Mawu lɔ tun Sala bo na ji ovi ŋusunglo ɖokpo
18
1 Xwetɔ Mawu ze do ŋumɛ na Ablaxamu le Mamule we hɔncyɔ kɔn, hwemɛnu Ablaxamu bo xlɔn onyi le avɔva etɔn we mɔnu, ohwe sinsyɛnxu ɖe bo lo hun nɔ. 2 E kɔ okɔ, bo kpɔn ŋusunglo atɔn le ote le ajiji mɛ, ye ko dɛn le e wu. Xena e kpɔn ye, e do odun sɔn avɔva la mɔnu, bo va yi kpe ye, bo do onu odo, bo do do ogbe na ye. 3 E bo lɔ na ɛmɛ ɖokpo le ye mɛ tun mɔ: «Ɛmɛ ɖaxo, ko ɖe kuku, na ko kpewu na kpɔn dɔmɛnywɛ tɔwe, be bo nɔ ote viɖe le mɔ odansɔvi tɔwe kɔn. 4 Ye ni hɛn ɛsin viɖe va a do klɔa afɔ na mi, mi ba yi gbɔjwɛ le otin xe gɔ. 5 Ko na hɛn onuɖuɖu ɖe va, na mi a ɖu, a bo do kpɔn hɔnhlɔn, keŋu gbɔxwe na mi a mɔ wle omɔ. E mɛ, mi ko mɔ gbɔn mɔ odansɔvi miatɔn kɔn nɔ vɔvɔ.» Jonɔ laye bo lɔ tun mɔ: «E nyɔ! Wasi ɖi lena o lɔ ɖo ha.» 6 Ablaxamu hwlɛndo, bo yi avɔva la mɛ, bo va yi lɔ na Sala tun mɔ: «Yawu, nya yovowɔ gannu atɔn, a bo mɛ kɛklɛ.» 7 E mɛ godo, e do odun yi kanlin etɔnye we okpwe mɛ, bo wle nyibuvi xeni su ɖuɖu bo wa ɖaŋu do olan nywɛɖe, bo sɔ na odansɔvi etɔn ɖe, odansɔvi la bo hu-i, bo jlɛ ɖo bleŋu.8 Xena ye jla olan la ɖo vɔ, Ablaxamu sɔ-ɛ sɔ ɖo akɔn mɛ na jonɔ laye, kpodo waŋugaci kpo nyibunɔsin kpo. Ablaxamu le ote le otin la gɔ le aha na ye, ye bo do ɖu onu la nɔ. 9 Ye bo kan Ablaxamu se tun mɔ: «Siwe Sala ɖe?» E bo ɖo e wu tun: «E le avɔva la mɛ.» 10 Jonɔ ɖokpo bo lɔ tun mɔ: «Ko kan do e ji tun, ko na trɔ va kɔn we, le oxwe xeni gbɔn nɔ mɛ, le lesinha hwenu, siwe Sala bo na ji ovi ŋusunglo ɖokpo.»
Vɔ, Sala la bo le avɔva la mɔnu, le godo na Ablaxamu, bo lo se oxo la nɔ. 11 Ablaxamu kpo Sala kpo bo o hwɛn, oxwe yetɔnye o su, Sala can ko mɔ nɔ kpɔn eɖe. 12 Sala bo ko ɛdɛ le ayixa etɔn mɛ nɔ, bo lɔ tun mɔ: «Mɔ xeni o ku nyɔxo ɖo lesinha, ŋusunglo na mɔ jlo mɔ nɔ? Suye can bo o ku nyɔxo.» 13 Xwetɔ Mawu bo lɔ na Ablaxamu tun mɔ: «Ɛlɛ dɔn na Sala do ko ɛdɛ, bo do lɔ tun he xeni o ku nyɔxo diin, na kpewu ji ovi doo? 14 Onu ɖe le na mɔ Xwetɔ Mawu la na hwedo wiwasi wu wɛɛ? Hwexenu na ko na trɔ va kɔn we, le oxwe xeni gbɔn nɔ mɛ, le lesinha hwenu, Sala bo na ji ovi ŋusunglo ɖokpo.» 15 Sala mɔ onu, bo lɔ tun mɔ: «Ko ɔn ko ɛdɛ mɔ.» Vivɔ wɛ jɛ e ji, mi wɛ dɔn e do lɔ mɔsinha. Xwetɔ Mawu bo lɔ ni-i tun mɔ: «O ko ɛdɛ diin.»
Ablaxamu ɖe kuku do ota na Sodomu
16 E mɛ godo, ɛmɛ laye site, bo jɛ omɔ kpan ŋukɔn Sodomu danhɔn, bo lo kpɔn toxo la nɔ le odo daan, Ablaxamu bo kplɔ ye do, a do va yi ɖo ye. 17 Xwetɔ Mawu bo lɔ do ayixa mɛ tun mɔ: «Onu xena ko ka dosin nɔ la, ko na hwla-ɛ do Ablaxamu wɛɛ? 18 E ɖo na va nyi dagbo-dagbo na otogun ɖaxo hɔnhlɔnnɔ ɖe. Dogbɔn emyɔ ji, ko na dona otogun xeye ni gbɔn nyixɔ la ji zɛtɛye. 19 Ɖo, ko can-ɛ, e ba do ɖe ogbe na vikpɛ etɔnye kpodo jijimɛvi etɔnye xeye ni va jɔ kplɔ-ɛ do ye, tun ye boo zɔn gbɔn osɛn tɛyee ji, a bo zan ɛgbɛ jijwɛ, a bo wa onu xeni sɔgbe. E mɛ, ko ba do na na ajɔgbe xena ko fyan ni-i la, a cɛ ni-i.» 20 Mi wɛ Xwetɔ Mawu lɔ na Ablaxamu tun mɔ: «Ɛhwɛ xena ye do na Sodomutɔye kpo Gomɔɔtɔye kpo nɔ, e hugan onyi, onu nyanyla yetɔn bo su diin. 21 Ko na yi toxo la mɛ, a bo yi kpɔn tun ɛhwɛ xena ye do na ye nɔ ko bo se nɔ la, mɔsinha jan wɛ ye wa onu laye ɖo oxojɔxo jaa? E nyi oxojɔxo wɛ alo ojo wɛ, ko na nyɔ-ɛ.»
22 Le jonɔ atɔn laye mɛ, ɛmɛ owe lɛ le blɛ la, bo ɖo ŋukɔn yiyi le omɔ zinzɔn yetɔn mɛ do yi Sodomu, vɔ, Xwetɔ Mawu la, bo nɔ ote le Ablaxamu kɔnb. 23 Ablaxamu tɛkpɔ-ɛ, bo lɔ tun mɔ: «Be, o na crɔn ɛmɛ jijwɛ kpodo ɛhwɛhutɔ do okpɔ? 24 Tanyɔ, ɛmɛ jijwɛ kanɖe owo na le toxo la mɛ. Na e le mɔsinha, o na crɔn toxo la jan wɛɛ? O ɔn na kpɔn do ɛmɛ jijwɛ kanɖe owo xeye ni le toxo la mɛ wu, a do sɔ ɛhwɛ kɛ toxo la wɛɛ? 25 O o! O ɔn do onu mɔsinhatɔn sin nɔ kpɔn gbeɖe. A crɔn ɛmɛ jijwɛ kpodo ɛhwɛhutɔ do okpɔ? E le mɔsinha, be axɔ ɖokpo ŋumyɔ bɛ mɛ o tu na ɛmɛ jijwɛ kpodo ɛhwɛhutɔ kpo mɔ! Ni ká jɔ kpɔn gbeɖe. Myɔ xeni nyi ɛgbɛ la seŋu we ɛhwɛɖɔtɔ, o ɔn na ɖɔ ɛhwɛ jijɔ wɛɛ?» 26 Xwetɔ Mawu ɖo e wu ni-i tun mɔ: «Na ko kpɔn ɛmɛ jijwɛ kanɖe owo le Sodomu, be ko na kpɔn do ɛmɛ mɛ laye wu, a bo sɔ ɛhwɛ kɛ toxo la seŋu.»
27 Ablaxamu mɔ yi oxo bo lɔ tun mɔ: «Xwetɔ Mawu, kafla, okɔ kpodo ofin jan wɛ mɔ ko nyi, ganke ko bo xa lɔ oxo na we nɔ. 28 Tanyɔ, ɛmɛ atun na va yi hwe le ɛmɛ jijwɛ kanɖe owo laye wu, be o na crɔn toxo la zɛtɛye do ɛmɛ atun xeye ni hwe laye wu wɛɛ?» Xwetɔ Mawu bo lɔ tun mɔ: «Na ko kpɔn ɛmɛ jijwɛ kanɖe atun le toxo la mɛ, be ko ɔn crɔn-ɛ nɔ.»
29 Ablaxamu mɔ tɛ ɛɖɛ do oxo la ji nɔ, bo lɔ tun mɔ: «Tanyɔ ɛmɛ jijwɛ kanɖe jan wɛ na le toxo la mɛ». Xwetɔ Mawu bo lɔ tun mɔ: «Do ɛmɛ kanɖe laye wu, ko ɔn do onu ti sin nɔ.» 30 Mi wɛ Ablaxamu mɔ lɔ tun mɔ: «Ko ɖe kuku, Xwetɔ tɛye, ká do aɖi tun ko gbɛ lɔ oxo nɔ. Tanyɔ, ɛmɛ ogban jan wɛ na le ofi la.» Xwetɔ Mawu bo lɔ tun mɔ: «Do ɛmɛ ogban laye wu, ko ɔn do onu ti sin nɔ.» 31 Ablaxamu bo mɔ lɔ tun mɔ: «Xwetɔ tɛye, kafla, ko gbɛ xa lɔ oxo na we nɔ. Tanyɔ, ɛmɛ oko jan wɛ ye na kpɔn le ofi la.» Xwetɔ Mawu bo tun: «Do ɛmɛ oko laye wu, ko ɔn crɔn toxo la nɔ.» 32 Mi wɛ Ablaxamu lɔ tun mɔ: «Xwetɔ, kafla, ká do aɖi, kpotwi xɛn ko lɔ oxo nɔ. Tanyɔ, ɛmɛ jijwɛ owo jan wɛ ye na kpɔn le ofi la.» Xwetɔ Mawu bo lɔ tun: «Do ɛmɛ owo laye wu, ko ɔn crɔn toxo la nɔ.» 33 Xena Xwetɔ Mawu lɔ oxo kpo Ablaxamu vɔ, e sɔn, Ablaxamu can bo lɛkɔ gbɔn va nɔtyɔn etɔn.