৪
১ ও আমার মায়ার ভাই অকল,
আমি তুমরারে দেখতাম চাই।
তুমরাউ আমার খুশি,
আমার জয়র মালা।
আমরার মালিকর লগে তুমরা মজবুত অইয়া লাগিয়া রও।
হজরত পাউলুছর পরামিশ
২ ও আমার বইন ছালিমা আর ছাইদা,
আমি মিনত করি কইরাম,
এক মালিকর খেজমতো লাগাইল আছো করি,
তুমরা মিলি-মিশি এক মনে চলো।
৩ ও আমার লগর আসল সংগি,
আমি তুমারেও মিনত কররাম,
তুমি অউ বেটিন্তরে সাইয্য করিও।
আল-মসীর খুশ-খবরি তবলিগ কামো এরা আমার লগে বউত কষ্ট করছইন।
কিলিমান আর অইন্যান্য ভাইয়াইন্তর লগেও কষ্ট করছইন।
তারার নাম তো আল্লার জিন্দেগি খাতাত লেখা আছে।
৪ মালিক ইছার নামে তুমরা হামেশা খুশি-বাসি করো।
আমি হিরবার কইরাম,
খুশি-বাসি করো।
৫ তুমরার নরম বেবহার যানু হকল মানষর চখুত পড়ে।
জানো তো,
আমরার মালিক খুব জলদিউ আইরা।
৬ কুনু বেয়াপারেউ তুমরা পেরেশান অইও না,
বরং মুনাজাত করো।
তুমরার যততা চাইবার আছে,
আল্লার শুকরিয়া আদায় করিয়া তান গেছে চাও।
৭ তেউ আল্লার দেওয়া যে শান্তির কথা মানষে চিন্তাও করতো পারে না,
ইছা আল-মসীর মাজদি অউ শান্তি আইয়া তুমরার দিল আর মনরে রইক্ষা করবো।
৮ ও ভাই অকল,
আমি হেশ-মেশ কইরাম,
যেতা হাছা,
যেতা উপযুক্ত,
হক,
খাটি,
সুন্দর,
আর ইজ্জত পাওয়ার জুকা,
মানি যেতা ভালা আর যেতায় তারিফ অয়,
অউ লাখান বেয়াপারে তুমরা খিয়ালি অও।
৯ তুমরা আমার গেছ থাকি যে তালিম পাইছো,
যেতা হুনছো,
যেতা দেখছো,
আর যেতা কবুল করছো অতা অখন আমল করো।
তেউ শান্তি দেওরা আল্লাও তুমরার লগে লগে রইবা।
দান-খয়রাতর লাগি ধইন্যবাদ
১০ মালিকে আমার খুশি আরো বাড়াই দিলা,
বউত দিন বাদে তুমরা আমারে মনো কররায়।
আমার লাগি তো হামেশাউ তুমরা চিন্তা করছো,
অইলে ইতা দেখানির সুযোগ পাইছো না।
১১ কুনু অভাবো পড়িয়া আমি ইখান কইরাম না,
যেকুনু হালতেউ সন্তুষ্ট রওয়াখান আমি জানি।
১২ অভাবি বা নবাবি হালতে,
উপাসি পেটে বা ভরা পেটে,
ধনি বা গরিবির মাজে কিলা সন্তুষ্ট রওয়া যায়,
ইতা তালিম আমি পাইছি।
১৩ আসলে যেইন আমারে বল-শক্তি যুগাইয়া দেইন,
তান বলেউ আমি হক্কলতা করতাম পারি।
১৪ তা-ও তুমরা আমার কষ্টর লগে শরিক অইয়া,
খুব ভালা কাম করছো।
১৫ ও ফিলিপি জমাতর মুমিন অকল,
তুমরা তো জানো,
তুমরা পয়লা খুশ-খবরি পাওয়ার বাদে আমি যেবলা মাকিদনিয়া দেশ থাকি গেছলামগি,
অউ সময় তুমরা ছাড়া আর কুনু জমাতেউ আমার লগে কুনুজাত লেন-দেন করছে না।
১৬ আমি যেবলা থিষলনিকি টাউনো আছলাম,
অউ সময় আমার অভাবর কালো তুমরা কয়বার সাইয্য পাঠাইছো।
১৭ আমি তুমরার গেছ থাকি কুনু দান-দক্ষিনা চাইরাম না,
অইলে তুমরার লাগি অলা এক ফল আশা কররাম,
যেতা তুমরার আমল-নমাত জমা রইবো।
১৮ আমার হকল পাওনাউ আমি পাইলিছি।
আসলে আমার যতখান জরুর,
এর চাইতেও বেশি আছে।
উছাইদ ভাইর আত থাকি তুমরার উপহার পাইয়া অখন আমার বউত অইছে।
অউ উপহার তো আল্লাই খুশবয় আলা,
আল্লার দরবারো কবুল অওয়ার জুকা কুরবানি।
আল্লা পাক ইতায় খুশি অইন।
১৯ আমার আল্লায় তান নিজর গৌরবর ধন হিসাবে,
হজরত ইছা আল-মসীর উছিলায় তুমরার হকল অভাব দুর করবা।
২০ যুগে যুগে হর-হামেশা আমরার গাইবি বাফ আল্লা পাকর তারিফ জারি রউক।
আমিন।
আখেরি মুনাজাত আর ছালাম
২১ হজরত ইছা আল-মসীর তরিকার আল্লার হকল বন্দারে আমার ছালাম দিও।
আমার লগর হকল ভাইয়াইন্তে তুমরারে ছালাম জানাইরা।
২২ আল্লার যতো পাক বন্দা ই জাগাত আছইন,
খাছ করি বাদশা কৈছরর বাড়ির মুমিন অকলে ছালাম জানাইরা।
২৩ হজরত ইছা আল-মসীর রহমত তুমরার দিলো থাকউক।
আমিন॥