Ndûa ya Isiraeri na Moabu
3
1 Mwankaani wa îkûmi na înaana wa wathani bwa Njeosafati mûnene wa Njunda, Njoramu mwana wa Aabu atuîka mûnene wa Isiraeri na aathanaga arî Samaria mîanka îkûmi na îîrî. 2 N'arûthire mantû maarî maathûûku mbere ya Mwathani îndî ti ta bûra îthe na gina barûthîîte. N'enyangiirie itugî bia ngai ya ûrongo Mbaari bira îthe aarûthîîte. 3 Amwe na ûgu, athiire na mbere kûrûtha meeyia ta Njeroboamu mwana wa Nebati ûra aatûmire Isiraeri yîîyia, ataatigana namo.4 Mesa mûnene wa Moabu aarî gîtonga kîînene kîa ng'ondu na aabatîîrue areaga ûgooti akanenkera mûnene wa Isiraeri ng'ondu ngiri îgana rîmwe na guaya ya ntûrûme ngiri îgana rîmwe wa kîra mwanka. 5 Îndî rîra Aabu mûnene wa Isiraeri akuire, Mesa mûnene wa Moabu aûmîria mûnene wa Isiraeri kîongo. 6 Kwoogu mûnene Njoramu eethîrania njûûrî yonthe ya Isiraeri, aumagara Samaria. 7 Aatûmana kîrî Njeosafati mûnene wa Njunda na ntûmwa îkuuga, “Mûnene wa Moabu akwanjîîria kûûmbûmîria kîongo. Tûkaathi ûkangwatie kûrûa n'we.” Mûnene Njeosafati amûcookeria amwîra, “Yîî tûkaathi. Woû na niû tûrî gîntû kîmwe, na antû baakwa i ta baaku, na mbaraathi ciakwa cia ndûa i ta ciaku.” 8 Njeosafati amûûria, “Ûrîenda twanjîîria kwithûka mbarî îrîkû?” Njoramu amûcookeria amwîra, “Tûkaathi njîra ya kûgitîîra rwanda rwa Endomu.”
9 Kwoogu Njoramu mûnene wa Isiraeri na anene ba Njunda na Endomu baanjîîria kûthi. Nyuma ya bakûthi rûgendo rwa ntugû mûgwanja, baagia rûûyî rwa kûnyuîgwa n'antû kana i gîkundi kîa nyamû ira baarî nacio. 10 Rîru Njoramu mûnene wa Isiraeri aakaya akiugaga, “Tûkûrîîkanua naati! I ka Mwathani atwîta tûrî anene bathatû akî, atûrekeeria njaraani cia mûnene wa Moabu?” 11 Mûnene Njeosafati aûria, “Gûtirî na kîroria aaga tûûmba kûûria Mwathani mantû gûkûrûkîîra kîrî kîo?” Ûmwe wa atongoria ba njûûrî ya mûnene Njoramu wa Isiraeri amûcookeria amwîra, “Erisa mwana wa Safati ûra aarî mûteetheeria wa Eriya arî aaga.” 12 Njeosafati mûnene wa Isiraeri auga ata rî, “Gîku i kîroria kîa mma.” Kwoogu Njeosafati na anene babu bangî baîrî baathi kîrî Erisa.
13 Erisa aûria mûnene wa Isiraeri, “N'ata ûkwenda naani? Îthi kîrî iroria bia abaagu kana bia nyûkwe.” Njoramu amûcookeria amwîra, “Arî, i Mwathani atwîtîîte tûrî anene bathatû atûneenkanîra njaraani cia mûnene wa Moabu!” 14 Erisa auga, “Wa ta bûra Mwathani wa Njûûrî ûra ntûmîkagîra atûûraga mwoyo, ûra ntûmîkagîra, tatiga bûra ngûtîîya Njeosafati mûnene wa Njunda, ntigîtindanîra na kûbûraithîîria kana mbwona. 15 Îndî îîndî, ndeteraani mûringi wa kînanda.” Rîra mûringi wa kînanda aariingire kînanda, inya ya Mwathani yendamîîra Erisa. 16 N'we auga, “Ûûgû i bu Mwathani akuuga, ‘Ngaatûma kîguuru gîkî kîûyûra maria ma rûûyî. 17 Kinya wegua bûtiona kîbuubani kana mbura, kîguuru gîkî gîkaûyûra rûûyî, naabi amwe na nyamû cienu cia ndîîthia amwe na nyamû ira ciingî cienu bûkaanyua rûûyî rwa kûgana.’ ” 18 Erisa aathi na mbere kuuga, “Bûbû n'ûntû bûûthû bwa Mwathani kûrûtha, n'ûntû kinya akaanenkanîra antû ba Moabu njaraani cienu. 19 Bûgaatura taûni cionthe ira mbirigîre na nthingo cia maiga, na bûteme mîtî yonthe îra mîega, na bûthike ithima bionthe bia rûûyî na miinda yao yonthe îra mîega bûmîînyangie na njîra ya gûtûûra maiga ku.” 20 Rûûni rûkîîrî, mathaa mara ma kûruta kîgongwana, rûûyî rwaya kîthûngûthûngû ruumîîte bwa Endomu, mwanka nthîgûrû yonthe yaûyûra rûûyî.
21 Rîra antû bonthe ba Moabu beegiirue atî anene babu bathatû i bayîîte kûbaithûkîra, antû arûme bonthe bara bakîûmba gûkamata into bia ndûa, kuuma ûra mûkûrû mwanka ûra mûniini, i beetirwe na baigwa mwankaani beethuuranîîte kûrûa. 22 Rîra baûkîîre rûûni rûkîîrî, riûa i rîayicaga rûûyîîni, na rwonekanaga rûrî rûûtuune ta nthakame. 23 Bauga, “Îno i nthakame! Nwa mwanka wîgue njûûrî ira ithatû cia anthû n'irûire na ciaûragana! Ga tûthi tûgatae into kambîîni yao!” 24 Îndî rîra antû ba Moabu baakinyire kambîîni ya antû ba Isiraeri, antû babu ba Isiraeri baumania nabo babatura baugia baakuthûka. Beengana nabo, bakîbang'eeraga mwanka baathûûngîra nthîgûrû ya Moabu na beenyangia kîra gîntû. 25 Na beenyangia taûni cia Moabu wa bûra bakûrûkagîîra mîndaani îmînoru, kîra Mûisiraeri aageraga iiga ku mwanka mûthiani mînda înu yonthe yaûyûra maiga matheri. Baathika ithima bia rûûyî bionthe na baatemanga mîtî ya matunda yonthe. Nyuma ya kûrûtha ûgu ageri maiga na ikûtha bathiûrûkîra na baithûkîra taûni ya Kiri-Aresethi îra yaatigeere.
26 Rîra mûnene wa Moabu aamenyire atiûmbana ndûani, aathûkiirie antû magana mûgwanja ba kûrûa na ndûûyiû kaingo bamûteethia gûkûrûkîîra gatîgatî ka njûûrî cia anthû, akinyîra mûnene wa Endomu, îndî bataûmbana. 27 Kwoogu aathûkia kîîmbere gîake kîa nthaka, ûra aarî agaatuîka mûnene bantû aake, amûruta kîrî kîgongwana rûthingooni rwa taûni kîrî ngai wa Moabu. Nabu ûntû bûbu bwathûûria antû ba Isiraeri mûno, kwoogu bamûtiganîria na baacooka kwao.