Taûni cia neegûrû ciacindwa
11
1 Rîra Njabini mûnene wa nthî ya Asori eegiirue bûra gwakarîkire, n'aatûmanire ntûmwa kîrî anene baba: Njobabu mûnene wa Mandoni, mûnene wa Simuroni, na kîrî mûnene wa Akisabu. 2 Anene bonthe ba mbarî ya bwa neegûrû naara irîmaani, anene bonthe bara baathanaga ndeeni ya kîbonde kîa Njorondani bwa naiti ya îria rîa Kinerethi, anene bara barî mwaranthî wa irîma mbarî ya ûthwîro bwa riûa, na anene bara barî Napothi-Ndori mbarî ya ûthwîro bwa riûa. 3 Aacooka aatûmana kîrî anene ba Kanaani bara baatwîre mbarî ya uumîîro bwa riûa na bara baatwîre mbarî ya ûthwîro bwa riûa. Na kîrî anene ba Amori, ba Aiti, ba Aperisi, ba Njebusi, bara baarî ba nthî ya irîma, na kîrî anene ba Aibi bara baatwîre taûni cia mwaranthî wa kîrîma kîa Erimoni, nthîgûrû ya Misipa. 4 Anene babu baaya na acikaarî baao baingî ta mûthanga wa îria. Baarî na mbaraathi inyingî mûno na nkaarî cia ndûa. 5 Na anene babu bonthe beeringanîîre amwe, baamba marema maao akubî na rûûyî rwa kauro ka Meromu, kaingo barûa na antû ba Isiraeri.6 Mwathani eera Njosua, “Ûtikaabakuthûke. N'ûntû rûû thaa ta ino nkeegua nkûbaûraga n'ûntû bwa Isiraeri. Nyuma ya ûgu buunange mbaraathi ciao magûrû na bûbîîthie nkaarî ciao cia ndûa na mwanki.” 7 Kwoogu Njosua na njûûrî yake ya ndûa baathi babakirimania agu kaurooni ka Meromu. 8 Mwathani aateethia antû ba Isiraeri baatura anthû baao. Bakûbatura na beengana nabo mwanka Sindoni Nene na kûthi Misirefothi-Maimu, baacooka babeengatia batarîîte kibonde kîa Misipe mbarî ya umîîro bwa riûa, agu noo baabaûragîîre mûno na gûtirî nwa ûmwe aatigara. 9 Njosua abarûtha wa ta bûra Mwathani aamwathîîte. Aatemanga mbaraathi ciao magûrû na aabîîthia nkaarî ciao cia ndûa na mwanki.
10 Rîru Njosua aacooka nyuma kagiitaani wa gaku agwata taûni yeetagwa Asori na aûraga mûnene wayo na rûûyiû. Asori n'yo yarûngamirîîte taûni ira iingî cionthe. 11 Nabo baûraga antû bonthe bara baarî ku, na gûtirî muntû nwa ûmwe aatigara. Rîru Njosua aabîîthia taûni înu ya Asori na mwanki.
12 Nyuma ya ûgu, Njosua aacooka aathûkia taûni cionthe cia anene babu amwe na anene baacio bonthe na abathiria cwe, wa ta bûra mûruti ngûgî wa Mwathani Musa, aathanîîte. 13 Îndî gûtirî gataûni nwa kamwe ga tûra twakîîtwe tûgûrîîni twabîîthua n'antû ba Isiraeri, tatiga Asori akî n'yo Njosua aabîîthiirie. 14 Antû ba Isiraeri baathûkiirie into bionthe wana kinya nyamû cia ndîîthia ira baataîte kuuma taûni inu ciatuîka ciao. Îndî gûtirî muntû nwa ûmwe aatigara. Baabaûragire cwe. 15 Wa ta bûra Mwathani aathire mûruti ngûgî wake Musa, nwa ta bu Musa n'we aathire Njosua. Njosua aarûtha wa bûra eerîîtwe akîmenyagîîra kwathîkîra bûra bunthe Mwathani aathîîte Musa.
Njosua arîîkia kûgwata nthîgûrû ya Kanaani
16 Kwoogu Njosua aathûkia nthîgûrû înu yonthe; nthî ya irîma, ya Negebu yonthe, gîteere kîa Ngoseni kîonthe, mwaranthî wa mbarî ya umîîro bwa riûa, Araba na irîma bia Isiraeri na mîaranthî yabio. 17 Na kuuma kîrîmaani kîa Araki, kîra gîîtîîtie bwa Seiri, mwanka Mbaari-Gandi kîbondeeni kîa Rebanoni mwaranthî wa kîrîma kîa Erimoni. Njosua aagwata anene ba gûntû gûku abaûraga bonthe. 18 Njosua n'aarûire na anene babu bonthe kwa îgiita rîîraaya mma akîîya kûbacinda. 19 Gûtirî taûni nwa îmwe yaiga kîrîîkanîro kîa ûkiri na antû ba Isiraeri, tatiga Aibi, bara baatûûraga Ngibeoni. Ira ingî cionthe athûkiirie na njîra ya ndûa. 20 N'ûntû i Mwathani wengwa aatûmire baûma nkoro, bathi kûrûa na antû ba Isiraeri, kaingo oona gîtûmi gîa kûbathiria cwe gûtarî kûbeegîîrua kîao, wa ta bûra Mwathani aathire Musa.
21 Kagiitani gaku Njosua aathiire aathiria rûrîîyo rwa Anaki ba kuuma nthî ya irîma, na kuuma Eburoni, Ndebiri, Anabu, na kuuma nthî ya irîma ya Njunda, na kuuma nthî ya irîma yonthe ya Isiraeri. Njosua aabaûragire bonthe na oomborania taûni ciao cionthe. 22 Gûtirî muntû nwa ûmwe wa antû babu beetagwa Anaki aatigara nthîgûrû ya antû ba Isiraeri. Îndî kûrî baakai baatigarire nteere cia Gasa, Ngathi, na Asindondi.
23 Kwoogu Njosua aathûkiirie nthî yonthe, kûringana na bunthe bûra Mwathani aathîîte Musa. Njosua amînenkanîra kîrî antû ba Isiraeri îtuîka yao na amîgaania tûcuncî tûcuncî, wa kîra mwîrîga gacuncî kamwe. Kwoogu nthîgûrû yaanogoka ndûa.