Moutor bade zinda oila Hozrot Isa (24:1–53)
Hozrot Isa zinda oar shakki-forman
24
1 Ou beṭinte zeta ator-gulaf tiar ḳorsla,
haftar foela din kub sobre tara ota loia,
Isar ḳoeboror ḳandat aila.
2 Aia deḳla,
ḳoeboror mukor fattorḳan horail oigese.
3 Dekia tara ḳoeboror bitre hamaia deḳoin,
Isar lash to ḳoeboro nai.
4 Teu tara sintat foṛigela.
Ou shomoe dola soḳsoḳa ḳafoṛ finno duizon aia tarar ḳandat ubaila.
5 Erare dekia beṭinte ḍoraia mata nuailila.
Ou duiozone tarare ḳoila,
“Ogo,
tumitain zindare ḳene murda oḳolor maze aia tukairae?
6 Tain to ono nai,
tain zinda oigesoin.
Tain Galilo taḳte tumrar gese kita ḳoisla,
mono ḳoria deḳo.
7 Tain ḳoisla na ni,
Bin-Adomre naforman manshor ato dorai deoa oibo.
Tanre solibo loṭḳaia ḳatol ḳora oibo,
oile moutor tin dinor din hirbar zinda oia uṭba?”
8 Oḳan hunteu Isar agor ḳota oḳol tarar mono oigelo.
9 Tara ḳobrostan taki firia gia,
hou egaro zon sahabire ar baki hoḳolor gese ḳobor zanaila.
10 Mogdilini Moriom,
Shuhana,
Iakubor ma Moriom ar tarar loge zeta beṭin asla,
era hoḳole gia i ḳobor ḳoila.
11 Oile zera ita hunla,
era mono ḳorla ita nichoe baze mat,
ita beṭintor mat tara ekin ḳorla na.
12 Oile Fitor douṛaia ḳoeboror ḳandat gela.
Gia unda oia deḳla,
ḳali ḳafonḳan foṛi roise.
Ita dekia tain taijjub bonia firot aila.
Duizon shagride zinda Isare deḳla
13 Ou dinu duizon shagrid Zeruzalem taki shat mail duroi Imuas namor eḳ gaut zaoat asla.
14 Foto tara ota befar oḳol loiau mati mati zaira.
15 Tara mato roisoin ou shomoe aḳtau Isa nize tarar ḳandat aia eḳloge aṭa dorla.
16 Oile tarar sokut saṭa lagi gesil,
tara Isare dekiao sinla na.
17 Isae tarare zikaila,
“Aṭi aṭi afnara ita kitar batchit ḳorra?”
Ikan hunia era muk bezar ḳori ubai gela.
18 Ermaze Kiliofas name eḳzone Isare ḳoila,
“Afneu eḳmatro zon,
zein hunchoin na i ḳoedine Zeruzalemo kita goṭise?”
19 Isae tarare zikaila,
“Kita goṭise ba?”
Tara ḳoila,
“Nasarotor Isare loia zotota goṭise.
Tain to Allar nobi,
tan mukor zoban ar ḳame-ḳaze Allar nozoro ar hoḳol manshor sokuto kub takkoti ar mortuba-ala nobi asla.
20 Amrar boṛo imam ar murobbi oḳole tanre zane marar lagi Ruman oḳolor ato doraia dilaila,
tara tanre nia solibor ufre ḳatol ḳorilise.
21 Oile amrar asha asil,
tain Boni Israilre azad ḳorba.
Aiz tin din oilo i goṭona goṭise.
22 Ar amrar logor ḳoezon beṭi manshe aia amrare taijjub banailisoin.
Tara kub sobre Isar ḳoeboro gesla,
23 gia deḳsoin,
tan lash nai.
Tara firot aia ḳoila,
tara firistar doroshon faisoin,
ar firista oḳole tarare ḳoisoin,
Isa zinda asoin.
24 Bade amrar loge zara asla,
tarar mazeo ḳeu ḳeu ḳoeboro gia deḳla,
beṭintor ḳotau hasa,
Isar lash ḳoeboro nai.”
25 Hoḳolta hunia Isae tarare ḳoila,
“Afnara to kuntau buzoin na.
Afnaintor dil ola oshaṛ bonigese ni?
Allar nobi oḳole zeta bataia gesoin,
otareo afnara ekin ḳorra na.
26 Nobi oḳole ḳoisoin na ni,
Allar oada ḳora al-Mosie duk-mosibot shoijjo ḳoria hari tan zalal ar gourob hasil ḳorba?”
27 Bade tain Musa nobir Tourat kitab taki shuru ḳoria,
hokkol nobir kitabor maze tan befare zotota leḳa ase,
ota tarare buzaila.
28 Ar ze gaut zaita ḳori tara roana disla,
hou gaur ḳandat aile Isae aro duroi zaoar bab deḳaila.
29 Oile tara kub minot-ḳajji ḳoria tanre ḳoila,
“Oḳon to beil gesegi,
hainja oizar,
te raitḳan afne amrar gese roi zaukka.”
Ou tain roar lagi baṛit hamaila.
30 Bade zebla ḳanit boila,
ou shomoe Isae ruṭi loia ṭukraia Allar shukria adae ḳoria tarare dila.
31 Teu tarar souk kuligelo,
tara Isare sinilila.
Sinar loge logeu tain erar ges taki auṛi dilaila.
32 Bade tara eḳe-oinnore ḳoila,
“Foto zebla tain amrar loge batchit ḳorsla,
amrare Allar kalam buzaia disla,
hou shomoe amrar dilor maze eḳ eshki foeda oisil na ni?”
33 Loge loge tara duiozon baroia Zeruzalem aila.
Aia hou egaro zon sahabi ar baki hokkolre ekkano boat faila.
34 Tara ono boia ota matira,
Hozrot Isa asholeu zinda oigesoin,
zinda oia Saimon-Fitorre deḳa disoin.
35 Ou shomoe hou duiozoneo erare ḳoila,
fotor maze tara kila Isar deḳa faila,
ruṭi ṭukraibar shomoe kila tanre sinla,
ita hoḳolta zanaila.
Zinda Isare hoḳol shagride deḳla
36 Sahabi oḳole to ota loia batchit ḳorra,
ou shomoe aḳtau Isa nize ono aia tarar mazḳano ubaia ḳoila,
“Assalamu alaikum.”
37 Tane dekia tara kub ḍoraigela,
mono ḳorla but aise.
38 Isae tarare ḳoila,
“Tumra oto ostir oigelae ḳene?
Ḳene tumrar dilo shondoe hamailo?
39 Amar at-fao balamonte deḳo,
deḳo na,
i to ami.
Amare ataia deḳo,
butor to amar laḳan aḍḍi-mangsho nai.”
40 Oḳan ḳoia tain nizor at-fao tarare deḳaila.
41 Oile tara tane dekia oto beshi kushi oila,
kushir suṭe bedisha bonigela,
kunta bishash ḳorta farla na.
Teu Isae tarare ḳoila,
“Ino ḳaibar kunta ase ni?”
42 Tara eḳ ṭukra biran mas tanre dila.
43 Ou mas tain hoḳolor samne ḳaila.
44 Ḳaia erare ḳoila,
“Ami zebla tumrar loge aslam,
hou shomoe tumrare ḳoislam na ni,
Musa nobir Tourat Shorif,
nobi oḳolor sohifa,
ar Zobur Shorifor maze zeta leḳa ase,
ita hoḳolta nichchit folibo.”
45 Oḳan ḳoia hari,
tain sahabi oḳolor dilor duar kuli dila,
zate Allar kalamor mani era buzta faroin.
46 Tain ḳoila,
“Allar kalamo leḳa ase,
al-Mosie bout ḳoṭin duk-toklif faiba,
moutor tin dinor din tain murda taki zinda oiziba.
47 Zekunu manshe tan name touba ḳorle,
gunar mafi magile mafi faibo,
ou boeani Zeruzalem taki shuru oia asta duniar hoḳol zatir ḳano fousani lagbo.
48 Tumrau i hokkoltar shakki.
49 Ar huno,
amar batuni bafe zeta dan ḳorar oada ḳorsoin,
ami ita tumrar gese bezimu.
Oile behest taki bol-takkot na faoa forzonto,
tumra ou Zeruzalemo roio.”
Hozrot Isare behesto tulia neoa oilo
50 Bade Isae sahabi oḳolre loia Baet-Ania gaur muko gela,
gia tain at tulia tarare dua dila.
51 Ar ou duar haloteu tain tarar ges tone alog oigela,
tanre behesto tulia neoa oilo.
52 Tara hoḳole tanre soizda ḳoria,
kub kushi oia Zeruzalemo firot aila.
53 Ar Baetul-Mukaddosor maze hamesha Allar hamd-tarif ḳorat roila.
Amin.