৬
১ হুনো,
যে গুলাম-বান্দিয়ে মুনিবর গুলামি করইন,
তারা হকলেউ যারযির মুনিবরে ইজ্জতি জন মনো করউক,
যাতে কেউ আল্লার নামরে বা আমরার তালিমরে খারাপ কওয়ার সুযোগ না পায়।
২ যে জনে ইছায়ী ইমানদার কুনু মুনিবর গুলামি করইন,
এইন যানু ইমানদার ভাই হিসাবে তান মুনিবরে এলামি না করইন বরং আরো ভালা করি তান খেজমত করইন।
কারন গুলামর খেজমতে যে মুনিবে উপকার পাইরা,
তাইন তো মায়ার ইমানদার ভাই।
তে অতা বেয়াপারে তুমি তালিম আর হুকুম দেও।
ভুল তালিম আর আসল ধন
৩ কেউ যুদি ইতা বাদ দিয়া দুছরা কুনু তালিম দেয়,
আর আমরার মালিক ইছা আল-মসীর খাটি তালিম আর আল্লার ডর-খফর তালিমরে না মানে,
৪ হে তো মিছা অহংকারি,
হে কুন্তাউ বুজে না,
মতভেদ করা,
বেহুদা উফতামি করা তার একটা বেমার।
অতার কারনে ইংসা-নিন্দা,
কাইজ্জা-ফসাদ,
কু-সন্দয় পয়দা অয়।
৫ আর অসাড় বিবেক আলা মানষর মাজে হামেশা গোলমাল লাগাইলউ থাকে।
ইতা মানষর মাজে আল্লাই হক নাই।
তারা ইছায়ী ইমানরে দুনিয়াবি লাভর উপায় মনো করে।
৬ আসলে মনর তুষ্টিয়ে ইছায়ী ইমান মাফিক জিন্দেগি কাটাইলে খুব বেশি লাভ অয়।
৭ আমরা দুনিয়াত আইবার কালো তো কুন্তাউ লগে লইয়া আইছি না,
আর যাওয়ার কালোও কুন্তা নিতাম পারতাম নায়।
৮ এরলাগি খালি খানি-কাপড় পাইলেউ আমরা খুশি রইমু।
৯ অইলে দুনিয়াত যেরা ধনি অইতো চায়,
তারা নানান নমুনার পরিক্ষাত আর ফান্দো পড়ে,
তারার মনো খুব বদ খাইশ পয়দা অয়,
যেতায় তারার জিন্দেগিরে সর্বনাশর গাতো ফালায়।
১০ কারন হকল নমুনার বদ কামর জনম অইলো টেকা-পয়সার মায়া।
কুনু কুনু জন টেকা-পয়সার লালছে ইছায়ী ইমান থাকি হরিয়া গিয়া,
নিজর উপরে বড় দুখ-মছিবত ডাকিয়া আনছে।
চউখ রাখো আল্লার আরশর বায়
১১ অইলে তুমি তো আল্লার বন্দা,
তুমি ইতা বদ কাম থাকি হরিয়া রও।
তুমি পাক-পরেজগার জিন্দেগি,
আল্লার ডর-খফ,
ইমান,
মহব্বত,
ছবর,
আর নরম স্বভাবর বায় খিয়ালি অও।
১২ ইমানি লাড়াই করাত রও।
আখেরাতর যে জিন্দেগির লাগি আল্লা পাকে তুমারে দাওত দিছইন,
হউ জিন্দেগিরে তুমি মজবুত করি ধরো।
তুমি তো ইমানি সাক্ষি দিছলায় বউত মানষর ছামনে।
১৩ অখন আল্লা পাকর নামে,
যেইন হক্কলতার জান দেইন,
আর যেইন হাকিম পন্তীয় পিলাতর ছামনে নিজর বেয়াপারে হক সাক্ষি দিছলা,
হউ ইছা আল-মসীর নামেও তুমারে অউ মিনতি কররাম,
১৪ আমরার মালিক ইছা আল-মসী জাইর অওয়ার আগ পর্যন্ত তুমি পুরাপুর নিখুত আর বদনাম ছাড়া রইয়া হুকুম আদায় করো।
১৫ আর গুনগানে ধনি হউ আল্লা,
যেইন একমাত্র সম্রাট,
বাদশা অকলর বাদশা আর মালিক অকলর মালিক,
তাইনউ তান উপযুক্ত সময়ে আল-মসীরে জাইর করবা।
১৬ খালি আল্লা পাকরেউ মউতে কবজা করতো পারে না।
তাইন অলা এক নুরর ফরো বসত করইন,
হিনো কুনু আদম জাত যাইতো পারে না।
কুনু আদমে কুনুদিন তানরে দেখছেও না,
দেখার তাক্কতও নাই।
ইজ্জত আর খেমতা চিরকাল খালি তানউ।
আমিন।
১৭ হুনো,
অউ দুনিয়ার ধনি অকলরে হুকুম দেও,
তারা যানু বড়াই না করইন,
আর দুনিয়াবি অস্থায়ী ধনর উপরে ভরসা না করিয়া,
আল্লার উপরে ভরসা করইন।
আমরার ভালাইর লাগি তাইনউ হকলতা খুলা আতে দান করইন।
১৮ আর তারারে কও,
তারা যানু অইন্যর ভালাই করে,
নেক কাম করাত রয়,
মন খুলিয়া দান-খয়রাত করে,
আর তারার ধন-দৌলতর বাট অইন্য মানষরে দেয়।
১৯ তেউ তারা নিজর লাগি এমন ধন জমা করবো,
যেতা ভবিষ্যতে তারার লাগি একখান মজবুত ভীতর লাখান অইবো।
এতে হাছারর জিন্দেগিরে তারা শক্ত করি ধরিয়া রাখতো পারবো।
২০ ও তিমথি,
তুমার জিম্মায় যে সম্পদ দেওয়া অইছে,
ই সম্পদ তুমি ভালামন্তে হেফাজত করো।
আজে-বাজে আখলর বেকামা বিদ্যার বুলির দু-নছলা তালিম থাকি হরিয়া রও।
২১ কুনু কুনু জন অতা বেকামা আখল দেখানিত গিয়া,
আসল ইমান থাকি বে-পথে গেছেগি।
আল্লা পাকে তুমরারে রহমত দান করউক্কা।
আমিন॥