Sahabi oḳolor odikar
9
1 Baiainre,
ami kita shadin nae ni?
Ami kunu sahabi nae ni?
Ami kunu amrar malik Isare deḳsi na ni?
Malikor lagi ami ze toblig kam ḳorsi,
itar fol tumra nae ni?
2 Oinno ḳeu amare sahabi ḳoia na manleo tumra to manbae,
amar sahabi ḳamor sil-sappoṛ tumrau,
ḳaron amar mazdi tumra tan ummot oiso.
3 Te amar sahabi fod loia zera shondoe ḳoroin,
tara amar ou zuaf hunoukka.
4 Ami ar sahabi Barnabase kita ḳana-finar beton faibar odikar nai ni?
5 Mumin kunu boinre shadi ḳorar odikar amrar nai ni?
Oinno sahabi oḳole,
malik Isar baiainte ar sahabi Fitore zela zarzir bibire loia soforo zain,
amra-o ola fari na ni?
6 Ḳali ami ar Barnabaseu nizor ate ḳamai ḳoria ḳaitam ni?
7 Nizor gaṭṭir ṭeḳa bangia ḳeu sifair saḳri ḳore ni?
Ze giroste folor bagan ḳore,
he itar fol ḳae na ni?
Ze raḳale foshu fal raḳe,
he itar dud ḳae na ni?
8 Ami to ḳali manush aḳole matiar na,
Musa nobir shorioteo ola ḳoise.
9 Shorioto ase,
“Dan maṛa deoar shomoe gorur muko hufi lagaio na.”
Te Allae ḳali gorur ḳotau sinta ḳoroin ni?
10 Tain ashole amrar ḳotau ḳoisoin,
ikan hasa nae ni?
Nichchoe,
ita amrar lagiu leḳa oisil,
ḳaron zein ḳet ḳoroin ar zein dan maṛa dein,
fosholor baṭ faoar ashaeu tarar ita ḳora usit.
11 Te amra zela tumrar maze ruhanik bisi ruisi,
oula zudi tumrar ges taki duniabi ḳani-fani zugai,
te beshi kunta niram ni?
12 Ar ou befare zudi tumrar ufre oinno manshor dabi ḳaṭe,
te amra aro beshi dabi ḳaṭaitam fari na ni?
Oile amra ila dabi na ḳaṭaia shoijjo ḳoriar,
zate al-Mosir befare kush-ḳobri toblig kamo amra ḳeuror fotor ḳaṭa na oi.
13 Tumra zano na ni,
fobitro Baetul-Mukaddoso zera ḳam ḳoroin,
tara oḳan takiu ḳana-fina fain,
ar kurbani ḳanat zera ḳam ḳoroin,
tara ou kurbanir mal taki baṭ fain.
14 Ṭik olaḳan malik Isar hukum ase,
zara kush-ḳobri toblig koroin,
tara zanu ou ḳamor usillae ḳaoa-finda fain.
15 Oile ami to er kuntau nisi na.
Ar oḳon tumrareo ita lekiar na,
amar lagi otar bebosta ḳortae ḳori.
Oḳon amar ou boṛaire zudi ḳeu beḳama banailae,
te amar mori zaoau bala.
16 Ami ze kush-ḳobri toblig koriar,
ete amar boṛai deḳanir kunta nae,
ita amar lagi forz.
Toblik na ḳorle amar ufre lannot foṛouk!
17 Oile ami zudi kushi mone toblig kori,
te to amar furushkar ase,
ar zudi nizor kushie na-o ḳori,
te malikor deoa zimmadar hishabe to ḳoriar.
18 Oḳon amar i ḳamor furushkar kita?
I furushkar oilo,
kush-ḳobri toblig koria hari faona beton nei na,
bina foeshae toblig korau amar beton.
19 Ami zudio kunu beṭar gulam nae,
tebou bout manshor zan basanir lagi nizore hoḳolor gulam banaia raḳsi.
20 Ihudi oḳolor mon zoe ḳorar lagi Ihudi shomazo ami Ihudir laḳan oisi.
Ami to Musa nobir shoriotor odine nae,
oile zara tan shoriot mane,
tarare zoe ḳorar lagi ami tarar laḳan oisi.
21 Ar zara shoriotor baira,
tarare zoe ḳorar lagi ami shoriotor baira manshor laḳan oisi.
Ashole ami Allar deoa shoriotor bare nae,
al-Mosir shoriotor odine asi.
22 Zera ḳomzur,
tarar gese ami ḳomzuror laḳan oisi,
tarareo zoe ḳorar lagi.
Befar oilo,
zekunu monte kisu manshor zan basanir lagi ami hoḳol shomazor mon zugai soliar.
23 Ḳali kush-ḳobrir lagiu ami ita ḳoriar,
zate er rohomotor bagi oi.
24 Tumra zano na ni,
douṛor ḳelat uṭia hoḳoleu douṛae,
oile furushkar ḳali eḳzoneu fae.
Oḳon tumrao oula douṛao zate furushkar fao.
25 Douṛor ḳelat douṛaia hari manshe ola eḳ mala fae,
ze mala bade nosṭo oizae,
ar ou mala faoar lagi era bout ḳoṭin niom-ḳanuno mane.
Oile amra to ashol okkoe mala faoar lagi ita ḳorram.
26 Erlagi uddesho saṛa ami douṛairam na.
Zeta beṭainte batashor loge kila-kili ḳoroin,
ami to itar laḳan nae.
27 Borong ami nizor shorilre ḳoshṭo dia gulamor laḳan raḳsi,
zate oinnor gese kush-ḳobri toblig koria hari,
furushkar taki nize bad na foṛi.