‏1 ئمشيد شملن ئݣنوان د واشال د كول ماي ديسن ئلّان.

‏2 ݣ واسّ ويسّ سبعا، يوفاد لحال ربّي ئشمّل أينّا ئݣا كول، داي ئسݣونفا ربّي ݣ واسّ نّا.

‏3 داي ئبارش ربّي أسّ ويسّ سبعا، ئݣيت د وينّس^a. ئدّخ أسّ نّا ؤر-ئݣي ربّي أݣد ئميق زݣ لخدمت نّس.

‏4 أياد أيد-ئݣان لقيست ن-ؤعدّول ن-ئݣنوان د واشال.

‏5 سولن ؤر لّين ئسكلا ن لخلا ݣ واشال، د مايد ئݣان أحشلاف ن لخلا ئسول ؤر د-ئمغي كول، ئدّخ ئسول ؤر ئلّي شا ؤرݣاز ن غا ئكرزن أشال أها ئسول مولانا، ربّي نّخ ؤر د-يسوݣّز أنژار خف واشال.

‏6 ماشان تلّا تاݣّوت دا تتّالي زݣ واشال أها أر تسوّا كول ؤدم ن واشال.

‏7 داي ئعديل مولانا، ربّي نّخ أرݣاز زݣ تاتشا، أها ئصوض ݣ تينزار نّس س-ؤنفوس ن تودرت، داي ياغول ؤرݣاز ئݣ لموخليقت ئدّرن.

‏8 أها ئݣ مولانا، ربّي نّخ يون ن-ؤرتو ݣ تمازيرت ن عدن تانيلا ن-ؤنقّر ن تافوشت. ئسّزدغ ديكس أرݣاز نّا ئعديل.

‏9 أها ئسّمغيد ديكس مايد ئݣان أسكلو ئژيلن ݣ-ؤراعا، ياتفوضن ݣ-ؤتشي. ئلين سين ن-ئسكلا ݣ وامّاس ن-ؤرتو: أسكلو ن تودرت د-وسكلو ن توسنا ن-ؤينّا ئژيلن د-ؤينّا ؤر-ئحلين.

‏10 داي زݣ تمازيرت ن عدن دا ئتفّغ يون ن واسيف دا ئسوّا ؤرتو، أها زݣ سّييس دا يوطو خف ربعا د-ئسافّن:

‏11 ئسم ن يون فيشون، نّا ئضورن يي تمازيرت كول ن حوّيلا نّاݣ-ئلّا دّهب، ^b

‏12 ݣ تمازيرت-اد دّهب ئصفا. ئلين ديكس ئݣدجيݣن ن ماورد ئژيلن د زوزو.

‏13 أسيف ويسّين ئسم نّس جيحون، ئضور يي تمازيرت ن كوش كول.

‏14 أسيف ويسّ شراض ئسم نّس دجلا، ^c ئكّا خف تمناطّ ن-ؤنقّر ن تافوشت يي تمازيرت ن-أشور. ئد أسيف ويسّ ربعا ئسم نّس لفورات.

‏15 ياسي مولانا، ربّي نّخ أرݣاز ئسيرست ݣ-ؤرتو ن عدن حما أت تيكرز أها ئحضوت.

‏16 داي يامّر مولانا، ربّي نّخ أرݣاز، ئنّاياس: «تّش زݣ ئسكلا ن-ؤرتو كول أينّا تريد،

‏17 غاس أسكلو ن توسنا ن-ؤينّا ئژيلن د-ؤينّا ئخان. غوراش أد زيكس تتّشد، ئدّخ أسّ ݣ زيكس تتّشيد، تدّيد أت تمّتّ».

‏18 داي ئنّا مولانا، ربّي نّخ: «ؤر ئژيل شا أد ييلي ؤرݣاز غاس نتّا. ئخصّا أد-اس ݣخ يوت ن تشريكت ن غا س-ئعاون».

‏19 أها ئعديل مولانا، ربّي نّخ زݣ تاتشا مايد ئݣان لوحش د مايد ئݣان ئجضاض ن-ئݣنّا. أها ياويتنيد غر أرݣاز حما أد ييسين ماتّا ئسماون نّا سن ئتݣّا. كول مايد ئدّرن أد-ئتوسمّا س-ئسم نّا س-ئݣا ؤرݣاز.

‏20 أها ئݣ ؤرݣاز ئسماون يي مايد ئݣان لبهايم د-يجضاض ن-ئݣنّا د مايد ئݣان لوحوش ن لخلا. والاينّي أرݣاز ؤر يوفي شا ن تشريكت نّا غا س-ئعاون.

‏21 داي ئسّݣن مولانا، ربّي نّخ أرݣاز يون ن-ؤنودّم ئژّاين. لّيݣ ئݣن، ياسي مولانا، ربّي نّخ يوت ن تغزديست زّيكس، أها ئعمر أدغار نّس س-ؤكسوم.

‏22 س تغزديست نّا يوسي زݣ ؤرݣاز، ئعيدل مولانا، ربّي نّخ يوت ن تمطّوطّ أها ياويتيد يي ؤرݣاز.

‏23 غاس يانّايت ؤرݣاز ئنّا: «هان تاد دغي تݣا ئغصّ زݣ ئغصان ئنو د-ؤكسوم زݣ ؤكسوم ئنو، تاد أد-ئݣ ئسم نّس تامطّوطّ، ئدّخ تتواسي زݣ ؤرݣاز». ^d

‏24 أياد أخفّ دا ئتّادجا ^e ؤرݣاز ئبّاس د مايس أها ئمّزداي د تمطّوطّ نّس، أغولن سّينّ نسن ݣين يوت ن صّاحت.

‏25 ييلي ؤرݣاز د تمطّوطّ نّس حژّوضي ماشان ؤر حشّيمن.