5 యెహోవల్ అబ్రామున్ డేరత్ బహ్రి తచి, “హాబడెకె సూడ్సి, నీ సంగ ఆయర్తె అవ్ సుకుకున్ కహ.

అహ్నె నీవ సంతాన్ గిర్ కహ పర్వి అచొర్ ఆసి దాయర్” ఇంజెర్ ఇత్తొర్.

6 తె అబ్రామ్ యెహోవ బగవంతన్ పొరొ బరొస ఇర్తొర్.

అద్ బరొసతున్ హిందలె వోన్ నియత్నొర్ ఇంజెర్ బగవంతల్ వొప్తొర్.

7 అని యెహోవల్ అబ్రామున్ సంగ, “ఇద్ దేసున్ నీకున్ సియన్ సాటినె, కల్దియుల్క్‌న (బాబిలోనియ) దేస్న, ఉర్ ఇన్వల్ నగుడల్ బహ్రి తత్తొన్” ఇంజెర్ ఇత్తొర్.

8 బతి అబ్రామ్, “యెహోవ బగవంత! ఇద్ దేస్ నావ సొంతమ్ ఆంత ఇంజెర్ నాకున్ బహన్ కరె మాయర్?” ఇంజెర్ పూసి కీతొర్.

9 తె బగవంతల్, “మూంద్ సాల్క్‌న పడ్డ, మూంద్ సాల్క్‌న హెరె, మూంద్ సాల్క్‌న గొరె బోకుడ్, ఉంది పురడ్ అని ఉంది పారెవతున్ నహ్గ పియ్సి వర” ఇంజెర్ వెహ్తొర్.

10 అస్కె అబ్రామ్ అవ్ సమ్దిన్ పియ్సి వాతొర్.

అవెనగటల్ ఉంది ఉంది జన్వర్‌తున్ రండ్ టుక్డెంగ్ కీసి, ఉంది టుక్డెతున్ మునె ఉండె ఉంది టుక్డె ఇర్తొర్.

బతి పురడున్ అని పారెవతున్ మాత్రమ్ రండ్ టుక్డెంగ్ కియ్మకి.

11 అవెన్ తిందన్ సాటి రాయలిక్ రెయ్తంగ్.

బతి అవ్ రాయలికున్ అబ్రామ్ తెహ్చి పూడ్తొర్.

12 అద్ నేటి పోడ్ద్ సొనెకె, అబ్రామున్ చొకొట్ జోప్ పియ్త.

అస్కె అగ బెయ్ కహ్చర్ సికటి ఆత.

13 అస్కె యెహోవ బగవంతల్ అబ్రామున్ సంగ, “మొదొల్ నీవ సంతాన్దుర్ దుస్రొ దేస్నె దాంతెర్.

అద్ దేస్నుర్ వీర్ ముసపరి వాలిర్కున్ నాలుంగ్ నుహ్క్ (400) సాల్క్ దుక్స సీసెర్ దాసి-పాన్దె ఇరంతెర్.

14 అహన్ దాసి సంతాన్దుర్ ఇగె దన్-దవ్లత్‌నె మల్సి వాంతెర్.

15 నిమె బెయ్ వెడిల్ ఆనల్ వేరి పిసంతి.

నిమె సాంతితె పరన్ సుటి కీంతి.

16 నాలుంగ్ పిడింగ్ ఆత పెజె, నీవ సంతాన్దుర్ ఇద్ దేస్నె మల్సి వాంతెర్.

బారితెకె అమొరి జాతితుర పాప్ పండంత.

అస్కె వూర్కున్ సిక్స సీంతొన్” ఇంజెర్ వెహ్తొర్.

17 పోడ్ద్ సొంజి, సికటి ఆత పెజె, జన్వర్‌క్నంగ్ టుక్డెన్ నడ్డుమ్నల్ రమ-రమ గొక్కనె పోయ పెసివల్ వేర్ని అని జగర్నె వేడ్చి సియ్వల్ డివ్టి వీడ్సెర్ సొన్వల్^* వోన్ దిస్త.

18-21 అద్ నేటి యెహోవ బగవంతల్ అబ్రామున్ సంగ నియమ్ ఇర్సి, “ఈజిప్ట్ దేస్న లవిడల్తె, యుప్రటిస్ లవ్డి వేరి, కెనియుల్క్, కెనిజియుల్క్, కద్మానియుల్క్, హిత్తియుల్క్, పెరిజియుల్క్, రెపాయిమియుల్క్, అమొరియుల్క్, కనానియుల్క్, గిర్గసియుల్క్, యెబుసీయుల్క్ ఇన్వలిక్ జాతింగ్ మన్వల్ దేసున్ నీ సంతాన్దున్ సీంతొన్” ఇంజెర్ వాగ్దన్ సీతొర్.