Ngai agaakaanûkia itonga bira biinyagîîria antû
2
1 N'ata ûkeegua kûrî na thîîna kîrî bara baraaraga batarî toro bakîbaangaga mîbango îmîthûûku! Bara baraûkaga gacaitîrî baugîîtie kûrûtha mûbango unthe ûmûthûûku ûra baûmba kûrûtha. 2 Rîra bakwenda kîthaka, ibatuunyanaga kîo. Na nyomba bakathûkia. Beenagîîria antû bakathûkia mîciî na rûgai rwao.3 Kwoogu ûûgû i bu Mwathani akuuga: “Iimbangîîte kûreeta mpanga mûciî wenu na bûtiimonyia! Na nyuma ya ûgu, gûtirî we wa cienu akooro eekumia kaîrî.
4 “Ntugûûni înu anthû beenu bakabûthekeera bakiinaga rwîmbo rûrû rwa kîrîro îgûrû rîa mantû mara bûkûrûkîîrîte:
Îî tûkûthira kûrû,
twenyangua kûrû!
Ngai akûthûkia nthî yetû,
amîthûkia kuuma kîrî tiû.
Abinenkanîra kîrî bara baatûkunyanîîre.”
5 Na kwoogu, îgiita rîakinya rîa antû ba Ngai gûcookerua nthîgûrû yao gûtirî kîo bûkoona ku.
Iroria bia ûrongo
6 Antû bariuga, “Ûtikaarorie mantû ta mamu, n'ûntû mantû ta mamu matikooro matûûyîîra.”
7 Ibûbatîîrue kwaria ûgu, nyomba ya Isiraeri? Mwathani akaûmîîria mûtugo ta ûyu? Bwarûtha bûra kûbatîîrue, Mwathani akabûrûthîra mantû meega. 8 Ntugûûni ino antû baakwa bagarûkîîte baatuîka antû baathûûku, n'ûntû batuunyaga akûrûki na njîra batarî na thîîna nguo ciao ira ndaaya bateerîgîîrîîte kana bakaithûkîrwa. 9 Bwîngatîîtie aka ba antû baakwa kuuma mîciî yao îmîthongi. Bwatuunya aana baao biewa bira beetwe i Ngai tene na tene. 10 Umaani aaga bûthi, aaga ti bantû eenu a gûtûûra, n'ûntû bantû aaga arî na mûgiro, na akaathirua, athirue kûrû. 11 Kîroria kîûyûrîîtwe n'ûrongo gîkaaya kûbwîra, “Inkûbûnenkera wîrane bwa ithaarimo bia ndibei na ncoobi!” gîku nwakîo kîroria kîa mûthemba ûra bwenda!
Wîrîgîîro bwa gûcookanîirua
12 Mwathani ariuga, “Na mma, nkeethîrania baakai beenu bara bûtigeere, îî Isiraeri. Nkabûcookanîria ta ng'ondu kiugûûni, ta ndîîthia rûriîni rwacio. Îî, nthî yenu îkaûyûrwa kaîrî i gîtuma gîa kîrîndî kiingî! 13 Mûtongoria ûra aunangaga bira bibarigagîîria akabatongoria kuuma naara barî agwate, bakaabunjia baumagarûke na mîîrîga, bathi. Mûnene wao akabatongoreria, Mwathani wengwa n'we akaaboonia njîra.”