৩
১ হুনো,
বেহেস্তি বাফে আমরারে কতো বেশি মায়া করইন!
তাইন আমরারে তান আওলাদ কইয়া ডাকইন,
আর আসলেও আমরা তান আওলাদ।
তা-ও ই জগতে আমরারে চিনে না,
কারন জগতে অউ গাইবি বাফরেও চিনে না।
২ ও সোনা অকল,
অখন তো আমরা আল্লার আওলাদ বনছি,
এরবাদে কিতা বনমু,
ইখান অখনও জানি না।
খালি জানি,
আল-মসী যেবলা দুছরা বার জাইর অইবা,
হউ সময় আমরাও তান লাখান অইমু।
আমরা তো তানরে তান আসল ছুরতে দেখার সুযোগ পাইমু।
৩ আর যতো মানষে আল-মসীর উপরে ইলা আশা করে,
তারা নিজরে আল-মসীর লাখান খাটি বানানিত রয়।
৪ যে মানষে গুনা করে,
হে আল্লার হুকুম-আহকাম ভাংগে,
আল্লার হুকুম ভাংগাউ তো গুনা।
৫ তুমরার জানা আছে,
আল-মসী অইলা বে-গুনা মাছুম,
তাইন গুনারে খেদানির লাগি দুনিয়াত জাইর অইলা।
৬ এরলাগি যেরা তান মাজে বসত করে,
তারা গুনার পথে চলে না।
গুনার গাতো যেগুইন পড়ি রইন,
ইগুইন্তে তানরে দেখছেও না,
চিনছেও না।
৭ ও ছাবাল অকল,
তুমরারে যানু কেউ বে-পথে নিতো না পারে।
আল-মসী তো পাক-পরেজগার,
আর নেক কামর আশিক অকলও তান লাখান পরেজগার অয়।
৮ অইলে গুনার পথর আশিক যেরা,
তারা শয়তানর মুরিদ,
ইবলিছ-শয়তানে তো পয়লা থাকিউ গুনা করের।
তার কামরে বিনাশ করার নিয়তে,
অখন আল্লার খাছ মায়ার জন ইবনুল্লা ই দুনিয়াত জাইর অইলা।
৯ তে যে বন্দার জনম অইছে আল্লার নুর থাকি,
তার ভিতরে আল্লার নুরর বিচ বসত করে,
এরলাগি হে গুনার গাতো পড়ি রয় না।
আল্লাই নুর থাকি জনম অইছে করি,
হে গুনার কামো পড়ি রইতো পারে না।
১০ আর যারযির আমল দেখলেউ বুজা যায়,
কে আল্লার আওলাদ,
কে শয়তানর পুত:
যেতা মানুষ নেক পথে চলে না,
তার মুমিন ভাইরে মহব্বত করে না,
হে তো আল্লার মানুষ নায়।
মহব্বতে চলো
১১ তুমরা মুলো থাকিউ ইখান হুনিয়া আইরায়,
আমরার লাগি ফরজ অইলো,
একে-অইন্যরে মহব্বত করা।
১২ তে আমরা যানু বাবা আদমর পুত কাবিলর লাখান না অই।
হে আছিল ইবলিছর মুরিদ,
ইংসা করিয়া তার আপন ভাইরে খুন করছিল।
জানো নি কেনে খুন করছিল?
হে হামেশা নাফরমানি কাম করতো,
অইলে তার ভাইয়ে নেক কাম করতো।
১৩ ও ভাই অকল,
দুনিয়ার মানষে যুদি তুমরারে ঘিন্নায়,
তে তাইজ্জুব অইও না।
১৪ আমরা তো আমরার মুমিন ভাইরে মহব্বত করি,
এরলাগি বুজরাম,
আমরা মরন থাকি বাচিয়া জিন্দেগিত আইছি।
যেরা মহব্বত করে না,
তারা তো মরনর গাতো পড়ি রইছে।
১৫ নিজর ভাইরে যেগিয়ে ঘিন্নায়,
হে তো খুনি।
আর তুমরার জানা আছে,
কুনু খুনির দিলো আখেরি জিন্দেগি বসত করে না।
১৬ আল-মসীয়ে আমরার লাগি তান নিজর জান বিলাই দিছলা,
অখান থাকিউ আমরা বুজছি,
মহব্বত কারে কয়।
অখন আমরার ভাইর লাগিও আমরার জান বিলাই দেওয়া জরুর।
১৭ সংসারো খাইয়া-ফিন্দিয়া বাচার বেবস্থা যার আছে,
হে তার ভাইর অভাব দেখিয়াও যুদি চউখ মুজিয়া বইরয়,
তে তার ভিতরে কিলা আল্লাই মহব্বত বসত করে?
১৮ বাবা অকলরে,
আমরা খালি মুখর মায়া না দেখাইয়া,
কামর মাজদি যানু আসল মহব্বত দেখাই।
১৯ তেউ আমরা বুজমু,
আমরা হকর লগে আছি।
আর হক আল্লার ছামনে আমরার দিলর তছল্লি আইবো।
২০ কারন আমরার দিলেউ যুদি আমরারে দুষি কইয়া রায় দেয়,
তে আল্লা পাক তো ই দিল থাকি বউত মহান,
হক্কলতাউ জানইন।
২১ এরলাগি কইরাম,
ও সোনা অকল,
আমরার আপন দিলে যুদি আমরারে দুষি সাইবস্তো না করে,
তে সাওস করিয়া আল্লার দরবারো আজিরা দিতাম পারমু।
২২ আর তান গেছে আমরা যেতা মাংগিমু,
ইতা তাইন দিবা।
কারন আমরা তান হুকুম-আহকাম মানিয়া চলি,
আর যে কাম করলে তাইন খুশি অইন,
খালি অউ কাম করি।
২৩ তান হুকুম অইলো,
আমরা যানু তান খাছ মায়ার জন ইবনুল্লা ইছা আল-মসীর উপরে ইমান আনি,
আর একে-অইন্যরে মহব্বত করি।
অউ হুকুমউ তাইন আমরারে দিছইন।
২৪ আর যে বন্দায় তান হুকুম মানিয়া চলে,
হে তান মাজেউ বসত করে,
অলা তাইনও তার মাজে বসত করইন।
অখন তাইন আমরারে যে পাক রুহ দান করছইন,
অউ রুহর মাজদি আমরা বুজিয়ার,
তাইন আমরার দিলো বসত করইন।