¹ Ditu niˈa, petailen Libun mukaˈ ditu ngag bataˈ mu. Iini suminulat dun diniu, ki megulang niu kini. Mikpetailu gupia diniu. Mukaˈ kanaˈ laak naan, puˈ sug launan suminakup tu metuud, mikpetail dailan dema diniu, ² puˈ samasakup ita tu metuud. Su metuud, ndiˈ na mawaˈ dinita, ndaˈi gikteben.

³ Penenebiin ku, tulungen ita nu Gamaˈ ta Megbebayaˈ, mukaˈ nug Bataˈen si Isukristu, petailen ita niin sampay begayan ita niin pianan ginaa, saˈ pegdunutan ta su metuud mukaˈ mekpinetailay ita.

⁴ Naa, benaˈ misuunan ku puˈ su ngag duma bataˈ mu, pegdunutan nilan su metuud, maaˈ dadema nu pinalinta nu Gamaˈ ta dinita, liliagu dun gupia. ⁵ Kelelaat diniˈa, petailen Libun, mekpinetailay ita, launan ta. Puˈ iini palintau diniu sug daan, su midengeg ta kanugdiin sampay nandaw, kanaˈ begu palinta. ⁶ Puˈ iini kepetail ta tu Megbebayaˈ, su kekpetuud ta tu nga pinalintanen. Kaas pinetailay amu, launan niu, puˈ kiin demai pinalinta diniu kanugdiin sampay nandaw.

⁷ Naa, duun nai melaun mekpetuˈun dig balus mileep dig lumbang kini, puˈ pemelaun nilan puˈ kanaˈ laung kuminilawan si Isukristu. Adin su mekpetuˈun maˈantu, iini mikpetuˈun dig balus. Mukaˈ iin dademai kumuntra dini Kristu. ⁸ Tubuday niu, puˈ mbuus, mekpelilu sug lasay nami diniu. Saˈ maˈantu, ndiˈ niu malap sug launan sugda nu Megbebayaˈ sia diniu.

⁹ Adin su getaw dinuganganen su tinituluˈ ni Kristu, kaas miksuay dun, iin kanaˈ na sakup nu Megbebayaˈ. Adin pelum su ndaˈ suay tu tinituluˈ ni Kristu, iini suminakup gusay tu Gamaˈ ta sampay tug Bataˈen. ¹⁰ Kaas saˈ duuni meditug balay niu mekpetuˈun, asa misuay tu metuud su tinituluˈen, ndiˈ niu penembaˈay mukaˈ ndiˈ niu pepenaikay. ¹¹ Puˈ adin su menembaˈ di maˈnia, mipeduma diniin mekesalaˈ.

¹² Melaun pai teluˈen ku sia diniu, laak pauku sumulat dun, puˈ iini mauyaˈan ku, mengumbelayanu sia ditu niu, adun megabitabit ita gupia, mukaˈ leliagen ita dun.

¹³ Simbayan ka nu ngag bataˈ nu petailen mimated diniˈa dini.