আল্লা পাকর হুকুমে হজরত ইছা আল-মসীর সাহাবি হজরত পাউলুছে (রাঃ) মউতর থুড়া আগে তরিকার সাগরিদ হজরত তিমথির (রঃ) গেছে অউ ছহিফা খান চিঠির আকারে লেখছইন।

হজরত ইছায় বেহেস্তো তশরিফ নেওয়ার অনুমান ৩১ বছর বাদে ইখান লেখা অইছে।

ইছা আল-মসীর খুশ-খবরি তবলিগ কামো বউত দুখ-কষ্ট পাইতে পাইতে মুরব্বি বয়সো তান শরিল খুব দুর্বল অইগেছিল।

বিধর্মী রোমান বাদশার জেল খানাত বন্দি হালতে তাইন যেবলা নিজর গর্দান যাওয়ার লাগি বার চাইরা,

অউ সময় তাইন ইখান লেখছইন।

ই ছহিফার ৪ রুকু ৭-৮ আয়াতো তাইন কইছলা,

“আমি তো আল-মসীর লাগি জানে-পরানে লাড়াই করছি,

আমারে বাতাই দেওয়া পথর হেশ মাথা পর্যন্ত দৌড়াইছি,

আমার ইমান টিকাইয়া রাখছি।

তে আমার পরেজগারির পুরুস্কার তো জমা আছে,

হউ হক-ইনছাফ কারি মালিকে রোজ হাশরর দিন আমারে জয়র মালা পুরুস্কার দিবা।

ইতা খালি আমারে নায়,

যতো মানুষ আশিক অইয়া তান লাগি বার চাইরা,

তারা হকলরেউ দিবা।”

এর কয়েক বছর আগে অউ হজরত তিমথির গেছে তাইন পয়লা তিমথি নামে আরক ছহিফা লেখছিলা।

আর অখন তাইন তিমথিরে মিনতি জানাইরা আগর তালিম অকল মনো রাখার লাগি।

অউ ছিপারার ২ রুকু ১৫ আয়াতো আছে,

“তুমি আল্লার খুশি মাফিক নিজরে পরেজগার হালতে তান ছামনে আজির করো,

অউ লাখান কামলা বনো,

যে কামলায় আল্লার দরবারো শরম পাওয়ার কুনু কারন নাই।

যে কামলায় সঠিক ভাবে হক কালাম তালিম দেইন,

অউ লাখান অও।”