ইমানে কমজুর ভাইরে মায়া করো
১৪
১ তুমরার মাজর যে ভাই ইমানে কমজুর,
তারেও আপন হিসাবে সমজো,
তার পছন্দ-অপছন্দ লইয়া তর্কা-তর্কি করিও না।
২ বুজরায় নি,
একজনে মনো করে,
হে হকল জাতর খানি খাইতো পারবো,
অইলে কমজুর ইমানদার জনে খালি নিরামিষ খায়।
৩ তে মাছ-মাংস খাওরা জনে অউ নিরামিষ খাওরা জনরে যানু না ছিড়ায়।
আর নিরামিষ খাওরায়ও যানু মাছ-মাংস খাওরারে না দুষে,
কারন আল্লায় তো দুইও জনরেউ নিজর কইয়া কবুল করছইন।
৪ আর তুমারে খেগিয়ে খেমতা দিলো,
আরক বেটার গুলামর বিচার করতায়?
হে ঠিক পথে আছে,
না ভুল পথে আছে ইখান তো তার মুনিবে বুজবা।
আসলে তো হে ঠিক পথেউ রইবো,
মালিকেউ তারে ঠিক পথে রাখতা পারবা।
৫ কুনু কুনু মানষে মনো করইন,
সাধারন দিন থাকি কুনু খাছ দিনর ফজিলত বেশি।
আর কেউ কেউ হকল দিনরেউ এক লাখান মনো করে।
তে ই বেয়াপারে কে কিতা করতো না করতো,
ইতা যানু তার দিল থাকি পুরাপুর সায় দেয়।
৬ যে মানষে কুনু খাছ দিনরে মানে,
হে তো মালিক ইছারে খুশি করার নিয়তেউ ইতা মানে।
যে জনে হকল জাতর খানি খায়,
হে-ও তো মালিকরে খুশি করার নিয়তেউ খায়,
হে আল্লার শুকরিয়া আদায় করিয়া খায়,
আর যে জনে হকলতা খায় না,
হে-ও মালিকরে খুশি করার নিয়তে খায় না,
হে-ও আল্লার শুকরিয়া আদায় করে।
৭ আমরার মাজর কুনু বন্দাউ নিজর লাগি নিজে জিন্দা রয় না,
আর নিজর লাগি মরেও না।
৮ কারন আমরা যেবলা জিন্দা রই,
খালি মালিকর লাগিউ জিন্দা রই,
আর যেবলা মরন অয়,
খালি মালিকর লাগিউ মরন অয়।
তে আমরা জিন্দা রইলেও যেতা,
মরলেও অতা,
আমরা তো মালিক ইছারউ।
৯ মালিক আল-মসীও তো মারা গেছলা আর হিরবার জিন্দা অইয়া উঠছইন,
যাতে তাইন জিন্দা আর মুর্দা দুইও দলরউ মালিক বনইন।
১০ তে তুমি কেনে তুমার ভাইর খুত তুকাইরায়?
তারে কেনে ছিড়াইরায়?
আল্লার বিচারর ছামনে তো আমরা হকলউ উবাইমু।
১১ যেলা আল্লার কালামো আছে,
মাবুদে কইরা,
আমার নামর কছম খাইয়া কইয়ার,
হকলেউ আমার ছামনে আইয়া সইজদা করবো,
পরতেক মুখেউ স্বীকার করবো,
আমিউ আল্লা।
১২ অনো দেখা যায়,
আল্লার দরবারো আমরা পরতেকেউ যারযির কামর হিসাব দিতে অইবো।
১৩ তে আও,
অখন থাকি আমরা একে-অইন্যর খুত ধরা বন্দ করি,
আর নিয়ত করি,
ইলা কুনু কাম করতাম নায়,
যে কামে আরক ভাইর ইমানর খেতি অইবো,
বা তারে গুনার পথে নিবো।
১৪ মালিক ইছার উম্মত অওয়ায় আমি ভালামন্তেউ জানি আর বুজি,
এমনে তো কুনু জিনিসউ নাজাইজ নায়,
অইলে কেউ যুদি ইতারে নাজাইজ মনো করে,
তে তার লাগিউ ইতা নাজাইজ।
১৫ যুদি তুমার কুনু খানির লাগি আরক ভাইয়ে মনো দুখ পায়,
তে তো তুমি তারে মহব্বত কররায় না।
যে ভাইরে বাচানির লাগি আল-মসীয়ে মউত কবুল করলা,
কুনু খানির লাগি ই ভাইর সর্বনাশ করিও না।
১৬ তুমি যেতারে পছন্দ করো,
ইতার লাগি দুছরা জনে যানু তুমারে না নিন্দায়।
১৭ আল্লার বাদশাই তো খালি খানা-পিনার লাগি নায়,
বরং আল্লাই পাক রুহে দেওয়া পরেজগারি,
শান্তি আর খুশি-বাসির বেয়াপার।
১৮ অউ নমুনায় যেরা আল-মসীর খেজমত করে,
এরার উপরে আল্লা খুশি থাকইন,
আর মানষেও ভালা পাইন।
১৯ এরলাগি আও,
আমরা অলা কাম করি,
যে কামে শান্তি কাইম অয়,
যে কামে একে-অইন্যরে গড়িয়া তুলতাম পারি।
২০ আর কুনু লাখান খানির লাগি আল্লার কামরে বিনাশ না করি,
খানির জুকা হকলতাউ তো হালাল।
অইলে তুমি কুনু এক বিশেষ খানি খাওয়ায় যুদি দুছরা মানষর ইমানো কষ্ট লাগে,
তে ইতা খাওয়া তুমার লাগি জাইজ নায়।
২১ বিশেষ কুনু গোস্ত বা শরাব খাওয়া,
যে কামে তুমার ভাইয়ে মনো দুখ পায়,
ইমানে বাধা পায়,
ইলা কুনু কাম করা তুমার লাগি ঠিক নায়।
২২ তুমার দিলর একিনরে,
খালি তুমি আর তুমার আল্লার মাজে রাখো।
নেক-কপালি তো হউ জন,
যে জনে ভালা মনো করিয়া কুনু কাম করিয়া হারলে,
তার মনো খুতখুতি আয় না।
২৩ অইলে মনো খুতখুতি লইয়া যুদি হে কুন্তা খায়,
তে তো হে দুষি।
কারন হে যেতা খাইছে,
ইতা তার বিবেকর অপছন্দ,
আর বিবেকর উল্টা কামউ অইলো গুনা।