Fobitro Injil Shorif 22 nombor sifara
dusra Fitor
Salam zanani
1
1 Ami Saimon-Fitor,
Hozrot Isa al-Mosir eḳzon gulam ar sahabi.
Tumra zera amrar laḳan,
amrar Alla ar toraneala Isa al-Mosir pak-forezgarie eḳoi laḳan moha dami iman hasil ḳorso,
ami tumrar gese leḳram.
2 Alla Pak ar amrar malik Hozrot Isare furafur sinar mazdi,
tumrar ufre besh ḳori rohomot ar shanti nazil ouk.
Mumin oḳolre daot ar fosond ḳora
3 Zein tan nizor mohima ar gune amrare daot disoin,
tanre furafur sinar mazdi tan kudrote amra ola niamot faisi,
zate amra forezgar bonia zindegi ḳaṭai.
4 Tan mohima ar gune amrar loge moha dami ar bout boṛo boṛo oada ḳorsoin,
zate tumra duniabi hoḳol bod ḳaish taki basia Allai gunor bagi o.
5 Erdae tumra kub kiali oia,
imanor loge nek kaislot,
nek kaislotor loge al-Mosire sinar aḳol,
6 I aḳolor loge nizore shamlani,
shamlanir loge doijjo ar doijjor loge forezgari,
7 forezgarir loge eḳe-oinne maea,
ar eḳe-oinne maear loge Allai mohobbote baṛo.
8 Tumrar maze zudi ita gunagun taḳe,
ar ita boria foṛat roe,
te amrar malik Isa al-Mosire furafur sinaḳan tumrar beḳama-behuda zaito nae.
9 Oile ze zonor maze ita gunagun nai,
he to anda,
he kuntau buze na.
Ḳaron agor ze guna taki tare pak-saf ḳora oise,
ikan he faurilise.
10 Erlagi bai oḳol huno,
Allae zen hasau tumrare daot disoin ar fosond ḳorsoin,
ita nichchit ḳorar lagi aro beshi kiali o.
Ila ḳorle tumra kunu shomoe usṭa ḳaitae nae.
11 Ar amrar malik toraneala Isa al-Mosir hameshakur bashshait tumrare ador ḳori harail oibo.
12 Erlagi,
ami hamesha tumrare ota befare mono ḳorai diram,
zudio ita tumrar zana ase ar tumrar gese ze hokikot aise,
itat tiro aso.
13 Ashole ami mono ḳorram,
ami zotodin tambur laḳan ou shorile basia roimu,
otodin tumrare ota mono ḳorai dia hozag raḳa usit.
14 Ḳaron ami to ar beshi din ou shorile roitam nae,
amrar malik Isa al-Mosie ikan amare forishkar zanai disoin.
15 Te amar moutor badeo hamesha zate ota mono raḳtae faro,
ami ou menoto ḳormu.
al-Mosir gourob ar nobi oḳolor buli
16 Amrar malik Hozrot Isa al-Mosir kudroti shokti ar tan hirbar toshrif anar ḳota zananit gia,
amra kunu banail kichcha ḳoisi na.
Amra to nizor souke tan mohima deḳsi.
17 Asman taki zalal ar shanor ze aoaz ailo,
“Einu amar ḳas maear zon Ibnulla,
en ufre ami kub kushi,”
ou aoazor mazdi al-Mosie tan gaibi baf Allar ges taki ijjot ar gourob faisoin.
18 Amra zebla tan loge hou fobitro faṛo aslam,
ou shomoe nizor ḳane behestor ou gaibi aoaz hunchi.
19 Ar amrar lagi aro boṛo forman oilo,
pak kitabo nobi oḳole zotota batai gesoin.
Andarir maze tumrar souk zelaḳan rushonir bae taḳe,
ṭik olaḳan zoto shomoe bian oise na ar tumrar dilo fozoror shuk-tera uṭse na,
oto shomoe tumra nobi oḳolor ḳotae kiali o,
teu tumrar bala oibo.
20 Ar ḳas ḳori mono rakio,
kitabor mazor kunu ḳota nobi oḳolor mongoṛa nae.
21 Ḳaron nobi oḳole tarar ichchamoto kunu ḳota ḳoisoin na,
ḳali Pak Ruhur bole Allar deoa buli bataisoin.