আল্লায় মুমিন অকলরে শাসন করইন
১২
১ তে আমরা দেখরাম,
ইমানি তেজর বউত সাক্ষি আমরার চাইরোবায় আছে।
এরলাগি আও,
আমরাও হকল জায়-জামেলা হরাই,
যে গুনায় আমরারে পেচাইয়া রাখে,
অতারে হরাইয়া ফালাই,
আর দৌড়াওরা দলর লগে অইয়া ধৈর্য ধরি হেশ পর্যন্ত দৌড়াই।
২ আউক্কা,
আমরার নজর রাখি মালিক ইছার বায়,
আউয়াল থাকি আখের পর্যন্ত তাইন অইলা আমরার ইমানর মুল খুটি।
তান লাগি যে খুশি রাখা অইছে,
অউ খুশির বায়দি চাইয়া,
দুখ-কষ্টর সলিবর উপরর মউতরেও কবুল করলা,
ই বেইজ্জতিরে কুনু দাম দিলা না।
আর অখন আরশে-আজিমো আল্লার ডাইনর তখতো তাইন তশরিফ রাখছইন।
৩ তে যেইন গুনাগার মানষর অতো বড় দুশমনিরে সইয্য করলা,
তান বেয়াপারে চিন্তা করো,
যাতে তুমরার দিলো কুনু কমজুরি বা নিরাশা না আয়।
৪ গুনার লগে লাড়াইত লাগিয়া তো লউ বারনির দশা তুমরার অখনও অইছে না।
৫ তুমরার গাইবি বাফ আল্লায়,
তান আওলাদ হিসাবে তুমরারে যে নছিয়ত করছইন,
তুমরা ইতা ফাউরিলিছো নি?
কিতাবো আছে,
ও আমার পুত,
মাবুদর শাসনরে এলামি করিও না,
তাইন কুনু ধামকি দিলে,
বেজার অইও না।
৬ কারন মাবুদে যেরারে মহব্বত করইন,
তারারেউ শাসন করইন,
যেরারে তাইন আওলাদ হিসাবে কবুল করিলাইন,
এরা পরতেক জনরে সাজা দেইন।
৭ শাসন মনো করিয়া তুমরা কষ্ট স্বীকার করো।
বাফে-পুতে যেলাখান সম্পর্ক,
আল্লায়ও তুমরার লগে অউলা সম্পর্ক রাখছইন।
ইলা কুনু পুত আছে নি,
যারে তার বাফে শাসন করইন না?
৮ হক্কল পুতরেউ শাসন করা অয়।
তুমরারে যুদি শাসন করা না অয়,
তে তো তুমরা ফুংগা,
আসল পুত নায়।
৯ জানো তো,
আমরার দুনিয়াবি বাফ অকলে আমরারে শাসন করইন,
আর আমরা তারারে ইজ্জত করি।
তে যেইন আমরার আছমানি বাফ,
তান গেছে গর্দনা নোয়াইয়া চলা আমরার লাগি জরুর নায় নি,
যাতে আমরা জিন্দেগি পাই?
১০ আমরার দুনিয়াবি বাফ অকলে যেলা ভালা মনো করতা,
অলা আমরারে শাসন করতা,
আর ইতা তো থুড়া কয়দিনর লাগি,
অইলে আল্লায় তো আমরারে শাসন কররা যাতে আমরাও তান পাক-পবিত্রতা হাছিল করি।
১১ কুনু শাসনরেউ খুশির বেয়াপার মনো করা অয় না,
দুখর বেয়াপারউ মনো অয়,
অইলে যেরা শাসন মানিয়া চলে,
তারা বাদে দীনদারির শান্তিআলা জিন্দেগি পায়।
১২ এরলাগি তুমরার কমজুর আতরে মজবুত করো,
দুর্বল আটুরে সবল করো।
১৩ তুমরা সিদা পথে আটো,
যাতে লেংড়া পাও আর না কচকে,
বরং ভালা অইযায়।
আল্লার গজব থাকি জান বাচাও
১৪ হকল মানষর লগে শান্তিয়ে বসত করা আর পাক-পাকিজা অইয়া চলার লাগি খিয়ালি অও,
ইলা না চললে কেউ মালিকর দরশন পাইতায় নায়।
১৫ হুশিয়ার রইও,
যাতে কেউ আল্লার রহমত থাকি বাদ না পড়ো।
খিয়াল রাখিও,
তুমরার মাজর কেউ যানু বিষাক্ত তিত্বা গাছর জড়র লাখান বার অইয়া না ছাতায়,
আর বউত মানষরে নাপাক না বানায়।
১৬ হজরত ইয়াকুবর ভাই ঈষʼর লাখান কুনু বে-পথি নাফরমান পয়দা না অয়।
ঈষে তো খালি এক অখতর খানির লাগি,
তার নিজর মৌরসি মালিকানা বেচিলাইছে।
১৭ তুমরার তো জানাউ আছে,
যুদিও বাদে হে চখুর পানি ফালাইয়া কান্দি কান্দি দোয়া মাংগিছিল,
অইলে তৌবা করার সুযোগ আর হে পাইছে না।
১৮ তুমরা নিচ্চয় ইলা কুনু পাড়র কান্দাত আইছো না,
যে পাড়ো আতদি ছওয়া যায়।
হউ তুর পাড়র জালাইল আগুইন,
গইন আন্দাইর,
হিল-তুফান,
১৯ শিংগার আওয়াজ,
বা জুরে জুরে মাত-কথার কুনু আওয়াজর গেছেও আইছো না।
জুরে জুরে মাতর অউ আওয়াজ যেরা হুনছিল,
তারা মিনত করি কইছিল,
যাতে তারার লগে আর বাতচিত করা না অয়।
২০ তারা আল্লার অউ হুকুম সইতো পারছিল না,
আল্লায় কইছলা,
“যুদি কুনু পশুয়েও ই পাড়ো ছয়,
তে তারেও পাত্বর মারিয়া মারিলিতে অইবো।”
২১ অউ সময় যেরা মাবুদর দিদার দেখছিল,
তারা অতো ডর ডরাইছিল যেন,
স্বয়ং মুছা নবীয়ে কইলা,
“ডরর চুটে আমি কাপিরাম।”
২২ অইলে তুমরা তো পবিত্র ছিয়ন পাড় আর জিন্দা আল্লার টাউনর কাছাত আইছো,
আজার আজার ফিরিস্তায় যেখানো খুশি-বাসির মাহফিল কররা,
হনো আইছো।
ই টাউন অইলোগি,
বেহেস্তি জেরুজালেম।
২৩ বেহেস্তি খাতাত যেরার নাম লেখা অইগেছে,
বড় পুয়ার লাখান যেরারে ইজ্জত দেওয়া অইছে,
এরার বানাইল জমাতর ধারো আইছো।
যেইন তামাম মানষর বিচার করইন,
হউ আল্লার কাছাত আইছো।
যে পরেজগার অকল পুরাপুর কামিল অইগেছইন,
এরার রুহর মজলিছো আইছো।
২৪ যে ইছা আল্লার লগে মিলনর নয়া উছিলার জিম্মাদার,
হউ ইছার গেছে আইছো।
হাবিলর লউ থাকি আরো মরতুবাআলা যে লউ,
তুমরা ছিটাইল হউ লউর কাছাত আইছো।
২৫ মুছা নবীয়ে আল্লাই হুশিয়ারির কথা দুনিয়ার মানষরে জানানির বাদে যেরা তান হুশিয়ারিরে এলামি করছিল,
এরা যেবলা রেহাই পাইছইন না,
তে যেইন বেহেস্তো থাকিয়া আমরারে হুশিয়ার কররা,
তান হুশিয়ারিরে এলামি করলে তো এক্কেবারে নিচ্চিতউ আমরা কুনু রেহাই পাইতাম নায়।
এরলাগি খিয়াল রাখিও,
যেইন হউ বাতচিত করছইন,
তান হুকুমরে এলামি করিও না।
২৬ হি আমলো আল্লা পাকর মুখর আওয়াজে হারা দুনিয়ারে কাপাইছিল,
অইলে অখন তাইন অউ ওয়াদা করছইন,
“আমি দুছরা বার খালি ই দুনিয়ারে নায়,
আছমানরেও কাপাইমু।”
২৭ তে “দুছরা বার” অউ শব্দ থাকি বুজা যায় যেন,
যেতা জিনিস অকল লাড়া-চাড়া করাইল যায়,
মানি যেতা পয়দা করা অইছে,
ইতারে বাদ দেওয়া অইযিবো,
আর যেতারে লাড়া-চাড়া করা যায় না,
অতা কাইম রয়।
২৮ বুজরা নি,
যে বাদশাইরে লাড়া-চাড়া করা যায় না,
আমরা তো হউ বাদশাই পাইরাম,
এরলাগি আউক্কা,
আমরা আল্লার দরবারো শুকরিয়া জানাই।
আল্লা পাক যে নমুনায় খুশি অইন,
অউ নমুনায় আমরা তান এবাদত করতাম পারমু,
তানরে ডরাইয়া,
তাজিম করিয়া এবাদত করমু।
২৯ কারন আমরার আল্লা তো বিনাশ কররা আগুনির লাখান।