Fobitro Injil Shorif
Kitab Shutro
Fobitro Injil Shorif ḳene leḳa oise?
Ou bishoye Injil shorifor sair nombor sifarar 20 rukur 30-31 aeato ase,
“Hozrot Isae sahabi oḳolor samne aro bout keramoti nishana deḳaisoin,
ita hoḳolta to ou kitabo leḳa oise na.
Ḳali ou goṭona oḳol leḳa oise,
zate ota tilaot ḳoria tumra iman ano,
Hozrot Isau Alla Pakor oada ḳora hou al-Mosi,
tain-u Ibnulla,
Allar ḳas maear zon,
ar iman ania zate tan usillae tumra aḳeri zindegi hasil ḳoro.”
Hozrot Isar zomanar hal-hokikot
Hozrot Isa zebla i duniat asla,
ou shomoe tain bortoman duniar Filistin,
Israil,
Zordan ar Lebanon deshor nanan zagat aṭi aṭi gia toblig korta.
Tain Israil deshor uttor elaḳar Galil aoror ḳandat eḳ gaut boshot ḳorta.
Hozrot Ibrahim (a:)
ar Hozrot Musar (a:)
bout zomana bade tain i duniat aisoin.
Boni Israilor bashsha Hozrot Daud (a:)
oila tan furbo-furush.
Boni Israilor dusra nam asil,
Ihudi zati.
Ihudi mani,
Allar tarif ḳorra zon.
Hozrot Isa ou Ihudi zatir maze zonom loisoin.
Hou shomoe Boni Israil saṛa ar kunu zatie eḳ Alla manta na,
tara nanan nomunar deb-debir puja ḳorta.
Oile oinno zati taki-o kunu kunu manshe eḳ Allar ufre iman anchila.
Hozrot Mohammod (sa:)
-or onuman 600 bosor age Hozrot Isa al-Mosi ou duniat asla.
Ou zomanat asta duniar manshor ebadot-ḳana,
mani Kaba Shorif,
asil fobitro Baetul-Mukaddos,
iṭa oilo Israil-Filistin deshor Zeruzalem ṭauno.
Bortoman Modina Shorif taki 500 mail utore.
Ou ebadot-ḳanar shimanar bitre mul kaba gor ba herem shorif asil,
ikan kub pak-fobitro gor.
I goror maf oilo,
lambae bish at,
fashe bish at,
ar usa-o bish at.
Boni Israil zati ar duniar mazor oinno zoto manshe eḳ Allar ebadot ḳorta,
tara hoḳole ou gorre Kaba Shorif manta,
ou goror muki oia ebadot-bondegi ḳorta,
oḳan-u asil erar kibla.
Hou zomanat bosoro tinbar id oito.
Ermazor eḳ idor nam asil Idul Fesaḳ ba Azadir Id,
Boni Israil zati zalim Feraunor gulami taki azad oisla ḳori,
ou idor nam Azadir Id.
Te duniar zoto manshe eḳ Alla manta,
tara hoḳole-u ebadot-bondegi ḳorar lagi hoj ḳorar niote ou Zeruzalemo aita.
Hojor shomoe tara Kaba Shorifor ḳandat Allar name foshu kurbani dita.
Hozrot Isa al-Mosi ar tan sahabi oḳol-o ou idor shomoe Kaba Shorifo aita.
Ou Baetul-Mukaddos Kaba Shorifor hoḳolta solto imam sabor hukume.
I imam sab oḳol asla Hozrot Harunor (a:)
bongshodor,
ar ḳadim oḳol asla Hozrot Harunor (a:)
baf-dadar bongshor mazor Lebi ḳandanor manush.
Bout imam sab asla Siddekia mozobor.
Siddekia mozobor manshe mone ḳorta,
Baetul-Mukaddosor bitre aia ebadot-bondegi,
zikir-azkar ar kurbani adae ḳorle-u zoruri forz adae oizae.
Tara ḳali Tourat Shorif saṛa ar kunu kitab manta na.
Oile aroḳ mozobor manush-o asla,
era oila Forishi mozob,
tara asmani hoḳol kitab manta.
Era ekin ḳorta shoriotor forteḳ hukum-ahkam mana zorur,
ar manshor mongoṛa banail riti-reoaz-o mana kub zorur,
ita-o forz.
Ou shomoe Hozrot Isa al-Mosi duniat aia zebla ḳoila,
ou Forishi ar Siddekia mozobor manshe Allar dorbaro naformani ḳorra,
tara lannoti.
Iḳan hunia tara kub gusa oila.
Erlagi-u tara hoḳole saila,
tanre ḳatol ḳorilta.
Ou shomoe Midil-Isṭ elaḳar bout desh,
Afrika mohadeshor uttor elaḳar bout desh,
ar Iurupor bout desho asil Ruman bashsha Koisoror doḳole.
Ermaze kunu kunu desho nizor raza asla,
oile era-o bashshar hukume solta.
Oula Filistin deshor maze-o dui laḳan shashon asil.
Uttor elaḳa asil Galil zila,
ar dokkin elaḳa Ehudia zila.
Ou Ehudiar bitre asil Zeruzalem ṭaun.
Oile Ehudia zilar razae ḳaraf ḳam ar durniti ḳorae bashsha Koisore ou razare horaia,
tain nize shorashori ou zila-o salaita.
Ou elaḳa Filat namor eḳ Ruman hakimor zimmae solto.
Ruman oḳole eḳ Alla manta na,
tara nanan deb-debir puja ḳorta.
Ehudia zilar uttor galat asil Shomoria elaḳa.
Shomoriar manshe-o Allar ebadot-bondegi ḳorta.
Oile tara Baetul-Mukaddoso aita na.
Tarar nizor alada ebadot-ḳana asil,
hou ebadot-ḳanare tarar kaba shorif manta. Erdae Ihudi ar Shomoria manshor maze kub dushmoni asil.
Injil mani kita?
Injil oilogi Arobi bashae salu oa eḳṭa Grik shobdo,
‘Eu-Anjel’,
mul shobdor mani oilo,
kush-ḳobri ba kushir ḳobor.
Allatalae manshore kushir ḳobor zanaisoin Hozrot Isar befare.
Hozrot Isae tan fosond mafik barozon sahabi basila.
Ou sahabi oḳole nizor ḳane tan talim hunla.
Nizor souke tan zindegi,
keramoti ḳam,
tan mout ar moutor bade zinda oia uṭa deḳla.
Tain erare itar ashol bed buzaila,
ou bed oilogi Alla Pake to tanre bezisoin,
duniar hokkol zatir maz taki eḳdol manshore guna naformani taki basaia Allar ḳas bonda hishabe alog korta,
era-u Alla Pakor didar hasil ḳorba.
Era-u oila behesti bashshai ba Allar bashshair proza.
Ar zoto manush ou bashshait hamaito nae,
tara oila andairor bashshair proza mani Iblisor proza.
Ou boeani leḳar lagi Alla Pake sairzon ḳas manshore fosond ḳoria,
erar dilor maze tan nizor fobitro ruh dia erare kamil banaisoin.
Hozrot Isa al-Mosir loge ze barozon sahabi asla,
ou sairo zone erar ges taki hoḳolta hunia tarar zobanbondi mafik Allar ruhur bole leḳsoin,
Hozrot Isar talim-nosiot ar tan keramoti ḳam-ḳaz,
tan mout ar moutor bade zinda oia uṭa.
Esaṛa Sahabi Nama namor sifarat,
foela zomanar Isaei zomator itihash zana zae.
Bade Hozrot Paulus (ra:)
ar oinno sahabi oḳolor leḳa aro ekuishḳan sifara,
siṭir nomunae hou amolor mumin oḳol ar zomator lagi zoruri talim leḳa oe.
Hoḳol heshe sahabi Hozrot Hannanor (ra:)
doroshon hishabe Zaira Ḳalam namor sifara ase,
tain Hozrot Isar marfote doroshon faila,
duniar aḳeri zomana ar kiamotor nanan nomunar agam ḳobor.
Te hoḳoltae muṭ shataish sifara ase.
Ita hunle manshe buzba,
kun fote solle zan basibo.
Alla Pake ou ḳobor bataisoin,
Iblisor gulami taki basar lagi kun fote sola zorur.
Iblisor fando taki,
mani gunar gulami taki basibar ou ze ḳobor Alla Pake zanaisoin,
er nam-u oilo kush-ḳobri ba Injil shorif.
Ou kushir ḳobor oilo,
Allatalae manush zatire basanir lagi Hozrot Isa al-Mosire ou duniat bezisoin.
Tain-u oila duniar manshor nazator ḳanḍari.
Hozrot Isa al-Mosir nam-ufadi
Hozrot Isa al-Mosir bout nam-ufadi asil,
ou nam oḳol Alla Rabbul Alamine tanre disla.
Er mazor kisu nam ar er mani oilo,
1) al-Mosi
I namor mani oilo,
kub mulloban kushboe-ala fobitro ator dia ḳelafoti faoa zon.
Ita kila oe?
Alla Pake Hozrot Samuel (a:)
nobire hukum dila,
ou hukum faia tain ou laḳan fobitro ator nia Hozrot Daud (a:)
nobir matat maḳaia ḳelafoti disla,
teu Daud nobi Boni Israil zatir bashsha oisla.
Ou nomunae Alla Pake tan fobitro ruh mubarok dia Hozrot Isa al-Mosire ḳelafoti dila,
zate tain ou duniat eḳ noea zati ḳaim ḳoroin.
Ou noea zati-u oilo Allar bashshai.
Ar Hozrot Isa al-Mosi-u oila ou bashshair malik.
2) Ibnulla,
Allar ḳas maear zon
Fobitro Injil Shorifor mul Grik bashae leḳa ase Ḳodar fut,
i fut shobdo oilo pak kitabor bashae eḳṭa rufok shobdo.
Amra to zani Alla eḳ,
tain zonom loin-o na,
zonom dein-o na.
Oile i fut shobdo ze eḳṭa rufok shobdo iṭa amrar shomazor boute zanoin na gotike,
i torjomar maze Hozrot Isare fut na ḳoia,
Allar ḳas maear zon ḳoisi.
Ashole ikṭa furafur gaibi eḳṭa ufadi,
er shoṭik orto asta Injil kitab mon dia na foṛile buza kub ḳoṭin.
Tobu-o tuṛa buzaitam sairam.
Allar ḳam-ḳaz ar ḳemota zarar mazdia i duniat zari oe ba boail ḳora oe,
erare to tan fut ḳoia ḍaḳa oe.
Te Hozrot Adom (a:)
-re Allae eḳtiar disla Allar foeda ḳora shob zandaror ufre razotto ḳorar lagi,
gotike enre tan fut ḳoa oise;
ar firista oḳole Allar name hoeto kunu naforman zatir ufre Allai gozob ḍaloin,
nae to aroḳ zatire hefazot ḳoroin,
erdae pak kitabor rufok bashae erare-o Ḳodar fut ḳoia ḍaḳa oito.
Era oilagi Allar maear kolifa oḳol,
Allar name Allai eḳtiar salain.
Fobitro Injil Shorifor al-Moti sifarar 28 rukur 18 aeato Hozrot Isae ḳoira,
“Behest ar duniar hokkol ḳemota amare deoa oise.”
Ar al-Hannan sifarar 14 rukur 10 aeato ḳoisoin,
“Tumi ekin ḳoro na ni,
ami gaibi bafor maze asi,
ar gaibi bafo amar maze asoin?
Ami tumrare zeta ḳoi,
ita amar nizor mukor buli nae,
ze gaibi baf amar bitre asoin,
tain-u tan nizor ḳam salaira.”
Te Hozrot Isa al-Mosi oila Alla Pakor kub gonisṭo maear zon,
Allae tanre ijjot,
ḳemota ar odikar disoin hoḳol taki beshi.
Tain oila hoḳol taki alada,
tain toshrif anchoin Allar arosh taki ar oḳono Alla Pakor daro asoin,
tan shobab soritro oilo furafur Allai bab.
Allai kudroti ḳemota ḳaṭaisoin haeat-mout,
rizek-doulot ar guna mafir befare.
Erlagiu Allae tanre ijjot ḳoria Grik bashar rufok bulie Ḳodar fut ḳoia ufadi disoin,
Arobi bashae ḳoa oe Ibnulla.
3) Bin-Adom
Hozrot Isae nize nizor nam ḳoita Bin-Adom.
Oinno ḳeu tanre i name ḍakito na.
Tain duniat toshrif anar bout age Hozrot Danial (a:)
name eḳzon nobi asla.
Ou Danial nobir sohifar maze leḳa ase,
behesti eḳ fobitro zon ou duniat toshrif anba,
ein manshor laḳan surot doria aiba,
einu Bin-Adom.
Fobitro kitabul mukaddos,
Danial sifarar 7 ruku 14 aeato ase,
“Ou Bin-Adomor ato ḳemota,
ijjot ar razotto ḳorar eḳtiar deoa oilo,
zate duniar tamam zati,
desh ar nanan bashae matra manshe tan ḳezmot ḳoroin.
Tan bashshai sirostaei,
kunudin fuṛaito nae ba binasho oito nae.”
Hozrot Isau oila hou ḳemota-ala Bin-Adom.
4) Allai meṛar baichcha
al-Hannan sifarar 1 ruku 29 aeato ase,
Ehia (a:)
nobie Hozrot Isar bae ishara ḳori ḳoisla,
“Ou deḳrae ni Allai meṛar baichcha,
zen usillae hokkol manshor gunar mafi oe.”
Ashole meṛa to meṛa-u,
kunu manush nae.
Te Isare ḳene meṛa ḳoia ḍaḳa oe?
Ḳaron oilo,
bout zomana age,
Boni Israil zati zebla Mishor desho gulam asla,
eḳdin Allae Musa nobir marfote tarare hukum dila,
forteḳ goro eḳ eḳ meṛa kurbani ḳoria er lou goror duaror souḳaṭo laganir lagi,
zate tara na moroin.
Zoto goror souḳaṭo lou asil na,
mani zalim Feraun ar Mishori oḳolor gorainto,
i hokkol goror boṛo fuain hou dinu ada raitkur shomoe morigelo.
Teu Feraun zoldi ḳori uṭia Boni Israilre saṛi dilo ar era Mishor desh taki azad oia baroia gela.
Hozrot Ehiae to zanta,
Boni Israile zela meṛa kurbani dia mout taki ar Feraunor gulami taki rehai faisla,
ṭik oula Isa al-Mosir zan kurbanir usillae duniar hoḳol zatir manshe Iblisor at taki ar gunar gulami taki rehai faiba.
Kunu kunu manshor darona,
Hozrot Isar mout oise na,
tain shorashori zinda halote behesto gesoin.
Oile hasa-u tan mout oise,
moutor tin din bade hirbar zinda oia uṭsoin.
Fobitro Kuran Shorifor sura Nisar 157 aeato ase,
“Tara (mani Ihudi neta oḳole) boṛai ḳori ḳoilo,
amra Moriomor fut Isa al-Mosire zane marilisi;
kintu ashole tara tanre ḳatol ḳorlo na.”
Kuran Shorifor ou aeat to ekkere hasa,
ḳaron Hozrot Isae nize ḳoisla,
Injil shorifor al-Hannan sifarar 10 ruku 18 aeato,
“Amar zan ḳeu amar ges taki ḳaṛia nito nae,
oile ami nize-u zan bilaimu.
Mono rakio,
zan deoar ḳemota zela amar ase,
oula firot neoar ḳemota-o ase.”
Ar al-Markus sifarar 10 ruku 45 aeato tain ḳoisla,
“Ami Bin-Adome bout manshor zan basanir lagi nizor zan bilai deoat aisi.”
Te erlagi-u Hozrot Isare kurbanir meṛar loge tulona ḳora oise.
Aḳeri ḳota
Te ou kitab tilaot ḳorra,
hoḳol bai-biradorre ḳoiram,
amra zera eḳ Alla mani,
eḳ Allar ebadot-bondegi ḳori.
Allar kushie nizor kushi ar Allar bezare nizor bezari mono ḳori,
Allar ufre-u amrar zindegir goti,
ikan dile-zane ekin ḳori.
Aukka amra dilor ḳalis-sohi niote ijjot ar tazim ḳoria mohan Alla Rabbul Alaminor ou fobitro asmani kitab oḳol tilaot ḳori.
Er batail hukum-ahkam amol ḳori.
Teu dunia ar aḳerato amra shorminda oitam nae.
Amra asha ḳori,
afnara Alla Pakor ḳalamre ijjot diba.
Mohan Mabud Allae amra hoḳolor dilor duar kulia deukka,
tan ḳalam zania-buzia amol ḳorar tofik deukka.
Tan ashik oḳolor ufre tan ḳas rohomot ar boroḳot nazil ḳoroukka.
Amin.