Mair-dorbaror kuṭi
4
1 Tumrar maze kuai tone mair-dorbar ar ḳaijja foeda oe?
Tumrar shukor ḳaishe shorilor ze rifue laṛai ḳore,
ogu takiu ae.
2 Zeta tumrar nae,
ota tumra mone mone sao,
erlagi tumra kun ḳoro.
Ar lalos ḳoro oile fao na,
erdae tumra mair-dorbar ar ḳaijja ḳoro.
Tumra to sao na,
erdae fao na.
3 Ar saileo fao na,
ḳaron tumra to bod niote sao,
zela tumrar monor ḳaish fura oe.
Duniar dust Allar dushmon
4 O beiman oḳol,
tumra kita zano na ni,
duniar loge dustir mani Allar loge dushmoni?
Ze duniar maeae buṛi zae,
he Allar dushmon oizae.
5 “Amrar bitre ze ruh deoa oise,
ikṭae amrare ingshar bae ṭane.”
Pak kitabor ou talim kunu emne batail oise ni?
6 Oile ita taki amrar ufre Allar rohomot aro beshi.
Erlagi kitabor maze leḳa ase,
“Boṛai ḳorrar ufre Allae at tuloin,
oile norom manshore rohom ḳoroin.”
7 Gotike tumra Allar zimmae roia shoetanor mukabila ḳoro,
teu he tumrar ges tone bagibo.
8 Allar bae sao,
teu taino tumrar bae saiba.
O gunagar oḳol,
tumra nizore pak-saf ḳoro,
O du-dila manush,
tumrar dil ḳaṭi ḳoro.
9 Duke ḳator oia ahazari ḳoro,
ashir bodla ḳando,
kushir bodla mattom ḳoro.
10 Mabudor dorbaro noto o,
teu tain tumrare usa ḳorba.
Gibot ar bisar
11 O bai oḳol,
tumra eḳzone aroḳzonor gibot gaio na.
Ḳeu zudi bair bodnam gae ba tar bisar ḳore,
er mani he shoriotor bodnam ḳorlo ar shoriotor bisar ḳorlo.
Tumi zudi shoriotor bisar ḳoro,
te to shoriot manrae na,
ulṭa tar bisar ḳorat ḳaṛa oiso.
12 Shoriot ar bisaror ḳemota ḳali eḳzonor atou ase.
Tainu basain,
tainu maroin.
Te ari-forir bisar ḳorra tumi aroḳzon ḳe?
Fuṭani deḳaio na
13 Huno,
tumra zara ḳo,
aiz ba ḳail amra omuk ṭauno zaimugi,
gia hono eḳ boros roia ḳae-ḳarbar ḳoria lab ḳormu.
14 Oile ḳailkur ḳobor to tumra zano na.
Tumrar zindegiu ba kita?
Tumrar zindegi to ḳosu fatar fani,
tuṛa shomoe taḳe,
bade foṛizae.
15 Erdae ila na ḳoia ola ḳo,
“Inshalla,
amra haeati faimu,
ar ota-hota ḳormu.”
16 Oile tumra to boṛai ḳoria fuṭani deḳairae.
Ilaḳan fuṭani bala nae.
17 Ḳeu zudi zaniao bala ḳam na ḳore,
te he gunar bagi oibo.