ময়-মুরব্বির গেছ থাকি পাওয়া রছুমত
৭
১ বাদে জেরুজালেম থাকি কয়জন মৌলানা আর ফরিশি মজহবর কিছু মানুষ হজরত ইছার গেছে আইলা।
২ আইয়া দেখলা,
ইছার কয়জন উম্মতে আত না ধইয়া এমনেউ খানিত বইগেছইন।
৩ আসলে আগর জমানার মৌলানা অকলর বাতাইল রছুমত মাফিক,
হক্কল ইহুদি আর ফরিশি অকলেও অজু না করিয়া কুনু খানি খাইন না।
৪ বাজার-আট থাকি কুনু জিনিস আনলে পাক-ছাফ না করিয়া মুখো দেইন না,
থাল-বাসন ধইয়া ছাফ-ছুতরা করা,
অউ লাখান বউত রীতি-রেওয়াজ তারা মানে।
৫ এরদায় অউ মৌলানা আর ফরিশি অকলে ইছারে জিকাইলা,
“আপনার উম্মত অকলে আগর জমানার মৌলানা অকলর বাতাইল রছুমত কেনে মানইন না?
তারা তো নাপাক আতে খানি খাইন।”
৬ তাইন জুয়াপ দিলা,
“আপনারা তো ভন্ড!
হজরত ইশায়া নবীয়ে আপনাইন্তর বেয়াপারে ঠিকউ কইছইন,
ইতা মানষে মুখ দিয়া খালি আমারে ইজ্জত করে,
অইলে তারার দিল আমা থনে বউত দুরই।
৭ তারা হুদার খামোখা আমার এবাদত করে,
তারার তালিম অকল তো
মানষর বানাইল মনগড়া শরিয়ত।
৮ তে আপনারা তো আল্লার দেওয়া হুকুম-আহকাম বাদ দিয়া,
মানষর বানাইল রছুমত আমল কররা।”
৯ ইছায় তারারে আরো কইলা,
“আল্লার দেওয়া হুকুম বাদ দিয়া,
নিজর মনগড়া রছুমত কাইম করার ধান্দা তো আপনারা খুব ভালা করিউ জানইন।
১০ যেলা হজরত মুছায় কইছইন,
মা-বাবারে ইজ্জত করিও,
যে মানষে আপন মা-বাফর বদনাম গায়,
তারে কাতল করা অইবো।
১১ অইলে আপনারা মানষরে তালিম দিরা,
কুনু মানষে যুদি তার মা-বাফরে কইলায়,
আমার যেতা ছামানা দিয়া আপনাইন্তর খেজমত করতাম আছিল,
ইতা আল্লার নামে লিল্লা দিলাইছি,
১২ তে তার মা-বাফর লাগি আর কুন্তাউ করা লাগে না।
১৩ অউ লাখান আপনারার বাফ-দাদার মনগড়া নিয়ম দিয়া আল্লার কালাম বাতিল করিলিছইন।
ইখান বাদেও আপনারা অউলা আরো বউত কাম কররা।”
১৪ বাদে ইছায় মানষরে তান কান্দাত নিয়া কইলা,
“আপনারা হকলে আমার কথা খিয়াল করি হুনউক্কা আর বুজউক্কা।
১৫-১৬ বাইরে থাকি যেতা জিনিস মানষর ভিতরে হামায়,
ইতায় তো তারে নাপাক বানায় না।
বরং মানষর ভিতরে থাকি যেতা বারয়,
অতায়উ তারে নাপাক বানায়।”
১৭ বয়ান বাদে তাইন মানষর গেছ থাকি হরিয়া গিয়া ঘরো হামাইলা,
তেউ সাহাবি অকলে তানরে এর মানি জিকাইলা।
১৮ ইছায় কইলা,
“তুমরা কিতা অউলাউ বেআক্কল নি?
তুমরা বুজো না নি,
বারে থাকি যেতা জিনিস মানষর ভিতরে হামায়,
ইতায় মানষরে নাপাক করতো পারে না।
১৯ ইতা তো তার দিলর ভিতরে হামায় না,
খালি পেটর মাজে হামায়,
আর পেট থাকি হিরবার বার অই যায়।”
ইছায় অউ তালিম দিয়া বুজাইলা,
কুনুজাত খানিউ নাপাক নায়।
২০ তাইন কইলা,
“মানষর ভিতরে থাকি যেতা বারয়,
অতায়উ মানষরে নাপাক করে।
২১ মানষর দিল থাকিউ তো হকল নমুনার কু-চিন্তা আয়;
জিনা,
চুরি,
খুন,
২২ লোভ-লালছ,
পরর খেতি করার ধান্দা,
ছল-চতুরি,
বদমাইশি,
বদ-নজর,
ইংসা-নিন্দা,
বড়াই-বেটাগিরি আর শয়তানি বারয়।
২৩ অউ তামাম নাফরমানি মানষর দিল থাকি বার অইয়া তারারে নাপাক বানায়।”
গালিল জিলার বারে হজরত ইছার মোজেজা (৭:২৪-১০:৫২)
বিধর্মী বেটির ইমানর বল
২৪ বাদে ইছা অউ এলাকা থনে সিরিয়া দেশর সোর টাউনর কান্দাত তশরিফ নিলাগি।
অনো আইয়া তাইন এক ঘরর ভিতরে লুকাই রইলা,
চাইলা মানষে যানু না জানইন তাইন আইছইন করি।
অইলে তান খবর রটি গেল।
২৫ হনো এক বেটি মানষর পুড়িরে ভুতে ধরায়,
ইছায় তশরিফ আনছইন হুনিয়া অউ বেটিয়ে,
জলদি করি আইয়া তান পাওত পড়লো।
২৬ ই বেটির বাড়ি সিরিয়া দেশর ফৈনিকিয়া এলাকাত,
অইলে মাতিতো ইউনানি ভাষায়।
তাই ইছার গেছে মিনত-কাজ্জি করিয়া কইলো,
“হুজুর,
ভুতর কবজা থাকি আমার পুড়িগুরে বাচাউক্কা।”
২৭ ইছায় কইলা,
“আগে নিজর হুরুতাইন্তে পেট ভরি খাউক্কা,
নিজর ছাবালর খানি কুকরর ছামনে ফালানি ঠিক নায়।”
২৮ বেটিয়ে কইলো,
“জিঅয় হুজুর,
আপনার কথাউ ঠিক,
অইলে নিজর ছাবালর খানির যেতা গুড়া-গাড়া গালাবায় পড়ে,
ইতা তো কুকরে খায়।”
২৯ তাইন কইলা,
“তুমি তো খাটি মাতউ মাতছো।
তে যাও,
গিয়া দেখো,
ভুতে তুমার পুড়িরে ছাড়িয়া গেছেগি।”
৩০ হাছাউ বেটিয়ে বাড়িত গিয়া দেখলো,
তাইর পুড়ি ভালা অইয়া বিছনাত হুতিরইছে।
খালুয়া তুতলা বেটারে শিফা করা
৩১ বাদে ইছায় সোর এলাকা থনে সিদন টাউন অইয়া,
গালিল আওরর হপারো দিকাপলি এলাকাত আইলা।
৩২ অনো আইয়া হারলে মানষে এক খালুয়া তুতলা বেটারে তান গেছে আনিয়া মিনত লাগাইলা,
তারে আতাই দিবার লাগি।
৩৩ তাইন এরে মানষর ভিড় থনে বারে নিরাই জাগাত নিয়া,
তার দুইও কানো তান আতর আংগুইল হারাইলা,
তান মুখর ছেফ লাগাইয়া তার জিফরা আতাই দিলা।
৩৪ আর উপরে আছমানেদি চাইয়া লাম্বা করি শাস ফালাইয়া কইলা,
“ইফ্ফাতা,”
মানি,
“খুলি যাউক।”
৩৫ লগে লগেউ বেটার কান খুলি গেল।
তুতলামি ছাড়ি গেল,
হে পরিস্কার মাতা ধরলো।
৩৬ হেশে তাইন এরারে হুকুম দিলা,
“খবরদার,
তুমরা ইতা কেউররে হুনাইও না।”
অইলে তাইন যতো বেশি না করলা,
তারা অতো বেশ করি ইতা রটাইলো।
৩৭ তারা আচানক তাইজ্জুব অইয়া কইলা,
“এইন তো হকল কামউ খুব নিখুত করি করইন।
দেখরায় নি,
তাইন খালুয়ারে হুনার শক্তি,
আর বোবারে মাতিবার তাক্কত দিছইন।”