১ ইমাম হারুনর দুই পুয়ায় নাফরমানি করিয়া মাবুদর ছামনে পড়িয়া মরার বাদে, মাবুদে মুছা নবীর লগে বাতচিত করলা। ২ তাইন কইলা, “তুমার ভাই হারুনরে কও, আমার ঘরর ভিতরে পর্দার খরর হেরেম শরিফর শাহাদত সন্দুকর ছানির গেছে হে যানু যেবলা মনে চায় এবলা না হামায়, আরনায় হে মরবো। জানো তো, অউ ছানির উপরর মেঘর খুটির মাজে আমি নিজে আজির রই।

৩ “ইনো হামানির আগে হে যানু গুনার কফরার কুরবানির লাগি এগু বিছাল আর জালাইল কুরবানির লাগি এগু মেড়া লইয়া আইয়া হামায়। ৪ আর হে সুতি কাপড়র পবিত্র আলখেল্লা, এরলগে সুতির হাফ পেন্ট ফিন্দিয়া ভিতরে হামাইবো। তার কমরো বান্দার সুতি কাপড় বান্দিবো আর মাথাত সুতি কাপড়র পাউগড়ি লাগাইবো, ইতা তো পাক-পবিত্র লেবাছ, ইতা ফিন্দিবার আগে হে পানিদি নাইবো। ৫ গুনার কফরার কুরবানির লাগি হে বনি ইছরাইলর গেছ থাকি দুইটা ছাগল আর জালাইল কুরবানির লাগি এগু মেড়া নিবো। ৬ ইমাম হারুনে তার নিজর আর তার আওলাদ অকলর গুনার মাফির লাগি, গুনার কফরার বিছালরে কুরবানি দিবো। ৭ দিয়া হউ ছাগল দুইওটা লইয়া মিলন-তাম্বুর দুয়ারর গেছে মাবুদর ছামনে আজির অইবো। ৮ এরমাজে হে লটারি মারিয়া দেখবো, কুন ছাগল মাবুদর লাগি আর কুনটা আজাজিলর লাগি। ৯ লটারিত মাবুদর নামে যে ছাগল উঠবো, হারুনে অগুদি গুনার কফরার কুরবানি আদায় করবো। ১০ আর আজাজিলর নামে যে ছাগল উঠবো, অগুরে জিতা হালতে মাবুদর ছামনে থইবো, যাতে বাদে অগুরে মরুভুমিত নিয়া আজাজিলর নিয়তে আউরি ছাড়ি দেওয়া অয়। অউ নমুনায় গুনার কফরা পুরন অইবো।

১১ “ইমাম হারুনে তার নিজর আর তার আওলাদ অকলর গুনার কফরার লাগি, তার নিজর আনা হউ বিছালরে জবো করবো। ১২ মাবুদর ছামনর কুরবানি খানা থাকি আংরা থওয়ার পাতিলর মাজে হে জালাইল আংরা ভরবো, আর দুই মুইট আগর-খুশবয়র গুড়াও লইবো, লইয়া অতা হে পর্দার খরে হেরেম শরিফো হামাইবো। ১৩ হামাইয়া অউ আংরার পাতিলর উপরে আগর-খুশবয় দিয়া মাবুদর ছামনে জালাইবো, তেউ অতার ধুমায় শাহাদত সন্দুকর ছানির উপর আন্দাইর অইযিবো, এরলাগি হে মাবুদর ছামনে মরতো নায়। ১৪ বাদে হে কুরবানির হউ বিছালর থুড়া লউ নিয়া আতর আংগুইল দিয়া ছানির ছামনর গালাবায় ছিটাই দিবো। এরবাদে আংগুলির মাজে আরো থুড়া লউ লাগাইয়া ছানির ছামনে সাত বার ছিটাইয়া দিবো।

১৫ “আর হে মানষর গুনার কফরার নিয়তে আনা ছাগলটারে জবো করবো, করিয়া অগুর লউ নিয়া পর্দার খরর হেরেম শরিফো গিয়া, বিছালর লউদি যেলা করা অইছিল, অগুর লউদিও অলা করতে অইবো। সন্দুকর ছানির উপরে আর ছামনে অউ লউ ছিটাইতে অইবো। ১৬ বনি ইছরাইলর গুনা, নাপাকি, আর নাফরমানিয়ে হেরেম শরিফরেও নাপাক করিলায়, এরলাগি তারার মাজে যে মিলন-তাম্বু আছে, অখানর নাপাকি হরানির নিয়তে ইমাম হারুনে অউ নমুনায় গুনার কফরা আদায় করবা। ১৭ হেরেম শরিফর ভিতরে হামাইয়া হারি হারুনে তান নিজর, তান আওলাদ অকলর আর আস্তা সমাজর গুনার কফরার কাম শেষ করিয়া যতবিল না বার অইয়া আইন, অতবিল দুছরা কুনু মানুষ মিলন-তাম্বুর ভিতরে হামানি নিষেধ। ১৮ অখান থাকি বার অইয়া আইয়া হারুনে মাবুদর ছামনে যে কুরবানি খানা আছে, হনো গিয়া হউ কুরবানি খানার লাগিও কফরা দিয়া পাক-পবিত্র করবা। হউ বিছাল আর ছাগলর থুড়া লউ নিয়া তাইন কুরবানি খানার হিংগর মাজে লাগাইবা। ১৯ কুরবানি খানারে পাক-ছাফ করার নিয়তে, আর অখানর উছিলায় আস্তা বনি ইছরাইলর নাপাকিরে পাক-ছাফ করার খিয়ালে হে তার আতর আংগুইল দিয়া অখানর উপরে সাত বার লউ ছিটাইবো।

২০ “হেরেম শরিফ, পবিত্র কাবা ঘর, আর কুরবানি খানার নাপাকি হরানির কফরার কাম শেষ করিয়া হারলে হারুনে আজাজিলর নামর হউ জিতা ছাগল লইয়া আইবা। ২১ আইয়া অউ ছাগলর কল্লার উপরে তার দুইও আত থইয়া, বনি ইছরাইলর হকল গুনা-নাফরমানি আর বদ কামর কথা স্বীকার করিয়া ছাগলর কল্লার উপরে অতা বর্তাই দিবো। বাদে আগ থাকি জুইত অওয়া এক বেটারে দিয়া অউ ছাগলরে হে মরুভুমিত পাঠাই দিবো। ২২ হউ বেটায় নিয়া অগুরে মরুভুমিত ছাড়িয়া আইবো। তারার হকল নাফরমানিরে অউ ছাগলে নিরাই-নির্জন মরুভুমিত লইয়া ঘুরিবো।

২৩ “আর হেরেম শরিফো হামাইবার কালো হারুনে সুতি কাপড়র যতো লেবাছ ফিন্দিছলা, তাইন মিলন-তাম্বুত ফিরিয়া আইয়া ইতা খুলিয়া থই দিবা। ২৪ খুলিয়া তাইন কাবা ঘরর সীমানার ভিতরে পানিদি নাইয়া তান নিজর লেবাছ ফিন্দিবা। বাদে তাইন বারে আইয়া তান নিজর আর মানষর লাগি এগু করি জালাইল কুরবানি আদায় করিয়া, তান নিজর আর মানষর গুনার কফরাও আদায় করবা। ২৫ গুনার কফরার কুরবানির চর্বিরে তাইন কুরবানি খানার উপরে জালাইলিবা। ২৬ যে বেটায় আজাজিলর নামর ছাগলরে মরুভুমিত ছাড়িয়া আইবো, হে-ও তার কাপড়-চুপড় ধইয়া হারি পানি দিয়া নাইয়া বাদে কেম্পর ভিতরে হামাইতো পারবো। ২৭ গুনা মাফির লাগি গুনার কফরার কুরবানির যে বিছাল আর ছাগলর লউরে হেরেম শরিফো নিবার হুকুম দেওয়া অইছে, অতার হকল গোস্ত, খাল, গুফর আর হকলতারে কেম্পর বারে নিয়া একজনে জালাইলিও। ২৮ যে জনে ইতা হকলতা বারে নিয়া জালাইবো, হে-ও তার কাপড়-চুপড় ধইয়া, পানিদি নাইয়া হারি বাদে আইয়া কেম্পর ভিতরে হামাইতো পারবো।

২৯ “এরবাদে আমি যেতা কইরাম, ইতা অইলো তুমরার লাগি হর-হামেশাকুর নিয়ম। পরতেক বছরর সাত নম্বর চান্দর দশ নম্বর দিন, তুমরার পরতেক জনে দিলে-জানে কাতর অইয়া, হকল জাতর কাম-কাজ, রুজি-রুজগার বাদ দিয়া আল্লার দরবারো কান্দা-কাটি করবায়। বনি ইছরাইল বা তুমরার লগে বসত কররা ভিন-দেশি হকল জনে ইতা মানতে অইবো। ৩০ কারন অউদিন তুমরার গুনা মাফির লাগি গুনার কফরা আদায় করা অইবো, তেউ তুমরা মাবুদর ছামনে হকল নমুনার গুনা থাকি পাক-ছাফ অইবায়। ৩১ অউদিন তুমরা হকল নমুনার কাম-কাজ বাদ দিয়া আরাম করবায়, পরতেকে যারযির দিল সপিয়া কাতর অইয়া আল্লার দরবারো ফানা মাংগিবায়। ইটা অইলো তুমরার লাগি চিরকালিন নিয়ম। ৩২ যেকুনু ইমামরে যেবলা পরধান ইমাম হিসাবে তার বাফর জাগাত বওয়াল করা অইবো, হে-ও অলা সুতি কাপড়র পবিত্র লেবাছ ফিন্দিয়া অউ নমুনায় গুনার কফরা আদায় করবো। ৩৩ এরলগে হেরেম শরিফ, পবিত্র কাবা ঘর, কুরবানি খানা, বাকি ইমাম অকল, আর আস্তা বনি ইছরাইলর গুনা-নাফরমানির কফরা আদায় করবো। ৩৪ ইটা অইলো তুমরার লাগি হর-হামেশাকুর নিয়ম। পরতেক বছর একবার হকল বনি ইছরাইলর গুনার কফরা অলা আদায় করতে অইবো।”

তেউ মাবুদে মুছারে যেলা হুকুম দিছলা, ঠিক অউ লাখান হকলতা করা অইলো।