হজরত ইছার তালাশে গনক অকল
২
১ রাজা হেরোদর আমলো এহুদিয়া জিলার বেথেলহাম গাউত হজরত ইছার জনম অইছিল।
জন্মর বাদে পুবর দেশর কয়জন গনক জেরুজালেম টাউনো আইয়া জিকাইলা,
২ “ইহুদি জাতির যে বাদশার জনম অইছে,
এইন কুয়াই?
আমরা আছমানর পুবেদি তান জন্মর তেরা দেখছি,
দেখিয়া তানরে ভক্তি দেওয়াত আইছি।”
৩ নয়া বাদশার কথা হুনিয়া রাজা হেরোদ আর জেরুজালেমর বাদ-বাকি হকল মানুষ খুব চিন্তাত পড়িগেলা।
৪ এরলাগি হেরোদে দেশর বড় ইমাম আর মৌলানা অকলরে একখানো দলা করি জিকাইলা,
“আপনারা জানইন নি,
আল-মসী কুয়াই জনম লইবা?”
৫ এরা কইলা,
“তান জনম অইবো এহুদিয়া জিলার বেথেলহাম গাউত।
আগর জমানার এক নবীর কিতাবো লেখা আছে,
৬ ও এহুদিয়া জিলার বেথেলহাম,
এহুদিয়ার নামি-দামি জাগার মাজে
তুমি কুনুমন্তেউ হুরু নায়,
তুমার মাজ থাকিউ তো
অলা একজন বাদশা পয়দা অইবা,
যেইন আমার ইছরাইল জাতিরে চালাইবা।”
৭ তেউ হেরোদে হউ গনক অকলরে নিরালায় নিয়া জিকাইয়া জানলা,
ঠিক কুন সময় হউ জন্মর তেরা দেখা গেছিল।
৮ তাইন অউ গনক অকলরে কইলা,
“আপনারা বেথেলহাম যাউক্কা,
গিয়া ভালা করি অউ হুরুতার তালাশ করউক্কা।
তান কুনু খবর পাইলে আমারে জানাইবা,
তেউ আমিও গিয়া তানরে ভক্তি দিমু।”
৯ রাজার হুকুম পাইয়া গনক অকল রওয়ানা দিলা।
তারা পুবর আছমানো যে জনম তেরা দেখছিলা,
অউ তেরা তারার আগে আগে গেল।
আর অউ হুরুতা যে জাগাত আছলা,
ঠিক অউ জাগাত আইয়া তেরা থামি গেল।
১০ তেরা থামি গেছে দেখিয়া গনক অকলর ভিতরে খুশির ঢেউ উঠলো,
খুশির মাইরে তারা ঘরর ভিতরে হামাইলা।
১১ ঘরো হামাইয়া অউ হুরুতারে তান মা মরিয়মর কান্দাত দেখলা।
দেখিয়া তারা মাটিত পড়ি তানরে ভক্তি দিলা,
আর তারার বেগ খুলিয়া দামি দামি উপহার দিলা।
অউ উপহার অইলো সোনা,
লোবান আর মুরা-আতর।
১২ অইলে আল্লায় খোয়াবর মাজে তারারে হুশিয়ার করি দিলা,
তারা যানু রাজা হেরোদর গেছে আর ফিরিয়া না যাইন।
তেউ তারা দুছরা পথে নিজর দেশো গেলাগি।
হজরত ইছা আল-মসীর খুজে রাজা হেরোদ
১৩ গনক অকল গিয়া হারলে আল্লার এক ফিরিস্তায় খোয়াবর মাজে ইউছুফরে দরশন দিয়া কইলা,
“ও ইউছুফ উঠো,
পুয়া আর তান মাʼরে লইয়া মিসর দেশো বাগিয়া যাওগি,
বাদে আমি যতদিন না কই,
অতদিন হনোউ রইও।
ই পুয়ারে মারিলিতো করি হেরোদে তুকাইবো।”
১৪ তেউ ইউছুফ উঠিয়া অউ রাইতউ তারারে লইয়া মিসরো রওয়ানা দিলা,
১৫ আর রাজা হেরোদ মরার আগ পর্যন্ত হনো রইলা।
ইতা ঘটিছিল,
যাতে আগর এক নবীর মাজদি মাবুদে যেতা জানাইছলা,
অতা পুরা অয়।
মাবুদে বাতাইছলা,
“আমি আমার পুতরে মিসর থাকি ডাকিয়া আনলাম।”
১৬ গনক অকলে রাজা হেরোদরে টগিছইন করিয়া তাইন খুব গুছা করলা।
এরলাগি গনক অকলর গেছ থাকি তাইন যে সময়র কথা হুনছলা,
অউ সময় মাফিক বেথেলহাম গাউ আর এর আশ-পাশ এলাকাত দুই বছর বা তার কম বয়সি যতো পুয়াইন আছলা,
ইতা হকলরে মারিলিবার হুকুম দিলা।
১৭ এতে নবী ইয়ারমিয়ার মাজদি মাবুদে যেতা জানাইছলা,
অতা ফলিগেল।
মাবুদে বাতাইছলা,
১৮ রামাত খুব কান্দা-কাটির আওয়াজ হুনা যার,
রাহেলায় তাইর হুরুতাইন্তর লাগি কান্দের,
কুনুমন্তেউ শান্তি অর না,
তাইর হুরুতাইন শেষ অইগেছইন।
১৯ বাদে রাজা হেরোদ মরিয়া হারলে মাবুদর এক ফিরিস্তা আইয়া,
মিসর দেশো ইউছুফরে খোয়াবর মাজে কইলা,
২০ “ও ইউছুফ,
উঠো,
অউ পুয়া আর তান মাʼরে লইয়া ইছরাইল দেশো যাওগি।
পুয়ারে যেতায় মারিলিতা চাইছলা,
ইতা তো মরি গেছইন।”
২১ তেউ ইউছুফ উঠিয়া পুয়া আর পুয়ার মাʼরে লইয়া ইছরাইল দেশর সীমানাত আইলা।
২২ আইয়া হুনলা,
হউ হেরোদর পুয়া আর্খিলাউছ অখন এহুদিয়া জিলার রাজা অইগেছে।
এরলাগি তাইন হিনো যাইতে ডরাইলা।
বাদে খোয়াবে হুকুম পাইয়া গালিল জিলাত গেলাগি।
২৩ গালিলো গিয়া নাছারত নামর এক গাউত বসত করলা।
ইতা ঘটিলো,
যাতে আগর নবী অকলর মাজদি যেতা জানাইল অইছিল,
অতা অখন পুরা অয়।
জানাইল অইছিল,
“তানরে নাছারতি কইয়া ডাকা অইবো।”