OSEA
1
1 Ino i cio ntûmwa ira Mwathani aaneenkeere kîroria Osea mwana wa Beeri magiita mara Usia, Njothamu, Aasi, na Esekia, bathiingateene, baarî anene ba gîteere kîa Njunda, na rîra Njeroboamu mwana wa Njeoasi n'we aarî mûnene wa gîteere gîa Isiraeri.Kûrega wîtîgîka gwa Isiraeri na wîrane bwa gûcookanîîrua
2 Rîra Mwathani aanjîîrie gûtûma Osea kîrî antû ba Isiraeri, aamwîrire, “Îthi ûgûre îrwaya rîa mûka rîrî na twana twarîo twa ûmaraaya. N'ûntû ûntû bûbû bûkeegua bûkîonania bûra antû baakwa ba Isiraeri baantiganîîrie baatuîka antû batarî eetîgua.”
3 Kwoogu Osea aagûra Ngomeri mwarî wa Ndiburaimu, na aagea nda amûciarîra kaana ga kaîyî. 4 Na Mwathani amwîra, “Geete Njesireeri n'ûntû imbengeerie kwaa antû ba mûciî wa Njeû îkaanûkia n'ûntû bwa ûûragani bûra aûraganire Njesireeri, na nkaathiria ûnene bwa antû ba Isiraeri. 5 Na ntugû înu, nkathirîria njûûrî ya ndûa ya Isiraeri inya kîbondeeni kîa Njesireeri.”
6 Ngomeri aagea nda kaîrî. Aaciara kaana ga kaarî. Na Mwathani eera Osea, “Geete Ro-ruamaa n'ûntû ntiîgîîrua antû ba Isiraeri kîao, kana mbarekera meeyia maao. 7 Îndî niû Nkeegîîrua antû ba Njunda kîao, na nkabakûûra n'ûntû ndî Mwathani Ngai wao. Nkaabakûûra kîrî anthû baao îndî ti na ndûa ya mîgwî, kana mpiû kana na mbaraathi cia ndûa, kana na antû bara bathiithagia nkaarî cia mbaraathi cia ndûa.”
8 Ngomeri agûtiga gwonkia Ro-ruama, aagea na nda kaîrî na aaciara kaîyî kangî. 9 Mwathani auga, “Geete Ro-amib n'ûntû biû Isiraeri bûtirî antû baakwa, naani ntirî Ngai wenu.”
10 Îndî kûrî îgiita rîgaakinya antû ba Isiraeri baingîe mûno bakare ta mûthanga wa îria. Wîgue batiitarîka! Wîgue ara kwerîîtwe, “Bûtirî antû baakwa,” nwa woogo bageetîrwa, “Bûrî aana ba Ngai ûra atûûraga mwoyo.” 11 Rîru antû ba Njunda na ba Isiraeri bagwatanîre na beethuurîre mûnene ûmwe, rîra bagaacooka kuuma nthîgûrû iingeni. Ntugû ya Njesireeric îkeegua îrî ntugû înene mûno!