পবিত্র ইঞ্জিল শরিফ ৭ নম্বর ছিপারা
পয়লা করিন্থিয়া
ছালাম জানানি
১
১ আমি পাউলুছ,
আল্লা পাকর মর্জিয়ে আল্লাই দাওত পাইয়া হজরত ইছা আল-মসীর একজন সাহাবি অইছি।
আমি আর আমার মুমিন ভাই সোছিনে,
২ করিন্থ টাউনর আল্লার জমাতর মানষর গেছে,
মানি তুমরার গেছে লেখরাম।
হজরত ইছা আল-মসীর তরিকা কবুল করায় আল্লায় তুমরারে পাক-পবিত্র করছইন আর তান আপন বন্দা অইবার লাগি দাওত দিছইন।
তুমরার গেছে আর অইন্যান্য জাগার যতো মানষে আমরার হজরত ইছা আল-মসীরে মালিক কইয়া মানইন,
তারা হকলর গেছে আমরা অউ চিঠি খান লেখরাম।
তাইন তারারও মালিক,
আমরারও মালিক।
৩ আমরার গাইবি বাফ আল্লা পাকে আর হজরত ইছা আল-মসীয়ে তুমরারে রহমত আর শান্তি দান করউক্কা।
৪ আমি হামেশা তুমরার লাগি আমার আল্লার দরবারো শুকরিয়া আদায় করি,
কারন ইছা আল-মসীর তরিকা কবুল করায় তুমরা আল্লার রহমতর তলে আইছো।
৫ অউ রহমত অইলো,
হজরত ইছা আল-মসীর লগে শরিক অইয়া তুমরা হকল নমুনায় মাত-কথা মাতা আর আখল-ইলিমে ধনি অইছো।
৬ অখন দেখা যার,
আল-মসীর বেয়াপারে আমরা যেতা তালিম দিছলাম,
ইতা তুমরার দিলো গাথিয়া রাখছো।
৭ আর হজরত ইছা আল-মসীয়ে দুছরা বার তশরিফ আনার লাগি তুমরা বার চাইরায়,
এরমাজে আল্লার দেওয়া বাতুনি খেমতার যেকুনু নিয়ামত পাইতে তুমরার অভাব অর না।
৮ আমি জানি,
আমরার হজরত ইছা আল-মসীয়ে তুমরারে আখের পর্যন্ত ইমানে মজবুত রাখবা,
যাতে তাইন আইবার আগ পর্যন্ত তুমরা পুরাপুর নিখুত রইবায়।
৯ আল্লা পাক তো হক আর খাটি,
তাইন যেলা কইন অলা অয়।
তাইন তুমরারে দাওত দিছইন,
তুমরা যানু তান খাছ মায়ার জন ইছা ইবনুল্লার লগে খাতির-সম্পর্ক রাখো,
এইনউ আল-মসী,
আমরার মালিক।
আল্লার জমাতর দায়-দায়িত্ব (১:১০-৪:২১)
জমাতর মাজে দলাদলি
১০ তে ভাই অকল,
হজরত ইছা আল-মসীর অইয়া আমি তুমরারে জুড় আতে মিনত করিয়ার,
তুমরা হকল এক অও।
তুমরার মাজে কুনু দলাদলি না রউক,
এক মন আর এক মত অও।
১১ হুনো,
কুলুয়া বিবির বাড়ির মানষর গেছ থাকি জানলাম,
তুমরার মাজে কাইজ্জা-ফসাদ চলের।
১২ আমি হুনলাম,
তুমরার মাজে কেউ কয়,
“আমি পাউলুছর দলর,”
কেউ কয়,
“আমি আপল্লছর দলর,”
কেউ কয়,
“আমি পিতরর দলর,”
আর কেউ কয়,
“আমি আল-মসীর দলর।”
১৩ তে কওছাইন,
আল-মসীরে কিতা বাটা-বাটি করা অইগেছে নি?
আমি পাউলুছরে তুমরার লাগি সলিবো লটকাইয়া মারা অইছে নি?
তুমরা কিতা আমার নামে তৌবার গোছল করছো নি?
১৪ আমি আল্লার দরবারো শুকরিয়া জানাই,
খালি কিরিস্পো আর গউছ ছাড়া,
দুছরা কুনু মানষরে আমি তৌবার গোছল করাইছি না।
১৫ যাতে কেউ কইতো না পারে,
তুমরা আমার নামে তৌবার গোছল করছো।
১৬ আস্তিফান ভাইর পরিবারর মানষরেও আমি তৌবার গোছল করাইছি,
এছাড়া আর কুনু মানষরে গোছল করাইছি করিয়া আমার মনো অর না।
১৭ আল-মসীয়ে তো আমারে তৌবার গোছল করানির লাগি পাঠাইছইন না,
খালি খুশ-খবরি তবলিগর লাগিউ পাঠাইছইন।
আর অউ খুশ-খবরিও কুনু আখলদারি পন্ডিতি ভাব-ভংগিয়ে তবলিগ করাত পাঠাইছইন না,
যাতে সলিবর উপরে আল-মসীর কুরবানি অওয়া বেকামা না বনে।
আল-মসীউ আল্লাই আখল আর বল
১৮ যারা গজবি পথেদি দৌড়ার,
আল-মসীর সলিবর উপরর কুরবানি তারার গেছে তো খালি বেআখলি মনো অয়,
অইলে আমরা যারা নাজাতর পথে দৌড়াইরাম,
আমরার গেছে ইতা অইলো আল্লাই বল।
১৯ আছমানি কিতাবো লেখা আছে,
“আমি আখলদার অকলর আখলরে বেকামা করমু,
আর বুদ্ধিমান অকলর বুদ্ধিরে বিফল করমু।”
২০ তে অউ আখলদার অকল কুয়াই?
আলিম অকলউ বা কুয়াই?
আর অউ জমানাত তর্ক করার খেমতা যার আছে,
হে অখন কুয়াই?
দুনিয়াবি আখল তো খালি বেআখলি,
ইতা আল্লায়উ দেখাইরা।
২১ আল্লায় তান নিজর আখল দিয়া ফয়ছালা করছইন,
যাতে দুনিয়ায় যানু তার আখল দিয়া তানরে চিনতো না পারে।
এরলাগি বেআখলির অউ খুশ-খবরি তবলিগর মাজদি আল্লায় মুমিন অকলর জান বাচাইতা চাইলা।
২২ ইহুদি অকলে খালি কেরামতি কাম দেখতা চাইন,
ইউনানি অকলে আখলর তালাশ করইন,
২৩ অইলে আমরা তবলিগ করি সলিবর উপরে কুরবানি অওয়া আল-মসীর কথা।
ইতা অইলো বনি ইছরাইলর গেছে একটা বে-দীনি কাম আর ভিন জাতি অকলে মনো করইন বেআখলি কাম।
২৪ অইলে বনি ইছরাইল অউক্কা বা ইউনানি অউক্কা,
আল্লার দাওতি বন্দা অকলর গেছে অউ আল-মসীউ অইলা আল্লাই আখল আর আল্লাই বল।
২৫ আল্লাই বেআখলি মানষর আখল থাকি বউত বড় আখলদার,
আর আল্লাই কমজুরি মানষর শক্তি থাকি বউত সবল।
২৬ ভাই অকল,
চিন্তা করি দেখো,
তুমরারে যেবলা দাওত দেওয়া অইছিল,
হি সময় তুমরা কিলাখান আছলায়।
তুমরার মাজর বউত জনউ মানষর চখুত আখলদার,
খেমতাবান বা নামি-দামি বংশর আছলায় না।
২৭ অইলে দুনিয়ায় যেতারে বেআখলি কইয়া মনো করে আল্লায় অতারেউ পছন্দ করছইন,
যাতে দুনিয়ার আখলদার অকলে শরম পাইন।
আর দুনিয়ায় যেতারে কমজুর মনো করে,
আল্লায় অতারে পছন্দ করছইন,
যাতে দুনিয়ার বলবান হকলতা শরমিন্দা অইন।
২৮ দুনিয়ার মানষে যেতারে খুব তুচ্ছ মনো করে,
দুনিয়ার বুকুত যেতার কুনু দাম নাই,
আল্লায় অতারেউ পছন্দ করছইন,
যাতে দুনিয়ার চখুত যেতা নামি-দামি,
ইতা বে-দামি অইযায়।
২৯ তাইন ইতারে পছন্দ করছইন,
যাতে দুনিয়ার কুনু মানষে তান ছামনে বড়াই দেখানির সুযোগ না পাইন।
৩০ আর তুমরা যেরা ইছা আল-মসীর আপন জন বনছো,
ইতা তো আল্লা থাকিউ অইছে।
আল-মসীউ অইলা আমরার গেছে আল্লার দেওয়া আখল,
পাক-পরেজগারি,
পবিত্রতা আর আজাদির খুটি।
৩১ এরলাগি আছমানি কিতাবো লেখা আছে,
“যে মানষে বড়াই করে,
হে মাবুদরে লইয়াউ বড়াই করউক।”