¹ Ditu niˈa Gayo, petailen ku gupia. Iini suminulat dun diniˈai megulang mu.

² Penenebian ku yaˈa, sambatu petailen ku, adun gempiai kebetang mu, sampay sug lawas mu, puˈ suunan ku gempiaig delendeman mu tu Megbebayaˈ. ³ Puˈ duuni nga samasakup ta dini Isukristu minateng dini genat ditu niu. Pigukit nilan dinaan sug betad mu, dinunutan mu gupia su metuud, maaˈ dadema nug daan betad mu. Benaˈ midengegu, liliagu dun gupia. ⁴ Puˈ saˈ medengegu puˈ su ngag bataˈu, ndaˈ ilan pesuay ditu metuud, leliagenu dun gupia.

⁵ Yaˈa, sambatu petailen ku, melengas gupiai pinggulaula mu, puˈ ki nga samasakup ta, ibangan mu ilan, pia kanaˈ mu minilala. ⁶ Puˈ sug lelaat mu dinilan, ginukit nilan di pikumpungan dini nu nga suminakup dini Kristu. Kelelaat diniˈa, saˈ mpuliˈ ilan dia niu, pepianan mu pelumi pinawan nilan, puˈ pigwekilan ilan nu Megbebayaˈ. ⁷ Puˈ saˈ mipanaw ilan genat dini mangay mekpetuˈun mekatag dini Kristu, ndaˈ ilan pekpaingabang di nga kanaˈ samasakup ta dini Isus. ⁸ Kaas subay ebangan ta nu nga suminakup, adun mpeduma ita tu kekpesuun nilan tu metuud.

⁹ Duuni maikaˈ sinulatu ditu pikumpungan niu nga sakup, laak dagid ndaˈ pektalentenay ni Diotrefes. Puˈ si Diotrefes, ndiˈen pektalentenan su teluˈen ku, puˈ mauyaˈanen gupia megbayaˈ tug dumanen. ¹⁰ Kaas saˈ matengu, pegyegaan ta sug launan pinggulaulanen, sug launan linibaken mukaˈ balusen mekatag dinami. Keduaˈen, ndiˈen penembaˈen su samasakup ta mangay dia niu, mukaˈ su menembaˈ sia dinilan, pemaagenen. Mukaˈ su nga mangay dia, puaˈenen pa dia pikumpungan niu nga suminakup!

¹¹ Yaˈa dema, sambatu petailen ku, ndiˈ mu penunggilingay su melaaten, segaga penunggilingay mu su melengas. Adin su getaw melengasig betaden, iini sakup nu Megbebayaˈ. Adin su getaw melaatig betaden, ndaˈen mesabut sug betad nu Megbebayaˈ.

¹² Si Demetrio pelum, iin su pinalan nug launan getaw, puˈ sug betaden, betad nu tantu suminakup tu metuud. Mukaˈ pinalan dadema nami. Suunan niu puˈ ndiˈ ami megbalus.

¹³ Melaun pa siai teluˈen ku diniˈa, laak pauku sumulat dun. ¹⁴ Puˈ mauyaˈan ku, ndiˈ tagad maiben, mekitaˈ ita mukaˈ megabitabit ita.

¹⁵ Iini penenebiin ku tu Megbebayaˈ, begayan ka niin pianan ginaa.

Simbayan ka nug launan sambat mu dini. Sug launan sambat ta dia niu, sambay mau dinilan.