దేస్నుర్ చొకొట్ మందన ఇంజెర్ కియ్వల్ పార్తన
పాట వారుస్వన్ సాటి: కొరహున సంతాన్దుర్ వార్త కీర్‌తన్
85
1 యెహోవ దేవ, నిమె నీ దేసెమున్ పొరొ దయ తొహ్తి.యాకొబ్న సంతాన్దున్ సాటి సమ్దొ చొకొట్ జర్గుసీతి.
2 నీ పర్జతంగ్ తప్కున్ మాపి కీతి.
అని వూరంగ్ సమ్దొ పాప్కున్ మాపి కీతి.
రేల.
3 నీవ పూరొ సోంగున్ రోకి కీతి.
నీవ సోంగ్ ఇన్వల్ తడ్మితున్ పిహ్చి వాడ్తి.
4 మాకున్ బచి కియ్వల్ బగవంత!
మొదొల్ మత్తపినయ్ మాకున్ సుద్రన్ కీమ్.
మా పొరొ మన్వల్ నీవ సోంగున్ రోకి కీమ్.
5 బస్కెట్ మా పొరొ సోంగున్ వాంతి కి?
పిడినంగ్ పిడింగ్ నిమె సోంగ్ పియ్సి మందంతి కి?
6 నీ పర్జ నీవ గొస్టితున్ పియ్సి ఆనంద్ యేత్నల్
మాకున్ పూన జిన్గని సియ్వి కి?
7 యెహోవ దేవ, నీవ మారియొ అద్ పెర్మతున్ మాకున్ తొహ.
నీవ బచి కియ్వల్ కార్య మా సాటి జర్గుస.
8 బగవంతల్ ఆయ్వల్ యెహోవ దేవల్ వెహ్వల్ గొస్టితున్ నన కేంజంతొన్.
వోర్ తన్వ పర్జ అని తన్వుర్ బక్తలిర్ బహ్కె మాయ్వక్ మందన ఇంజెర్
చొకొట్న వచన్ వెహంతొర్.
9 తన్వ బావ్-బక్తిత వెరె మన్వలిర్‌కున్ వోర్ వెయ్నె బచి కీంతొర్.
అస్కె వోన మయ్మతె మా దేస్ పూరొ నించి మందంత.
10 మారియొ అద్ పెర్మ అని సతెమ్ మీరె మాసి మంతంగ్.
నియత్ అని సాంతి ఉందితున్ ఉంది తొడ్డి బుర్తంగ్.
11 బొమితల్ సతెమ్ పిరంత.
ఆగస్నల్ నాయమ్ బూడ్ సూడంత.
12 యెహోవ దేవల్ మాకున్ ఆసిర్‌వాద్క్ సీంతొర్.
మావ బొమి తాన పండి అదిక్ సీంత.
13 నియత్ వోన్ మునె మునె తాకంత.
వోర్ దాపింగ్ వాట్లె సరి తయర్ కీంత.