Hizrot sifara oilo Hozrot Musa (a:)-or ufre nazil oa Fobitro Tourat Shorifor dui nombor sifara. Alla Pakor ḳas ou sifarar maze tan foeda ḳora ashraful moḳlukator (shristir shera zat) gese nizor forisoe zair ḳorsoin. Allar munsha-morzi, kun ḳam ḳorle tain kushi ar kun ḳame tain bezar oin, ar tan bonda oḳolre tain ḳoto maea ḳoroin, naforman oḳolre touba ḳorar ḳoto beshi shuzug dein, ou sifarar maze ita zana zae.

I sifarar maze Allar nobi Hozrot Musa (a:)-or itihash ase. Tan zonom oilo kila, tain kila huru taki boṛo oila, ḳemne deshantori oila, bia-shadi ḳorla, ar kun halote Alla Mabudor didar-doroshon faila ota zana zae.

Musa (a:)-or zomanar 400 bosor age, Mishoror bashsha eḳ Feraune Hozrot Iusuf (a:)-re kub maea ḳorta, Iusufor baba Hozrot Iakub (a:)-or bongshodor Boni Israilreo kub maea ḳorta. Mishori oḳole erare Boni Israil na ḳoia, Ibrani ḳoia ḍakita. Ibrani shobdor mani oilo, rifuzi ba boitol. Iusuf (a:) mara zaoar bade, aroḳ Feraun Mishoror bashsha oia Boni Israilor ufre kub zur-zulum ḳoria tarare gulam banailo, oile Allae Hozrot Musa (a:)-re faṭaila Boni Israilre azad ḳorar lagi, ar tain tarare Feraunor gulami taki azad ḳorla.

Alla Pake Hozrot Musa (a:)-or gese Boni Israil zati ar tamam Adom zatir lagi Allar shoriotor siroḳalin doshṭa hukum zanaila. Ou hukum hokkol nobi, rosul, fegambore manchoin. Er kunu rod-bodol nai.

Ou sifarat deḳa zae, Allae Hozrot Musare hukum dila, Allar lagi tain ekkan fobitro gor banaita, ou goror nokshao Allae tanre deḳaila. Ou goror bitre asil fobitro Herem Shorif, manshe i gorre fobitro milon-tambu ḳoia ḍakita. Ikan oilo hou amolor Kaba Shorif, asta duniar hoḳol muminor kibla. Oile Boni Israil zati ou shomoe musafiror laḳan zagae zagae gia roita, erlagi ou ebadot ḳanare tarar loge ḳori boia nita. Hozrot Musa (a:)-or hukum mafik Boni Israile ou gor banaila.

Hozrot Isa al-Mosir zonmor onuman 1400 bosor age ou sifara leḳa oe.