. Onesimaasi yawanga owemirimo waae, ni yamuiwira kandi arumuka agia ale. Ekia yakola kino kiasugaana no okuitwa nikulondokana ne endagirra ezia Awaruumi. Onesimaasi yagia aagana ni Paulo ku omugizi ogwa Rooma kandi aganya ku *Kristo. Kutio, Paulo yamutuma airane ku Filemooni ne ebaruwa eno. Yaiyemba Filemooni mbwe aganye aingizie Onesimaasi kandi mbwe ataaza yamuswawuka, aeniki katio ngakawanga mala owemirimo eng'ene, ni yawanga wamwawu waae ku Kristo.

Okuagala okwa Paulo okuneene mu ebaruwa eno, kwawanga okuirania empurizanio agati ya awantu wawiri wano. Akola otio na amang'ana amalootu aga okureeta empurizanio endootu agati yaae ni Filemooni, okumureeta alala no Onesimaasi. Ebaruwa eno elagana mbwe Katonda atoorre awantu woona owuagani. Anunula owemirimo owarumuka mala kiomo yanunula omwene emirimo. Lwona, etulaga mbwe awantu awaweere Awakristo waesa okuirana mu empurizanio namba na awaawanga awazigu waawu kale.