సార్దిస్‌నగ మన్వల్ చర్చితుర్ సాటి వచన్
3
1 “సార్దిస్‌నగ మన్వల్ చర్చితురొర్ దూతన్ లిహి కీమ్.
బగవంతనంగ్ యేడుంగ్ ఆత్మంగ్ మన్వల్ అని యేడుంగ్ సుకుక్ మన్వల్ ఇహిన్ వెహ్చెర్ మంతొర్:
“మిరట్ కియ్వలిక్ కామ్క్ నాకున్ టావ.
మిరట్ జీవతె మంతిట్ ఇన్వల్ పొరొల్ మంత బతి, సాతపినయ్ ఆసి మంతిట్.
2 తె దిహన్తె మంజి, మిహ్గ బతల్‌తె ఇచుసి మెయ్సి మంతయొ, అదెన్ కాబాడ్సి బడె మానల్ సూడట్.
బారితెకె నా బగవంతన నదుడె మిరట్ కియ్వలిక్ కామ్క్ ఉండె గిర్ బర్పుర్ ఆయ్లెకె మంతంగ్.
3 మిరట్ బగవంతన బోదతున్ బహన్ కేంజ్తిటొ అని బహన్ వొప్తిటొ హేతు కీమ్ట్.
అదెన్ తీర్ తాకట్ అని చుక్ చుకె మామ్ట్.
బతి మిరట్ దిహన్తె మన్వెకె దాకిట్‌తె, వొరొర్ కలెన్ మోడి అచనక్ వాతపినయ్, నన గిర్ మిహ్గ వాంతొన్.
నన మిహ్గ వాయ్వల్ గట్క మీకున్ అసలె టావ సెలె.
4 “బతి మిహ్గటల్ కహితుర్ గల్తి కామ్క్‌నగ కోండె మాయ్వక్, తమ్వంగ్ పాంగుకున్ పొరొ పాప్న డాగ్ సెల్వక్ మంతెర్.
వూర్ కామిసియ్వలిర్ ఆత కాడ్కి, దవ్రలిక్ పాంగుక్ పోండ్సి, నా బరొబర్ తాకంతెర్.
5 కరబున్ మెయ్వన్, అద్ తీర్దె దవ్రలిక్ పాంగుక్ పోండుస్వల్ జర్గంత.
స్వర్గ్‌నగ బస్కెట్ జీవతె మన్వలిరంగ్ పొరొల్క్ మన్వల్ జీవత గ్రంత్‌నల్ వూరంగ్ పొరొల్కున్ నాసి కియొన్.
నన వూర్కున్ నావుర్ ఇంజెర్ నా బాబొన్ మునె, వోనుర్ దూతలిర్ మునె వొపంతొన్.
6 “బగవంతన ఆత్మ చర్చితుర్ సాటి వెహ్వడున్ అర్తమ్ కీక ఇన్వల్ దిహన్తె కేంజన!
పిలదెల్పియతగ మన్వల్ చర్చితుర్ సాటి వచన్
7 “పిలదెల్పియతగ మన్వల్ చర్చితురొర్ దూతన్ లిహి కీమ్.
పవిత్రవంతల్, సతెవంతల్ అని దావిద్న కుంజి* మన్వల్, తెరితొర్ ఇత్తెకె తాన్ బోరె ముహ పరుర్.
అని వోర్ ముహ్తొర్ ఇత్తెకె, బోరె తెరియ పరొర్.
వోర్ ఇహిన్ వెహ్చెర్ మంతొర్:
8 “మిరట్ కియ్వలిక్ కామ్క్ నాకున్ టావ.
ఇచుల!
జిగి సెల్వక్ మనెకె గిర్, మిరట్ నావ వచన్ తీర్ తాక్తిట్.
అని నావ పొరొల్డున్ సాటి గవదార్క్ ఆసి మంతిట్.
అదెన్ సాటి మీ మునె నావ కావడ్ తెరిసి ఇర్తొన్.
అదెన్ బోరె ముహ పరుర్.
9 కేంజట్!
తమ యూదుల్క్ ఆయ్వెకె గిర్ యూదుల్క్ ఆందుమ్ ఇన్వలిర్, సయ్తన్‌ద బాజ్నుర్ మీవంగ్ కాల్క్‌నగ ముర్-టొంగ్రంగ్ కొట్సి, మాని కీనల్ కీంతొన్.
అస్కె నన మీకున్ బచొర్ పెర్మ కీంతొనొ, వూర్ కరి కీంతెర్.
10 “మిరట్ తక్‌లిబ్కున్ వోర్చెర్ మునె దాయన ఇంజెర్ ఆగె సీతొన్.
అద్ ఆగె పియ్సి తాక్త కాడ్కి, పరిక్స కియ్వల్ గట్కతె మీకున్ బచి కీంతొన్.
ఇద్ పరిక్స కియ్వల్ గట్క దునియతుర్ సమ్దిర్ పొరొ వాయ్వల్ మంత.
11 కేంజట్!
నన సప్నె మల్సి వాయ్వన మంతొన్.
మీకున్ పుట్వల్ ఇనమ్న కిరిటున్ బోరె కల్వక్ మనల్, ఇంకె మిరట్ పియ్సి తాక్వలికున్ ఉండె గట్ పియ్సి తాకట్.
12 ఇహిన్ కరబున్ మెయ్తుర్‌కున్, నావొర్ బగవంతన మందిర్తగ మొగ్రమ్‌కున్ మోడి ఇరంతొన్.
అద్ జాగతున్ సుటి కీసి, వూర్ బేకెన్ సొనుర్.
నన నావొర్ బగవంతన పొరొల్ అని నా బగవంతన నగుర్ ఆయ్వల్ పూన యెరుసలెమ్న పొరొల్, వూర్ పొరొ లిహి కీంతొన్.
ఇద్ యెరుసలెమ్ స్వర్గ్‌నగ మన్వల్ నా బగవంతనల్ రెయ్సి వాంత.
నావ పూన పొరొల్ గిర్ వూర్ పొరొ లిహి కీంతొన్.
13 “బగవంతన ఆత్మ చర్చితుర్ సాటి వెహ్వడున్ అర్తమ్ కీక ఇన్వల్ దిహన్తె కేంజన!
లవొదికయతగ మన్వల్ చర్చితుర్ సాటి వచన్
14 “లవొదికయతగ మన్వల్ చర్చితురొర్ దూతన్ లిహి కీమ్.
ఇవ్ గొస్టిన్, ‘ఆమెన్’ ఇంజెర్ కేయ్వల్* అని వోన్ హిందలె కలితగ మన్వలిక్ సమ్దొన్ బగవంతల్ గడి కీతొర్, వోర్ బరొస వాలె అని కరల్ గవదారల్ ఇహిన్ వెహ్చెర్ మంతొర్:
15-16 “మిరట్ కియ్వలిక్ కామ్కున్ బారెతె నాకున్ టావ.
ఇవ్ కామ్క్ నహ్గ బర్పుర్ బరొస ఇర్సి కియ్వలిరన్ మోడి కాస్తంగ్ సెలెంగ్ అని నాకున్ ఉల్ట తిరివలిర్ కియ్వలికున్ మోడి కినన్ గిర్ సెలెంగ్.
బద్ తెర్ ఉంది తీర్దె మందన ఇన్వలె నావ ఇచ.
ఇత్తెకె యేతున్ మోడి కాస్త మన్వక్‌నె కినన్ మన్వక్‌నె నిస్తొ మలమల మంతిట్.
అదెన్ సాటి నా తొడ్దల్ మీకున్ బహ్రి ఉస్క్‌సి వాట్వన మంతొన్.
17 ‘మమొట్ దనెవంతలిర్ ఆందుమ్.
మహ్గ జాయ్జత్ వెలె మంత.
మాకున్ బతతయ్ కమి సెలె’ ఇంజెర్ మిరట్ ఇంతిట్.
బతి మిరట్ దిక్ సెలుర్ వూర్ ఆందిట్.
మీ పొరొ కివుల్ వానల్ మీవ గతి మంత.
మిరట్ గరిబ్-పాన్దె మంతిట్.
మిరట్ గుడ్డిర్ ఆసి మంతిట్ అని కుడెకెయ్ మంతిట్ ఇన్వలిక్ బవె మీకున్ టావ సెలె.
18 అదెన్ సాటి మీకున్ సూచన వెహ్వల్ బతల్ ఇత్తెకె, మోక మిరట్ దనెవంతలిర్ ఆకొమ్ ఇంద్కిట్‌తె, కొల్మితగ గరి కీత పివర్ సోనె నహ్గ మంత.
అదెన్ యేతట్.
అని మిరట్ కుడెక దిసి, మీవ హిజత్ సొన్వక్ మన్లె, పోండ్లె దవ్రలిక్ కప్డింగ్ నహ్గ మంతంగ్ అని మీవంగ్ కడ్కున్ సాటి మత్ గిర్ మంత.
అవెన్ నహ్గటల్ యేతట్.
అస్కె మిరట్ తాత్కర్ సూడ పరంతిట్.
19 నన లాడ్ కియ్వలిర్ సమ్దిర్‌కున్ దమ్కి సీసి, జరబ్నె ఇరంతొన్.
అదెన్ సాటి ఆసతె లహ్కి వర్సి, చుక్ చుకె మాసి మన్దున్ మార్యుసట్.
20 “ఇచుల!
నన కావడున్ కరుమ్ నిల్సి, తాపి కీసెర్ మంతొన్.
బోరె నావ లేంగ్ కేంచి, కావడ్ తెరితెకె, నన రొపొ సొంజి, వోన్ సంగ మీరె మాసి జేవున్ కీంతొన్.
21 నన కరబున్ మెయ్సి, నా బాబొన్ సంగ, వోన రాజ-గాదితగ ఉచ్చి మంతొన్.
అదె తీర్దె కరబున్ మెయ్తొర్ వోన్, నా సంగ నావ రాజ-గాదితగ ఉద సీంతొన్.
22 “బగవంతన ఆత్మ చర్చితుర్ సాటి వెహ్వడున్ అర్తమ్ కీక ఇన్వల్ దిహన్తె కేంజన” ఇంజెర్ వెహ్తొర్.